« bullarium-franciscanum-709 »

INNOCENTIUS &c.

Venerabili Fratri ‥ a Episcopo Tusculano Apostolicæ Sedis Legato Salutem, & Apostolicam Benedictionem.

Paternæ pietatis est proprium, affectuosius illis osculum reconciliationis imprimere, quos longius a limine patrio devius error aversionis abduxerat; & obnixius filialis reduxit humilitas in amplexum gratiæ amplioris. Hoc instinctu Apostolicæ benignitati suggeritur, Græcos se a damnato discessionis orientalis schismate abscindentes, & redeuntes ad individuam sinceritatis Catholicæ unitatem interioribus paternæ caritatis continere visceribus; & pleniori maternæ dùlcedinis ubere confovere, ac eorum desideriis optatum secundum Deum exauditionis benigne præbere consensum; ut ipsi congruo favore suscepti ad veram Orientis novi auroram se resurrexisse lætentur, quos in cœcas exorbitationis lubricæ tenebras occasus veteris intruserat Orientis. Sanè Venerabilis Fratris nostri ‥ Archiepiscopi Græcorum in Cyprob transmissa Nobis insinuatio continebat, quod ipse olim per dilectum filium Fratrem Laurentium c Pœnitentiarium nostrum tunc in Partibus illis Apostolicæ Sedis Legatum ab exilio, in quod eum illata sibi, ut asserit, a Latinis Prælatis injuriarum molestia egerat, revocatus; tibi postmodum in eisdem partibus existentid cum Suffraganeis suis sponte obtulit, & humiliter præstitit Ecclesiæ Romanæ nomine obedientiam manualem; propter quod iidem Archiepiscopus, & Suffraganei de Apostolicæ Sedis clementia, quæ illis abundantius solet affluere, quos integritatis consortio reconciliationis novitas inserit, petitiones suas, quas missas per communes Nuncios coram Nobis, & Fratribus nostris fecere proponi, ad gratiam exauditionis admitti suppliciter postularent. Petierunt siquidem iidem Nuncii eidem Archiepiscopo, & suis Successoribus ordinandi, & sustituendi canonicè in Insula Cypri quatuordecim suæ nationis Episcopos, cum totidem ibi Episcopales Græcorum Sedese esse consueverint ab antiquo, permitti de nostra licentia plenam, & liberam potestatem; & concedi tam sibi, quam eisdem Episcopis, eorumque Successoribus in Ecclesiæ Romanæ obedientia permanentibus, ne Prælatorum Latinorum jurisdictioni subjaceant; sed in subjectione Sedis Apostolicæ pari cum illis gaudeant privilegio libertatis. De cetero quoque in Clericos, & Laicos suos liceat eis jurisdictionem ordinariam exercere; prout antequam ab Ecclesiæ Romanæ resilirent obedientia, exercebant; eisque Clerus, & Populus Græcorum, quemadmodum a suis subditis Latinis Prælatis intenditur, obediant in spiritualibus, & intendant; & inconcussa sit apud eos canonica Ordinum Ecclesiasticorum susceptio, & libera Monasticæ professionis electio; sicut erat, antequam Terra illa subderetur Dominio Latinorumf. Decimas vero, quas Archiepiscopus, & Episcopi Latini a Monasteriis Græcorum de laboribus ipsorum, quos propriis manibus, aut sumptibus excolunt; nec non & a Surianis, & Græcis liberis Regni Cypri exigunt, petierunt omnino dimitti, eorumdem Archiepiscopi Græcorum, & Suffraganeorum suorum usibus profuturas. Et nihilominus eorumdem, ac suorum sustentationi Clericorum a memoratis Archiepiscopo, & Episcopo Latinis aliqua Decimarum, quæ ipsis de laboribus, & nutrimentis animalium Græcorum præfatæ Insulæ proveniunt, portio assignetur. Ad hæc quoque ipsorum supplicatio postulavit; ut liberum sit eis Græcorum omnium sæpefatæ Insulæ spirituales causas audire; ac secundum Canones, & rationabiles, & antiquas ipsorum consuetudines diffinire; super quibus ab eis non ad Archiepiscopum, vel Episcopos Latinos, sed ad Nos, vel Legatum Sedis Apostolicæ, quem in Partibus illis deputabimus, appelletur; qui ab Archiepiscopo Græcorum Cypri pro tempore subrogato vice Romani Pontificis recipiat obedientiæ, & reverentiæ sponsionem; ipsumque, ac Suffraganeos ejus protegat ab indebitis molestationibus, & defendat. Subjecit præterea petitio eorumdem, ut quæcumque fuerunt in pœnam inobedientiæ ipsorum, vel ipsius occasione per bonæ memoriæ P.g Albanen. Episcopum tunc in partibus illis Apostolicæ Sedis Legatum constituta, vel scripta, & quibuslibet pactis, vel conditionibus ordinatah, seu per quoscumque alios contra Archiepiscopum, & Episcopos, ac ceteros Græcos Insulæ sæpefatæ ab eadem Sede, vel ejus Legatis obtenta, in irritum revocentur; cum culpæ causa sublata effectus vindictæ debeat submoverii. Quia verò de circumstantiis, & causis, quæ super hujusmodi petitionibus erudire possent animi nostri motum, reddi, sicut oportuit, nequivimus circumspecti; cum in talibus ita petentium affectibus sit faciendum, ut circa ea, quæ utiliter expediunt, non erretur: Nos plenam obtinentes de tua discretione fiduciam; & attendentes quod de iis, quæ oportebit in considerationem deliberationis adduci, vicinitate suffragante locorum, tua poterit prudentia facilius informari; mandamus, quatenus Prælatorum, & aliorum prudentum virorum, quos sine scrupulo suspicionis videris consulendos, communicato consilio super præmissis, quæ ab eisdem Archiepiscopo Græcorum, ejusque Suffraganeis postulantur, & aliis eorum justis desideriis statuere, ac disponere providendo, & ordinando auctoritate nostra procures, quod eorum intentioni pro animarum salute, Ecclesiæ pace perpetua, ac salutaribus Catholicæ obedientiæ incrementis videris convenirej. Contradictores per Censuram Ecclesiasticam, appellatione postposita compescendo.

Datum Lugduni xii. Kalen. Augusti Pontificatus Nostri Anno Octavok.