Description
-
Grégoire IX (1227-1241)
-
Nisi Placentini Cives super Negotio Fidei, ac injuriis Episcopo, & Ecclesiasticis, Religiosisque illatis præstiterint juramentum absolute de stando mandatis Ecclesiæ, Censura Eccles. percellantur. (Ex
Vaticano RegestoPontif. epist. 539. anno 7.) -
Anno 1234. die 15. Februarii.
-
1234
-
GREGORIUS &c.
Dilecto in Christo filio G. a Subdiacono, & Cappellano nostro Salutem, & Apostolicam Benedictionem.
Devotionis tuæ litteras solita benignitate recepimus; & quæ continebantur in eis, intelleximus diligenter; solicitudinem tuam, quam in commisso tibi negotio te habere didicimus, plurimum in Domino commendantes. Ceterum sicut per easdem Nobis litteras intimasti, cum a … Potestate, & consilio Placentin.b super negotio Fidei, & excessu, ac injuriis irrogatis Ecclesiæ Romanæ in personis Venerabilis Fratris nostri …c Episcopi, & dilectorum filiorum Cleri Placentin., quondam Oberti Monachi Sancti Savinid miserabiliter interfecti, Rollandi, & aliorum Fratrum Prædicatorum, & Minorum, ac Religiosorum, & aliorum Fideliume exegeris de stando mandatis Ecclesiæ juramentum; & ipsi deliberato consilio non nisi salvo, quod propter hoc non teneantur dare, nec permittere dari obsides, asserentes hoc prohiberi per Capitulum Constituti, intelligendo per hoc, quod nulla persona de Civitate extrahatur ipsorum, nisi prius ibidem examinata de hæresi, & etiam condemnata; salvisque regimine Potestatis ejusdem, ac Societate inter ipsos, Cremonen., Papien., Terdonen. & Asten.f contracta, juramentum hujusmodi se promiserint præstituros: tu super hoc communicato quorumdam Episcoporum, & Religiosorum consilio, quia diversa invenisti consilia diversorum, in tanto negotio Nobis inconsultis procedere dubitans Nos duxisti humiliter consulendos. Cum igitur negotium Fidei, quod est tam arduum, & excellens; & injuriarum satisfactio læsis a lædentibus impendenda non de Superioris, sed ipsorum penderet judicio, si ad eorum arbitrium conditiones præcederent, vel pactiones, seu protestationes aliquæ cautionem; mandamus, quatenus nisi præfati Potestas, & Consilium præcise, pure, & absolute super prædictis, & ipsa contingentibus promissum præstiterint juramentum; tu vocatis Episcopis, & Prælatis aliis Lombardiæ in ipsos, & Civitatem eorum Censuram Ecclesiasticam non differas exercere; processum tuum per totam Lombardiam singulis diebus Dominicis & festivis faciens solemniter publicari, contradictores, si qui fuerint, vel rebelles per Censuram Ecclesiasticam appellatione postposita compescendo; Statuto Civitatis firmato juramento, seu quacumque firmitate alia non obstanteg.
Datum Laterani xv. Kalend. Martii Pontificatus Nostri Anno Septimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CXXIII., pp.121-123
-
(a) G.: Gregorio e Montelongo Gallo, postea A. S. Legato, & Patriarchæ Aquilejensi viro armis, & religione claro, de quo Ughellus tom. 5. Italiæ sacræ, & Raynaldus in Annal. Eccles.
-
(b) Placentin.: Italiæ, atque Æmiliæ urbis; ut ex reliquo epistolæ textu ducitur ad alterius Placentiæ Hispanæ discrimen; ejusque
Potestas, seu Prætor cum aliis asseclis suis anathematis jaculo confixus fuerat jussu Pontificis anno præcedenti ex Reg. Pontif. apud Raynaldum ad eum annum n. 40. -
(c) Fratris nostri: Vicedomini de Cassadochiis Placentini anno sequenti die 16. kalend. Martii defuncti ex Nicrologio Ecclesiæ Placent. apud Ughellum to. ii. Italiæ Sacræ 2. edit. Ven.
-
(d) Oberti Monachi S. Savini: Ordinis S. Benedicti Monasterii Placentini, & antiquissimi ex Annal. Benedict. Mabillonii tom.
ii.lib. 21. n. 41. ad annum 737. & tom.iii.lib. 41. n. 23. ad ann. 903:, ubi notatur Monasterium Romano Anglorum Collegio unitum fuisse, quod & Ughellus antea in Placent. Episc. tom. ii. docuerat. -
(e) Et aliorum Fidelium: De qua re nulla in Annal. Eccles. memoria facta legitur; consuli tamen potest P. M. Campus in Hist. Eccles. Placent.
-
(f) Et Asten.: Ex harum Civitatum societate manifestum fit, Pontificem loqui de Placentino Italiæ populo, & non de Hispano.
-
(g) Non obstante: Alias litteras dedit Pontifex hoc anno die 26. Augusti Episcopis Placentino, & Parmensi super pœnitentia delinquentibus hujus urbis imponenda.