Description
-
Grégoire IX (1227-1241)
-
Scribit ad sequentes Episcopos, ut de veritate miraculorum Beati Benvenuti Eugubini Ordinis Minorum inquirant. (Regest. Vatican. num. 2., & Waddingus in Annal. Minor. ad annum 1232. n. 19. nec non Raynaldus in Annal. Eccles. ad annum 1236. num. 28.)
-
Anno 1236. die 25. Martii.
-
1236
-
GREGORIUS &c.
Mirabilis Deus in Sanctis suis, ut suæ virtutis potentiam mirabiliter manifestet, & salutis nostræ causam misericorditer operetur; Fideles suos, quos semper coronat in Cœlo, in Mundo etiam frequenter honorat, ad eorum memorias signa faciens, & prodigia; per quæ pravitas confundatur hæretica; & Fides Catholica confirmetur. Nos ergo, quantas possumus, & si non quantas habemus, Omnipotenti Deo gratiarum referimus actiones; qui in diebus nostris ad confirmationem Catholicæ Fidei, & confusionem hæreticæ pravitatis evidenter innovat signa, & mirabilia potenter immutat, faciens illos coruscare miraculis, qui Fidem Catholicam tam corde, quam ore, nec non & opere tenuerunt. Sicut enim dilecti filii Clerus, & Populus Cornetanuse Nobis per dilectum filium Balsamum Diaconum, & Jacobum Judicem Nuncios suos, & litteras intimarunt; & quorumdam Episcoporumf, ac Religiosorum præsentatæ Nobis litteræ continebant; Dominus tantam piæ memoriæ Fratri Benvenutog gloriam contulit, quod sepulchrum ejus tot, & tantis dat coruscare miraculis; ut inter alios Sanctos ejus non invocari suffragia, est indignum: quare Nobis humiliter supplicarunt, ut super miraculis, quæ per eum Dominus operatur, testimonia recipi faceremus. Verum quia in tam sancto negotio non est nisi maturitate, & gravitate prævia procedendum, de discretione vestra plenam in Domino fiduciam obtinentes mandamus, quatenus adscitis vobis viris Religiosis, & Deum timentibus, de virtute morum, & veritate signorum, operibus videlicet, & miraculis diligentissimè inquirentes, depositiones Testium receptorum sub sigillis vestris servetis inclusas; ut cum a Nobis fueritis requisiti, eas ad Sedem Apostolicam fideliter transmittatis. Quod si omnes interesse non poteritis &c.
Datum Viterbii viii. Kal. Aprilis, Pontificatus Nostri Anno Decimoh.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CXCIII., p.190
-
(a) Melphiensi: Forsan Richerio, quem ab anno 1213. sedisse refert Ughellus tom. I. Ital. sac.
-
(b) Melfitensi: Ignoto etiam cit. Ughello.
-
(c) Venusino: Bono fortasse, qui temporibus illis eam sedem regebat ex cit. Ughello tom. 7.
-
(d) Episcopis: Provinciæ Apuliæ, de quibus Ughellus tom. I. & 7. Italiæ sac. nihil novit quo ad hanc rem. Ex tribus autem his Episcopis, seu Episcoporum sedibus clarum fit, de quonam Cornetano populo loquatur Pontifex: complura namque Oppida hujus nominis erant, & sunt adhuc in Italia, quorum præcipua habebantur Cornetum in Provincia Tusciæ, quod postea Episcopali dignitate ab Eugenio IV. anno 1435. ornatum fuit, & unitum Ecclesiæ Montisflasconis; &
Cornetumin Apulia jamdiu funditus eversum. -
(e) Cornetanus: Oppidum Apuliæ Dauniæ nunc
Capitanatæ, inter Trojam, & Asculum, Luceriamque, primæ tamen propinquius; cujus est mentio in binis diplomatibus Roberti Comitis Loretelli., & Cupersani ann. 1179. & 1180. pro Ecclesia Bovinen., in cujus Diœcesi forsan extabat, editis, & ab Ughello tom. 8. Ital. sac. in Bovin. Episc. n. 4. & 5. relatis. Ibi olim Fratres Minores locum habuerunt, cujus meminit Barthol. Pisanus Conform. 8. & 11. in Provincia S. Angeli, &Custodia Capitanatahis verbis: Locus Corneti; in quo jacet S. Frater Benvenutus in dicto Episcopatu canonizatus: ejusque miracula refert Conform. 8., uti & apud Marianum, & Rodulphium. Hoc tamen Oppidum tam Leandro Alberto, Ferrario, ac Baudrando, quam Martinerio locupletissimo Geographo ignotum fuit; uti nunc ipsis etiam finitimis: sed habet Ortelius in Theatro totius Mundi ex Pyrrhi Ligorii Neapolitani descriptione illarum partium. -
(f) Quorumdam Episcoporum: At quinam hi fuerint, nobis, & forsan omnibus incompertum; verisimile tamen est, finitimos fuisse, nimirum Trojanum, Bovinen., Lucerien., & Asculen.
-
(g) Fr. Benvenuto: Militi Eugubino anno 1222. a S. P. Francisco ad Ordinem recepto, annoque 1232. die 27. Junii morte sublato; cujus cultus immemorabilis nostris fere temporibus apud Sedem Apostolicam probatus est ab Innocentio XII., concessumque, ut de eo Fratres Minores, & populus illic Missam cum Officio celebrare queant die 27. Junii. De eo Waddingus in Annal. Min. ad annum 1232. n. 18. & 19. ex Rodulphio; sed Marcus Ulyssiponensis Chron. S. Francisci part. 2. lib. 1. cap. 9. nonnulla refert, quæ apud alios non habentur, exscriptaque tamen leguntur apud Act. SS. Collectores Bolland. tom. 5. Junii ad diem 27. Junii n. 8., ex quibus intelligimus, Oppidum cum Cœnobio, & Ecclesia Fratrum jam pridem funditus eversum fuisse; & Beati non nisi paucas Reliquias apud Ilicetanos Diœcesis Bovinensis extare, ac venerari.
-
(h) Refert has litteras, ut supra notavi, Raynaldus, sed, ut plerumque solet, dimidiatas.