« bullarium-franciscanum-13 »

HONORIUS &c.

Dilectis in Christo filiabus Abbatissæ, & Monialibus Monasterii S. Mariæ de Monte Lucio a salutem, & Apostolicam Benedictionem.

Sacrosancta Romana Ecclesia devotos; & humiles filios ex assuetæ pietatis officio propensiùs diligere consuevit, & ne pravorum hominum molestiis agitentur, eos tamquam Pia Mater suæ protectionis munimine confovere. Sane cum Venerabilis Frater nosterb Ostiensis Episcopus, dum in partibus vestris Legationis officio fungeretur, a nobili viro Glotto Monaldoc Cive Perusino fundum quemdam in loco, qui Mons Lucius dicitur, in jus, & proprietatem Ecclesiæ Romanæ, prout mandaveramus eidemd, nostro nomine recepisset; & in Monasterio vestro ibi constructo quædam in vestræ religionis augmentum, & favorem vestri Ordinis duxerit statuenda; Nos vestris justis postulationibus annuentes, quod ab eodem Episcopo factum est, ratum habentes, & gratum facta obtentu Religionis vestræ ab Episcopo præfato statuta, sicut in ipsius Privilegio continetur, auctoritate Apostolica confirmamus, & præsentis scripti patrocinio communimus. Tenorem autem ejusdem Privilegii ad majorem vestram, & Monasterii memorati cautelam, præsentibus litteris de verbo ad verbum duximus inserendum, qui talis est, videlicet: Hugo e miseratione divina Ostiensis, & Velletrensis Episcopus Apostolicæ Sedis Legatus dilectis in Christo filiabus Abbatissæ Monasterii Sanctæ Mariæ de Monte Lucio in Perusinæ Civitatis suburbio constituto, ejusque Sororibus tàm præsentibus, quàm futuris religiosam vitam professis in perpetuum. Prudentibus Virginibus, quæ sub habitu Religionis accensis lampadibus per opera Sanctitatis se jugiter præparant obviam ire sponso, & cum ipso ad cœlestes nuptias introire, nostrum debemus præsidium impertiri; ne fortè cujuslibet temeritatis incursus aut eas ex proposito revocet; aut robur, quod absit, Sacræ Religionis infringat. Quapropter, dilectæ in Domino filiæ, vestris justis postulationibus grato concurrentes assensu fundum, quem dilectus filius Glottus Monaldi Nobilis Perusinus, & Civis habebat in Monte Lucio in Perusinæ Civitatis suburbio, Nobis nomine Romanæ Ecclesiæ ab eo pia liberalitate collatum, de assensu venerabilis Fratris Nostri Perusini Episcopi f in jus, & proprietatem Beati Petri, & Ecclesiæ Romanæ suscepimus: ubi Monasterium ad honorem Dei, & Virginis Gloriosæ Genitricis ejus, ut vos ibi offerretis Domino holocausta, & alias ad Divinum obsequium exemplo vestro traheretis, nomine Romanæ Ecclesiæ, quod ad ipsam nullo medio pertinet, duximus construendum. Verùm quia petiistis a Nobis, ut locum ipsum, & personas ibi Domino famulantes contra malignorum incursus protectionis Sedis Apostolicæ privilegio muniremus, Nos vestris justis precibus inclinati dictum Monasterium, quod ad Romanam Ecclesiam nullo pertinet mediante, in quo divino estis obsequio mancipatæ, cum personis, & omnibus rebus suis sub Beati Petri protectione suscipimus, & præsentis scripti privilegio communimus. In primis siquidem statuentes, ut Ordo Monasticus, qui secundum Deum, & Beati Benedicti Regulam, quam profitemini, in eodem loco institutus esse dignoscitur, perpetuis ibidem temporibus inviolabiliter observetur. Formulam nihilominus vitæ vestræ g, quam a Nobis humiliter recepistis, cum Beati Benedicti Regula perpetuis temporibus manere decernimus illibatam; locum vestrum cum omnibus pertinentiis suis, & omnia, quæ justè, & canonicè possidetis, vobis, & per vos hiis, quæ vobis canonicè successerint, confirmantes. A præstatione verò Decimarum clausuræ vestræ, & de hortorum fructibus, & pomorum vos esse decernimus auctoritate paginæ præsentis immunes. Pro hiis autem, & aliis, in quibus Ecclesia vestra lege Diœcesana forsan Perusinæ Ecclesiæ teneretur, unam libram ceræ tantum, & non aliud in festo Assumptionis Gloriosæ Virginis de Augusto Perusino Episcopo annis singulis persolvetis. Liceat quoque vobis mulieres liberas, & absolutas è sæculo fugientes ad