Description
-
Grégoire IX (1227-1241)
-
Postulat scire quantitatem pecuniæ pro redemptione, & commutatione votorum subveniendæ Terræ Sanctæ in Provincia Remensi collectæ, ut de illa disponere queat. (Ex Reges. Vatic. epist. 51. an. 11.)
-
Anno 1237. die 9. Maji.
-
1237
-
GREGORIUS &c.
Venerabili Fratri a … Archiepiscopo Remen., & dilecto filio Fratri Willelmo b de Ordine Fratrum Minorum Pœnitentiario nostro Salutem, & Apostolicam Benedictionem.
Non mediocriter urget Nos negotium Terræ Sanctæ, ad cujus liberationem, quantum Nobis Dominus dederit, totis viribus aspiramus. Ceterum cum nonnulli Crucesignati propter debilitatem, & alias justo impedimento detenti velint redimere, cum non possint exequi, votum Crucis; Nos attendentes, quod de hujusmodi redemptione votorum potest personaliter illuc laborantibus congruè subveniri; mandamus, quatenus, si qui tales voluerint redimere vota sua, seu aliqua minora peregrinationis vota duxerint commutanda; redemptionem, & commutationem hujusmodi in Remensi Provincia, exceptis iis, qui existunt de dominio, vel feudo Carissimi in Christo filii Nostric‥ Illustris Regis Navarræ Comitis Campaniæ, admittentes quantitatem collectorum Nobis fideliter rescribatis; ut disponatur exinde, prout secundum Deum necessitati Terræ viderimus expedire.
Datum Viterbii vii. Idus Maji, Pontificatus Nostri Anno Undecimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXXX., p.219
-
(a) Ven. Fratri: Henrico, ut in præcedenti epistola.
-
(b) Fratri Willelmo: De quo in prædicta epistola.
-
(c) Filii nostri: Theobaldi, qui & ipse Crucem susceperat, & votum in Terræ sanctæ auxilium proficiscendi; & de quo Richardus de S. Germano ad annum 1239. habet:
Mense Auguste Rex Navarræ cum copioso Crucesignatorum exercitu de Marsilia in Terram sanctam transfretat.