Description
-
Grégoire IX (1227-1241)
-
Quæ Spoletano Episcopo conveniant circa infrascriptum Monasterium, declarat vetans, ne dictus Episcopus in Monasterium, & personas ibi existentes sine speciali Sedis Apostolicæ mandato censuras Eccles. ferre valeat. (Ex
Vaticano Regestoepist. 143. anno 1.) -
Anno 1227. die 4. Augusti.
-
1227
-
GREGORIUS &c.
Dilectis in Christo filiabus ...... Abbatissæ, & Monialibus Monasterii S. Pauli Spoletan. a Salutem, & Apostolicam Benedictionem.
Inter Venerabilem Fratrem nostrumb Episcopum Spoletan., & … Abbatissam Monasterii vestri mota olimc super ipso Monasterio quæstione, cum ‥ Abbatissa proponeret, quod ipsius institutio Monasterii, & Cappellarum suarum Abbatissæ loci ex longissimo tempore competebat; Episcopo asserente, quod auctoritatem instituendi, & confirmandi Abbatissam habebat; interdicendi Monasterium ipsum, & recipiendi censum, Procurationem, collectam, & alia, si qua vellet, ab eo secundum propriam voluntatem; & Abbatissa cum aliis in ipso Monasterio existentibus obedire tenebantur eidem. Dilecti Filii ‥ Prior, & J. Canonicus Sancti Georgii Spoletan. probationes super hoc de Apostolico mandato receptas ad examen Sedis Apostolicæ remiserunt, quas dilectus filius Alatrinus Subdiaconus & Cappellanus noster de mandato bonæ memoriæ J. Papæd Prædecessoris nostri diligenter examinans comperit Abbatissam super Institutione prædicta intentionem suam legitimè fundavisse; ac Episcopum defecisse in probatione census, Procurationum, collectarum, & aliorum, quæ recipiendi pro suo vellee se dixerat jus habere; propter quod Institutionem eamdem Auctoritate Apostolica ipsi Abbatissæ, ac succedentibus eidem adjudicans, ab impetitione præfati Episcopi super censu, procurationibus, collectis, & aliis prælibatis sententialiter absolvit eamdem; confirmatione ipsius cum auctoritate interdicendi, & Regulari obedientia, prout ei de jure communi competunt, ipsi Episcopo reservata: cujus sententiam idem Prædecessor nosterf auctoritate Apostolica confirmavit. Cum autem ad exhortationem nostram, dum adhuc essemus in minori officio constitutig, totaliter Domino vos dicantes Claustro perpetuo vos duxeritis includendash; propter quod dignum est, ut sicut Religione crevistisi, in libertate crescatisj; & multotiens sitis postmodum etiam contra prædictam sententiam molestatæ; præsentium auctoritate statuimus, ut sine speciali mandato Sedis Apostolicæ non possit Spoletanus Episcopus in Monasterium, & personas consistentes in ipso interdicti, vel excommunicationis sententiam promulgare; sed tantum annuo censu quatuor solidorum Lucensium; & Sacramentis Ecclesiasticis, quæ sibi reservanda duximus, sit contentusk. Nulli ergo omnino hominum liceat hanc paginam nostræ Constitutionis infringere &c. Si quis autem hoc attemptare præsumpserit, indignationem Omnipotentis Dei, & Beatorum Petri & Pauli Apostolorum ejus se noverit incursurum.
Datum Anagniæ ii. Nonas Augusti Pontificatus Nostri Anno Primo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°X., p.32
-
(a) S. Pauli Spoletan.: Tria Monasteria Clarissarum antiquitus extasse leguntur in Spoletina Diœcesi, S. Mariæ inter Angulos, S. Mariæ de Casis, & S. Pauli, quod valde antiquum erat, & Ordinis S. Benedicti.
-
(b) Fratrem nostrum: Benedictum, qui ab anno 1198. sedebat & paulo post vivendi finem fecit, nempe circa annum 1230. ex Ughello tom. I. Italiæ sacræ.
-
(c) Mota olim: Sub Pontificatu Innocentii
iii.quod est ante annum 1216., ut infra. -
(d) J. Papæ: Idest Innocentii Papæ iii., qui anno 1216. ex hac vita migravit.
-
(e) Pro suo velle: Nempe pro suo arbitrio, ac voluntate.
-
(f) Idem prædecessor noster: Idest Innocentius
iii. -
(g) In minori officio constituti: Quo legationis munere pro Sede Apostolica sub Honorio iii. post annum 1216. in Tuscia, & alibi fungebatur, & Ordinis Franciscani Protector erat.
-
(h) Claustro perpetuo vos duxeritis includendas: Benedictinæ nimirum Regulæ addita Card. Hugolini Episcopi Ostien. Ordinis Franciscani Protectoris Formula circa annum 1219.
Clarissisconscripta, de qua alias jam dictum est. -
(i) Religione crevistis: Ob austeriorem vivendi formam, quam Clarissarum formulam amplectendo professæ fuerant exhortatione Protectoris Ordinis Minorum Hugolini memorati: hinc in
Bullahujus Pontificis incip. Statum Monasterii vestri &c. anno 1239. die 17. Februarii edita dicunturOrdinis S. Damiani. -
(j) Libertate crescatis: Eximendo nimirum eas ab Episcopalibus censuris, ut infra.
-
(k) Biennio post Pontifex Monasterium munivit amplo privilegio incip.
Religiosam vitam eligentibus &c.die 21. Decembris; iteravitque anno 1235. die 24. Aprilis cum bonorum stabilium enumeratione, & confirmatione; quod infra suis locis publicabitur.