Description
-
Innocent IV (1243-1254)
-
Mandat infrascriptis, ut inquirant de vita, atque miraculis Servorum Dei Petri Veronensis, & Dominici ejus Socii Ordinis Prædicat. (Ex Authographo Cœnobii S. Eustorgii Mediolanen., & inde in Bullario ejusdem Ordinis tom. 1. Bul. 266. Innoc. IV.
-
Anno 1252. die 31. Augusti.
-
1252
-
INNOCENTIUS &c.
Venerabilibus Fratribus Archiepiscopo Mediolanen. a , Episcopo Lauden. b , & dilecto filio Præposito S. Nazarii Mediolanen. Salutem, & Apostolicam Benedictionem.
Judicium Ecclesiæ de his, qui Martyrum creduntur accessisse Collegiis, & coronas decoris de manu Domini suscepisse, non tam passio, quam aureola passionis informat; non tam miraculorum signa confirmant, quam evidentia testimonia operum sanctitatis. Verum quoniam recolendæ memoriæ viros Petrum de Veronac, & Dominicum Ordinis Prædicatorum Fratres, quos quidem negotio Fidei contra hæreticorum perfidiam fideliter insistentes ministrorum hæreticæ pravitatis sæva occidit insania, Martyrum cætibus aggregatos præter justissimam patiendi causam, & decoræ vitæ meritum, quo Deo placere usque ad exitum studuerunt, clara, quibus coruscare dicuntur, miracula protestantur; dilecti filii Clerus, & populus Mediolanen. per communes & fideles Nuncios Nobis humiliter, & cum instantia supplicarunt, ut ad gloriam Dei, robur Fidei, depressionem perfidiæ, ac Christianæ devotionis augmentum eosdem inclytos viros, quos regnare cum Christo in Ecclesia triumphanti pretiosa eorum mors, & multifaria prodigiorum argumenta significant, curaremus in Ecclesia militanti Sanctorum catalogo aggregare. Licet autem supplicationem hujusmodi favore benevolo suscepimus prosequendum, cum jam Fidei ratio attestetur; tamen ut semper hoc rei veritas inexpugnabiliter innotescat; & invidia contradictionis cujuslibet adversitatis irrefragabiliter convincatur; discretioni vestræ per Apostolica scripta mandamus, quatenus de ipsorum Fratrum vita, atque miraculis solicite inquirentes, testes idoneos super his per vos, & per alios curetis legitime auctoritate nostra recipere; & juxta interrogatoriad, quæ vobis sub Bulla nostra mittuntur interclusa, examinare prudenter, eorumdem testium depositiones fideliter in scriptis redactas sub sigillis vestris ad Sedem Apostolicam transmissuri; ut in negotio, sicuti secundum Deum videbitur, procedatur. Quod si non omnes iis exequendis simul poteritis interesse, duo, vel singuli vestrum ea nihilominus exequantur.e
Datum Perusii ii. Kalendas Septembris Pontificatus Nostri Anno Decimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXVI., p.624
-
(a) Archiepiscopo Mediolanen.: Leoni Valvasorio de Perego agri Mediolanensis Oppido, qui ex Ministro Provinciæ Mediolanen. Ordinis Minorum ab Innocentio IV. anno 1243. vel 1244. assumptus ad Cathedram Mediolanen. regendam partes Pontificias una cum Gregorio de Montelongo ejusdem Pontificis Legato strenue tutatus est contra Fridericum ii. Imp. anathemate percussum; & post multa regiminis, atque religionis egregie præstita migravit ad Dominum anno 1257. die 14. Octobr. Lignani sui juris, Diœcesisque Oppido non sine Sanctitatis opinione: de quo Waddingus ad annum 1239. n. 15., Ughellus tom. 4. Ital. sac. in Archiepisc. Mediolanen., Scriptores rerum Mediolan. & alii plures. Videri poterit & epist.
Ecclesia Mediolan. vacante &c.1244. 9. Jan. dat. ut supra. -
(b) Episcopo Lauden.: Bono Joanni ab Innocentio IV. anno isto 1252. die 13. Januarii ad hanc Ecclesiam promoto, ut ex ejusdem Pontificis epistola ab Ughello tom. 4. Ital. sac. in Episc. Lauden. relata.
-
(c) Petrum de Verona: Hoc anno die 8. idus April. ab Hæreticis in ministerio sac. Inquisitionis contra eosdem crudeliter, impieque necatum.
-
(d) Juxta interrogatoria: quæ tamen non extant exscripta, etsi Pontifex scribat, se illa mittere sub Bulla interclusa: sunt nihilominus ea ipsa, quæ incipiunt:
Testes legitimos &c.a Waddingo vulgata de B. Simone de Colazone ad ann. 1240. num. 6., & de S. Elisabetha Hungara inBullarioOrd. Prædicat. tom. 1. Bull. 56. Gregorii IX. sub an. 1232. die 13. Octob. -
(e) Exequantur: Hi vero tam diligenter, & prudenter hoc munus peregerunt; ut non post multos menses mense nimirum Martio anno sequenti Petrus in Sanctorum catalogo sit relatus; cujus Vita legi potest apud Surium, & Bullandios in Actis SS. men. Aprili.