« bullarium-franciscanum-301 »

GREGORIUS &c.

Charissimo in Christo filio illustri Regi a Hungariæ Salutem, & Apostolicam Benedictionem.

Litterasb, quas Nobis Celsitudo Regia destinavit gratanter recepimus, & quæ continebantur in eis, tam diligenter intelleximus, quam libenter dignas agentes gratias Domino Deo nostro, in gratia Dei, quæ data est Tibi in Christo Jesu, quod illo salubriter inspirante, qui habens corda Regum in manu sua, ea, ubi voluerit, inclinabit; clar. mem. Progenitorum tuorum exempla secutus, quanto eis potentia es, & dignitate sublimior, tanto te illi humiliori devotione substernens, qui exaltat humiles in salutem, ipsum reverentius veneraris, & Sponsam ejus Ecclesiam venerabilius revereris, prout affectu exhibes, & effectu. Fortitudine namque Spiritus roboratus ad assumendum negotium contra Gentem apostatricem, populum blasphemantem, hæreticos videlicet, & Schismaticos Terræ Assanic, ipsumque Assanum Dei, & Ecclesiæ inimicum, illudque cum auxilio Dei, & Ecclesiæ, personaliter prosequendum, te prompta magnanimitate, & magnanimi promptitudine voluntarius obtulisti, ut sic Dei, & Ecclesiæ obsequiis totaliter te adscribas. Propter quod, licèt adhuc in minori constituti officio, ac demum ad apicem summi Pontificatus assumpti personam tuam speciali prærogativa dilectionis, & gratiæ amplectentes ad profectum tuum, & exaltationem coronæ Regiæ intenderimus diligenter; nec tamen quodam modo reputantes Nos ad id tuis meritis, debitores tanto, non solum in his, quæ in eisdem litteris expressisti, quantum cum Deo possumus, favorabiliter exaudire te volumus, sed etiam ad omnia, quæ tuum respiciunt commodum, & honorem, propensius aspiramus, quanto libentius Divinis, & nostris beneplacitis obsecundas. Sed & illam de te fiduciam gerimus, & sic puritatis tuæ zelum discretionis spiritu te credimus moderari, quod nihil tibi a Nobis concedi velis, per quod Romana Ecclesia Mater tua notam alicujus detractionis incurrat, vel trahi possit ab aliis in exemplum. Cum enim inductus forsan consilio aliquorum a Nobis petieris, tibi legationis officium in Terram Assani supradicti committi, & concedi etiam potestatem limitandi Diœceses, instituendi Episcopos, & distinguendi Parochias, nec non & Terram, quæ Zemramd nominatur, in qua dudum desolata excrevit populi multitudo, qui nondum subfuerat cuiquam Episcopo, alicui Episcopatui applicandi: quia Serenitati vestræ in visceribus Jesu Christi dilectæ, ac per hoc negare tibi aliquatenus non valemus, quod secundum Deum cuiquam essemus Principum concessuri, etsi non id, quod ad litteram petitur, idem tamen tibi de Fratrum nostrorum consilio concedimus in effectu, ut videlicet possis assumere quemcumque malueris de Archiepiscopis, & Episcopis Regni tui, qui nostra fretus auctoritate, præmissa de tuo consilio exequatur, cui Venerabilis Frater noster Episcopus Perusinuse Apostolicæ Sedis Legatus de speciali mandato nostro, quod ei dirigimus, eamdem exequendi tribuet potestatem. Et quia Personam, quam intendis assumere, ignoramus, illam Nobis Regia mansuetudo significet, ut ei super hoc nostras litteras destinemus. Ad hoc, ut ad assumpti expeditionem negotii ex aliquorum subsidiis, licèt non indigeas, per Dei gratiam, fortius animeris; universis Crucesignatis ejusdem Regni commutandi vota sua per manus dilecti Filii .... Prioris Provincialis Fratrum Prædicatorum, & ‥ Ministri Fratrum Minorum Provinciæ Strigoniensisf, quibus super hoc Scripta nostrag dirigimus, liberam concedimus facultatem. Ipsis quoque Priori, & Ministro per litteras nostras injungimus, ut per se, ac Fratres suos contra prædictos hæreticos, & Schismaticos prædicent verbum Crucis, illam eis, qui contra eosdem signum Crucis assumpserint, indulgentiam concedentes, quam habent laborantes in subsidium Terræ Sanctæ; tibique concedant aliquos ex Fratribus, quos in hujusmodi obsequio Jesu Christi provideris eligendos. Ceterum, quia indignum esset, ut dum militas Regi Regum, aliquod Regni tui dispendium patiaris; in omnes, qui, postquam te accinxeris ad præfatum negotium exequendum, quamdiu in persecutione ipsius fueris, Regnum ipsum invaserint, vel contra te diabolo conspiraverint instigante, excommunicationis sententiam promulgamus, quam per Archiepiscopos, & Episcopos Hungariæ, ac Fratres Prædicatores, & Minores per totam Hungariam, & Regna, & loca vicina mandamus ex tunc solemniter publicari. Ut igitur inoffenso pede curratur ad prælium Domini præliandum, nulloque possit assumptum negotium adverso obice præpediri; universos dicti Regni, qui ad collaborandum tecum in eodem negotio assumpserint signum Crucis, ac alios ab universis excommunicationum sententiis latis a Venerabili Fratre nostro ‥ Episcopo Perusinoh Apostolicæ Sedis Legato, per Priorem, & Ministrum prædictos juxta formam Ecclesiæ mandamus absolvi.

Datum Anagniæ v. Idus Augusti Pontificatus Nostri Anno Duodecimo.