conversionem in Ecclesia vestra recipere, & eas sine contradictione cujuslibet retinere. Prohibemus etiam, ut nulli sororum vestrarum post factam in Ecclesia vestra professionem fas sit de eodem loco discedere, seu Claustrum vestrum exire; Discedentem verò absque communium litterarum vestrarum cautione nullus audeat retinere. Nec liceat aliis personis ingredi Claustrum vestrum præter illas, de quibus licentiam habueritis specialem. Dedicationes verò Ecclesiarum vestrarum, consecrationes Altarium, & ordinationes Clericorum, qui fuerint ad Sacros Ordines promovendi, & alia Ecclesiastica Sacramenta a Diœcesano suscipietis Episcopo, si ea gratis, & sine pravitate aliqua vobis voluerit exhibere; alioquin liceat vobis, quemcumque malueritis, adire Antistitem nostrum, & communionem Apostolicæ Sedis habentem; qui vobis auctoritate Sedis Apostolicæ, quod postulatur, impendat. Obeunte verò te nunc ejusdem loci Abbatissa, vel Sororum tuarum tibi qualibet successura, nulla ibi cujuslibet subreptionis astutia, seu violentia proponatur, nisi quam Sorores communi assensu, vel sororum pars consilii sanioris, secundum Dei timorem, & Beati Benedicti Regulam providerint eligendam. Electionem quoque Romano Pontifici, vel Legato ab ejus latere destinato, aut ei, cui Pontifex Romanus injunxerit, repræsentent, a quo Electæ confirmationis, & benedictionis gratia impendatur. Correctiones insuper tam capitis, quam membrorum super omnibus, quæ in vestra Ecclesia fuerint corrigenda, soli Romano Pontifici, vel ei, quem ad hoc deputaverit, reservamus. Prohibemus igitur, ne quis Episcopus, vel quælibet alia Ecclesiastica, Secularisve persona libertates vestras infringere, aut obtentu consuetudinis, vel alio modo quidquam a vobis audeat extorquere; seù in vos, & Ecclesiam vestram interdicti, vel excommunicationis sententias proferre præsumat. Cum autem generali voce fuerit Interdictum, liceat vobis clausis januis, exclusis excommunicatis, & interdictis, non pulsatis campanis, suppressa voce, Divina Officia celebrare. Specialiter etiam inhibemus, ne usurarios, excommunicatos, hæreticos, vel de hæresi infamatos, & nominatim a Perusina Ecclesia interdictos præsumatis in vita, vel in morte quomodolibet recipere ad Divina. Nec liceat vobis sepulturam habere, nisi pro vobis, & aliis personis, quæ ad vestrum fuerint servitium deputatæ. Ad indicium autem hujus a Sede Apostolica perceptæ libertatis aureum unum h persolvetis Romano Pontifici annuatim. Decernimus ergo, ut nulli omnino hominum liceat præfatum Monasterium temerè perturbare, aut ejus possessiones auferre, ablatas retinere, minuere, seu aliquibus vexationibus fatigare, sed omnia integrè conserventur earum, pro quarum gubernatione, aut sustentatione concessa sunt, usibus omnimodis profutura, salva Sedis Apostolicæ auctoritate. Si quis igitur in futurum Ecclesiastica, Secularisve persona hanc nostræ Constitutionis paginam sciens contra eam temere venire tentaverit, secundò, tertiòve commonita, nisi reatum suum congrua satisfactione correxerit, potestatis, honorisque sui dignitate careat; reamque se se Divino Judicio existere de perpetrata iniquitate cognoscat, & a Sanctissimo Corpore, & Sanguine Dei, & Domini Nostri Jesu Christi aliena fiat; atque in extremo examine districtæ subjaceat ultioni; cunctis autem eidem loco sua jura servantibus sit pax Domini Nostri Jesu Christi; quatenus & hic fructum bonæ actionis percipiant, & apud districtum Judicem præmia æternæ pacis inveniant. Amen. Datum Perusii apud Monasterium Sancti Petri iv. Kalendas Augusti anno Domini Mccxix. Indictione vii. Pontificatus Domini Honorii Papæ Tertii Anno Quarto.

Nulli ergo omnino hominum liceat hanc paginam nostræ confirmationis infringere, vel ei ausu temerario contraire, si quis autem hoc attentare præsumpserit, indignationem Omnipotentis Dei, & Beatorum Petri, & Pauli Apostolorum ejus se noverit incursurum.

Datum Laterani viii. Kalendas Octobrisi, Pontificatus Nostri Anno Septimoj.