« bullarium-franciscanum-11 »

HONORIUS &c.

Dilectis in Christo filiabus … Abbatissæ, & Monialibus Monasterii Sanctæ Mariæ de Gattajola a Lucan. Diœc. salutem, & Apostolicam Benedictionem.

Sacrosancta Romana Ecclesia &c.b (usque) confovere. Sane cum venerabilis frater nosterc … Ostiensis Episcopus, dum in partibus vestris Legationis officio fungeretur, a Rolandino Volpelli cive Lucan. silvam quamdam, quam habebat in loco, qui Gattajola dicitur, cum omnibus pertinentiis, & ædificiis suis in jus, & proprietatem Ecclesiæ Romanæ, prout mandaveramus eidemd, nostro nomine recepisset; & in Monasterio ibi constructo quædam in vestræ Religionis augmentum, & favorem vestri Ordinis duxerit statuenda: Nos vestris justis postulationibus annuentes, quod ab eodem Episcopo factum est, ratum habentes, & gratum, facta obtentu Religionis vestræ ab Episcopo præfato statuta, sicut in ipsius privilegio continetur, auctoritate Apostolica confirmamus, & præsentis scripti patrocinio communimus. Tenorem autem ejusdem privilegii ad majorem vestram, & Monasterii memorati cautelam præsentibus litteris duximus annotandum, qui talis est: Hugo miseratione divina Ostiensis, & Velletrensis Episcopus Apostolicæ Sedis Legatus Dilectis in Christo filiabus … Abbatissæ Monasterii S. Mariæ de Gattajola Lucan. Diœc., ejusque sororibus tam præsentibus, quam futuris Religiosam vitam professis in perpetuum. Prudentibus virginibus, quæ sub habitu Religionis accensis lampadibus per opera sanctitatis jugiter se præparant obviam Sponso ire, & cum ipso ad cœlestes nuptias introire, nostrum debemus præsidium impertiri, ne forte cujuslibet temeritatis incursus vel eas a proposito revocet, aut robur, quod absit, sacræ Religionis infringat. Eapropter, dilectæ in Domino filiæ, vestris justis postulationibus grato concurrentes assensu Silvam, quam dilectus filius Rolandinus Vulpelli Lucanus Civis habebat in loco, qui dicitur Gattajola, in Diœc. Lucana cum omnibus pertinentiis, & ædificiis suis nobis nomine Romanæ Ecclesiæ ab eo pia liberalitate collatam de assensu bonæ memoriæ ‥e Lucan. Episcopi in jus, & proprietatem Beati Petri, & Ecclesiæ Romanæ suscipimus; ubi Monasterium ad honorem Dei, & Virginis Gloriosæ Genitricis ejus, ut vos offerretis ibi Domino holocaustum, & alias exemplo vestro ad divinum obsequium traheretis, duximus construendum f. Verum quia petistis a Nobis, ut locum ipsum, & personas inibi Domino famulantes contra malignorum incursus protectionis Sedis Apostolicæ privilegio muniremus; Nos vestris precibus inclinati dictum Monasterium, quod ad Romanam Ecclesiam nullo pertinet mediante, in quo divino estis obsequio mancipatæ, cum personis, & omnibus rebus suis sub Beati Petri protectione suscipimus, & præsentis scripti privilegio communimus. Formulamg nihilominus vitæ vestræ, quam a nobis humiliter recepistis cum Beati Benedicti Regula h, perpetuis temporibus manere decernimus illibatam. Locum vestrum cum omnibus pertinentiis suis, & omnia, quæ juste, & canonice possidetis, vobis, & per vos eis, quæ vobis canonice successerint, confirmantes. Apræstatione verò decimarum clausuræ vestræ, & de hortorum fructibus, & pomorum vos esse decernimus auctoritate paginæ præsentis immunes. Pro hiis autem & aliis, in quibus Ecclesia vestra lege Diœcesana forsan Lucanæ Ecclesiæ teneretur, unam libram ceræ tantum, & non aliud in festo Sancti Martini Lucano Episcopo annis singulis persolvetis; nec liceat aliis personis ingredi Claustrum vestrum præter illas, de quibus licentiam habueritis specialem. Electio quoque Abbatissæ vestræ Romano Pontifici, vel Legato ab ejus latere destinato, aut ei, cui Pontifex Romanus injunxerit, præsentetur, a quo electæ confirmationis & benedictionis gratia impendatur. Correctiones insuper tam capitis, quam membrorum super omnibus, quæ in vestra Ecclesia fuerint corrigenda; soli Romano Pontifici, vel ei, quem ad hoc ipse deputaverit, reservamus. Specialiter autem inhibemus, ne usurarios, excommunicatos, aut hæreticos, vel de hæresi infamatos, & nominatim a Lucana Ecclesia interdictos præsumatis in vita, vel in morte quomodolibet recipere ad divina; nec liceat vobis sepulturam habere nisi pro vobis, & aliis personis, quæ ad vestrum fuerint servitium deputatæ. Ad indicium autem hujus perceptæ a Sede Apostolica libertatis aureum unum persolvetis Romano Pontifici annuatim. Datum Perusii apud Monasterium S. Petri iii. Kal. Augusti anno Domini mccxix. Indictione Septima Pontificatus Domini Honorii Papæ iii. Anno Quarto. Nulli ergo omnino hominum liceat hanc paginam nostræ confirmationis infringere, vel ei ausu temerario contraire. Si quis autem hoc attentare præsumpserit, indignationem Omnipotentis Dei, ac Beatorum Petri & Pauli Apostolorum ejus se noverit incursurum. Datum Laterani xiii. Kalendas Octobris Pontificatus Nostri Anno Septimoi.