Description
-
Innocent IV (1243-1254)
-
Instat, ut executioni mandentur sua jussa pro restitutione Ecclesiæ SS. Trinitatis Fratribus Ord. Minor. Pisarum. (Ex
ArchivoConventus S. Francisci ejusdem urbis, & inde in Historia Minoritica Provinciæ Tusciæ P. M. Nuti MS.) -
Anno 1247. die 9. Augusti.
-
1247
-
INNOCENTIUS &c.
Venerabili Fratri a … Archiepiscopo Pisano Salutem, & Apostolicam Benedictionem.
Quia Personas Religiosas eo majori prosequi favore debemus, quo devotiori placere student famulatu; libenter illa sibi paterna sollicitudine procuramus, per quæ ipsarum Religio laudabile suscipere valeat, auctore Domino, incrementum; & eædem Animarum salutem, pro qua Mundi vanitatem penitùs reliquerunt, liberiùs consequantur. Sanè meminimus olim Nos tibi nostris dedisse Litterisb in mandatis, ut Eccles. Sanctæ Trinitatis, quam bonæ memoriæ Cælestinus Papa Prædecessor Noster, tunc Tituli Sancti Marci Presbyter Cardinalis in Tusciæ partibus Apostolicæ Sedis Legatus contulit Fratribus Minoribus apud Pisas; cum Nos postmodum collationem hujusmodi gratam habentes eam duxerimus confirmandam; restitueres Fratribus supradictis. Sed tu, prout accepimus, mandatis Nostris penitus obauditisc, id efficere non curasti; propter quod iterato Litteris Nostrisd injunximus, ut præfatam Ecclesiam sine difficultate qualibet restitueres Fratribus memoratis juxta priorum continentiam Litterarum. Sed & id nihilominus ea occasione, quod dicti Fratres tibi eamdem Ecclesiam commendarant, facere omisisti. Quocirca Fraternitati tuæ per Apostolica scripta mandamus, quatenus præfatam Ecclesiam eisdem Fratribus saltèm hac vice ob reverentiam Apostolicæ Sedis, & nostram restituens, Edmundo Presbytero, cui dictam Ecclesiam dicis contulisse, provideas in tua Civitate, vel Diœcesi de Beneficio Ecclesiastico competenti: mandatum nostrum taliter impleturus, quod non possis de negligentia reprehendi, sed potius de diligentia commendari.
Datum Lugduni V. Idus Augusti, Pontificatus Nostri Anno Quinto.e
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXXX., p.485
-
(a) Ven. Fratri: Vitali de Martiis Pisano, de quo supra in aliis litteris, de eoque Ughellus tom. 3. Italiæ Sacræ diffuse, & varie disserit.
-
(b) Litteris: Anno 1244. die 17. Junii scriptis, & supra relatis.
-
(c) Obauditis: Idest neglectis, & non auditis, ut etiam explicatur in Glossario Fresnen., seu Cangensi.
-
(d) Litteris nostris: Eodem anno 1244. die 24. Septembr. datis, quæ supra ibi leguntur:
-
(e) Et pro rei executione scripsit etiam paulopost nempe die 19. hujus mensis Abbati S. Zenonis, & Prioribus SS. Sixti, & Pauli de Horto litteras sequentes.