Description
-
Innocent IV (1243-1254)
-
Præstantibus subsidium, vel Crucis signum assumentibus pro W. Romanorum Rege contra Conradum Friderici quondam Imp. Filium, vel ejus fautores, si in ludicris pugnis obierint, jus sepulturæ Eccles. tribuatur. (
Regest. Vatic.epist. 606. anno 11.) -
Anno 1254. die 17. Februar.
-
1254
-
INNOCENTIUS &c.
Venerabili Fratri a ‥ Episcopo Sambiensi, & dilectis filiis prædicatoribus Verbi Crucis in Regno Alemaniæ Salutem, & Apostolicam Benedictionem.
Cum sacris sit Canonibus interdictumb, ne ii, qui accedentes ad torneamentac causa congregandid, & vires suas temerè ostentandi occidunture, ibidem tradantur Ecclesiasticæ sepulturæ: non intendimus aliquibus aperire viam eundi ad torneamenta hujusmodi, sed ea omnimodè detestamur. Verum si quos, quod aspernamur, ad ipsa ire contigerit; talibus, qui aliquod subsidium juxta facultates proprias secundum vestræ discretionis prudentiam Carissimo in Christo Filio nostro Willelmo Regi Romanorum Illustri in communi causa contra Conradum Natum Friderici quondam Romanorum Imperatoris, & fautores ejusdem prosequenda præstiterint; vel qui in ejusdem Regis subsidium contra prædictum Conradum, & fautores eosdem pro se, vel suis Prædecessoribus assumpserint signum Crucis; volentes in hac parte ob favorem ipsius Regis, & negotii generalis, quod eidem pro Christiani populi pace prosequitur, remedio specialis gratiæ providere vobis præsentium auctoritate concedimus; quod si quos eorum ibi mori contigerit, ipsis, vel iis, pro quibus hæredes talium, aut consanguinei, & amici hujusmodi subsidium præstiterint; dummodo in ipsis omnibus apparuerint signa pœnitentiæ manifesta; possitis per vos, vel alios ad hoc idoneos auctoritate nostra concedere, quod tradantur Ecclesiasticæ sepulturæ; præsentibus post triennium minimè valituris.
Datum Laterani xiii. Kalend. Martii Pontificatus Nostri Anno Undecimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°DXVII., p.703
-
(a) Ven. Fratri …: Joanni Diest. O. M. sæpius commemorato.
-
(b) Canonibus Interdictum: A Conciliis Lateranen.
ii.anno 1139. sub Innoc. ii. c. 4., Rhemensi sub Eugenio iii. anno 1148. c. 12., & Lateranensi iii. sub Alex.iii.anno 1179. c. 20., iisque concinuit Cælestinusiii.epist. ad Archiepiscopos, & Episcopos Angliæ anno 1192. data apud Card. Baronium ad eum ann. n. 12., & ipsemet Innocentius IV. tempore Concilii Lugdunen. anno 1245. ex Raynaldo n. 53. -
(c) Torneamenta: Seu Hastiludia, ludicra certamina, bellique simulacra, Italice Giostre, Gallice
Tornojement. -
(d) Congregandi: Lego congrediendi, nempe ad contentionem & certamen gradiendi.
-
(e) Occiduntur: Etsi enim ludicræ pugnæ essent, & ficta certamina; haud raro tamen mortalia pericula, & infelices neces contingebant; ut præ ceteris illa Henrici II. Galliarum Regis.