Description
-
Alexandre IV (1254-1261)
-
Marochii Episcopum O. M. Apostolicæ Sedis Legatum in Africam constitutum commendat Christifidelibus illius Regionis. (Ex Vaticano Archivo in Regesto Pontif. epist. 230. an. 1.)
-
Anno 1255. die 18. Martii.
-
1255
-
ALEXANDER &c.
Dilectis Filiis Universis Christifidelibus per Africam constitutis Salutem & Apostolicam Benedictionem.
Quia corporali præsentia non possumus locis singulis imminere; illius exemplo, qui pro salute humani generis de supremis Cælorum ad ima Mundi descendens discipulos, quos elegit, in universum Mundum transmisit omni Creaturæ Evangelium prædicare; nonnunquam personas providas, & discretas in partem solicitudinis destinamus pro negotiorum urgentium qualitate, quæ prava in directa, & aspera convertentes in plana rectas faciant semitas Dei nostri, populumque acceptabilem sibi reddant. Sane de circumspectione Venerabilis Fratris nostri ....a Marochitani Episcopi Apostolicæ Sedis Legati plenam in Domino fiduciam obtinentes ipsum in Africam universam ad cultum Divini nominis ampliandum commisso sibi plene Legationis officiob, ut juxta datam sibi a Deo prudentiam evellat, & dissipet; ædificet, & plantet; providimus de Fratrum nostrorum consilio destinandum. Quo circa Universitatem vestram rogamus, monemus, & hortamur attente, per Apostolica vobis scripta firmiter præcipiendo mandantes, quatenus ipsum Sedis prædictæ Legatum tanquam personam nostram, vel potius Nos in eo recipientes cum debita reverentia, & honore, illius monitis, & mandatis plene ac humiliter intendere procuretis; ita quod idem ad gloriam Dei, & animarum profectum injunctum sibi ministerium exequi valeat inoffense; Nosque devotionem vestram possimus exinde merito commendare; alioquin sententiam, quam idem tulerit in rebelles, ratam habebimus, & faciemus auctore Domino inviolabiliter observari.
Datum Neapoli xv. Kalendas Aprilis, Pontificatus Nostri Anno Primo.c
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XXXII., p.26
-
(a) Ven. Fratris nostri ‥: Lupi ex Ord. Min. assumpti, de quo plures epistolæ Innocentii IV. habentur in primo hujus Bullarii tomo, & plures hujus Pontificis legentur in isto.
-
(b) Legationis officio: Antea enim tantummodo Episcopus erat, nunc etiam Apostolicæ Sedis Legatus in universam Africam creatur.
-
(c) Hanc epistolam vidit & Raynaldus in Annal. Eccles., ejusque fragmentum ex Reges. Vatic. refert ad hunc annum n. 50., sed sequentem ad Episcopum 3. April. dat. non memorat.