Description
-
Alexandre IV (1254-1261)
-
Ut Joannem Campoli unum ex testamenti Marci Ziani executoribus compellat dictum testamentum exequi non obstante statuto Civitatis. (Ex Authographo in Archivo Conventus S. Mariæ Gloriosæ Venetiarum Min. Convent. asservato.)
-
Anno 1255. die 20. Martij.
-
1255
-
ALEXANDER &c.
Dilecto filio ... Priori Sancti Johannis in Monte Bononien.a Salutem, & Apostolicam Benedictionem.
Exposuit Nobis dilecta in Christo filia nobilis mulier Constantia nata dilecti filii nobilis viri ...b Marchionis Estensis, quod bon. mem. Marcus Zianic maritus ejusdem Johannem Campoli, & quosdam alios Cives Venetosd testamenti sui executores reliquit, in quo de bonis suis Ecclesiis quibusdam, & aliis piis locis legavit; prout in Instrumento publico inde confecto dicitur plenius contineri. Sed dictus Johannes asserens in Civitate Venetiarum fore statutum juramento vallatum, ne aliquod Testamentum valeat, nisi fuerit per Tabellionem Civitatis ejusdem in scriptis redactum, prædictum ipsius Marci testamentum, ex prætextu, quod idem testamentum per Tabellionem Civitatis prædictæ confectum non extitit, exequi quantum ad eumdem pertinet, pro sua renuit voluntate; quamquam idem testamentum alias legitimum habeatur; & ad ipsius executionem reliqui executores una cum dicto Civee, qui se in aliquibus executioni cum ipsis immiscuit, procedere sint parati; propter quod testamenti ejusdem executio impeditur. Quare Nobis præfata Nobilis humiliter supplicavit, ut providere super hoc paterna sollicitudine curaremus. Cum autem in omnibus piis voluntatibus debeat Ecclesia providere, ut secundum defunctorum voluntatem universa ...f discretioni tuæ per Apostolica scripta mandamus, quatenus, si est ita, præfatum Civem, ut dictum testamentum, quatenus ad ipsum pertinere dignoscitur, exequi non omittat; monitione præmissa, sicut justum fuerit, appellatione remota compellas; eodem statuto tamquam rationi obvio non obstante, & Constitutione de duabus dietis edita in Concilio Generalig; dummodo ultra tertiam, vel quartam extra suam Diœcesim auctoritate præsentium pars altera ad judicium non trahatur.
Datum Neapoli xiii. Kalendas Aprilis, Pontificatus Nostri Anno Primo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XXXV., pp.27-28
-
(a) S. Joannis in Monte Bononien.: Ordinis S. Augustini Canon. Regul.
-
(b) Nobilis viri...: Azzonis VII. Marchionis Estensis, & Ferrariæ Vicarii Pontificii anno 1240. constituti, uxor primo Uberti Comitis de Maritima, deinde Gulielmi Palavicini ex Muratorio in Antiquit. Esten. par. 2. cap. 1.
-
(c) Marcus Ziani: De quo dictum est supra ad Innocentii IV. Diploma Cum sicut intelleximus &c. anno 1253. die 12. Julii pro hac causa editum.
-
(d) Quosdam alios cives Venetos: Nempe Marcum Baduarium, Marchisinam ejus uxorem, & Medaniam Comitissam testatoris avunculam ex aliis hujus Pontificis litteris Cum nos dilectis &c. hoc anno die 14. Maji, & 19. Septembris datis.
-
(e) Cum dicto cive: Joanne Campulo.
-
(f) Universa ...: Supple, suum sortiri queant effectum.
-
(g) In Concilio generali: Lateranensi IV. anno 1215. sub Innocentio III. habito cap. 37.