Description
-
Innocent IV (1243-1254)
-
Ne Fratres nostri, aliique ad Ordinem suum recipiant Fratres Humiliatorum post factam Professionem sub pœna &c. (Ex
Regest. Vatic.epist. 46. an. 8.) -
Anno 1250. die 13. Augusti.
-
1250
-
INNOCENTIUS &c.
Dilectis filiis a … Magistro, & Fratribus Ordinis Humiliatorum b Salutem, & Apostolicam Benedictionem.
Exhibita Nobis vestra petitio continebat, quod licèt prohibuerimusc, ut nulli Fratrum vestrorum post factam in domibus vestri Ordinis Professionem, fas sit sine tua, Filii Magister, licentia de domibus ipsis discedere, discedentem verò absque communi litterarum vestrarum cautione nullus audeat retinere: quod si quis forte retinere præsumpserit, licitum vobis sit in Fratres ipsos regularem sententiam promulgare. Nihilominus tam Cistercien., Cartusien., Minorum, & Prædicatorum, ac quorumdam aliorum Ordinum Fratres asserentes, quod eis a Sede Apostolica est indultumd, ut volentes eorum aggregari Collegio possint in Fratres recipere; ac eos absolvere ab excommunicationis, vel suspensionis, aut Interdicti sententia, si qua fuerint innodati; Fratres Ordinis vestri recipiunt; propter quod idem Ordo non modicum sustinet detrimentum. Quare Nobis humiliter supplicastis, ut providere Ordini vestro super hoc de benignitate solita curaremus. Nos igitur quieti vestræ paterna volentes sollicitudine providere, ne quis Fratres vestri Ordinis post factam in domibus vestris Professionem prætextu alicujus indulgentiæ Apostolicæ recipere audeat absque litterarum vestrarum communium cautione auctoritate Apostolica districtius inhibemus; vobis nihilominus concedentes, ut in Fratres eosdem possitis excommunicationis sententiam promulgare, a qua nequeant nisi per te, ac Successores tuos, Filii Magister, absolvi, vel de mandato Sedis Apostolicæ speciali expressam faciente de præsentibus mentionem. Nulli ergo omnino hominum liceat hanc paginam nostræ concessionis, & inhibitionis infringere, vel ei ausu &c.
Datum Lugduni Idibus Augusti, Pontificatus Nostri Anno Octavo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCCXXXVIII., pp.551-552
-
(a) Filiis ‥: Beltramo Sochore ex 231. Constitutione hujus Pontificis in Bullario Ord. Prædicat. tom. I. anno 1251. die 25. Junii acta incip. Cum a nobis petitur &c.
-
(b) Humiliatorum: Quorum initium, & finis alias a nobis indicatus fuit.
-
(c) Prohibuerimus: Quæ prohibitio nos hucusque latuit.
-
(d) Indultum: De his videlicet personis, quæ liberæ essent, & e seculo venientes; non quæ alterius Religionis votis, ac professione obligatæ agnoscerentur: quod quum ab accedentibus, seque præsentantibus forsan reticeretur; nil mirum, si tam facile reciperentur.