« bullarium-franciscanum-3 »

HONORIUS &c.

Dilectis in Christo filiabus ...... Abbatissæ, & Monialibus Monasterii S. Mariæ ad Sanctum Sepulcrum de Monticello a Florentinæ Diœcesis Salutem, & Apostolicam Benedictionem.

Sacrosancta Romana Ecclesia devotos, & humiles filios ex assuetæ pietatis officio propensius diligere consuevit; & ne pravorum hominum molestiis agitentur, eos tamquam pia Mater suæ protectionis munimine confovere. Sanè cum Venerabilis Frater noster H.b Ostiensis Episcopus, dum in partibus vestris Legationis officio fungeretur, ab Advengnentec Moniali Monasterii vestri, antequam se ad Religionem transferret, fundum quemdam, quem habebat in loco, qui Sanctum Sepulcrum de Monticello d dicitur, cum omnibus pertinentiis suis in jus, & proprietatem Ecclesiæ Romanæ, prout mandaveramuse eidem, nostro nomine recepisset; & in Monasterio vestro ibi constructo quædam in vestræ Religionis augmentum, & favorem vestri Ordinis duxerit statuenda. Nos vestris justis postulationibus annuentes, quod ab eodem Episcopo factum est, ratum habentes, & gratum, facta obtentu Religionis vestræ ab Episcopo præfato statuta, sicut in ipsius Privilegio continetur, auctoritate Apostolica confirmamus, & præsentis scripti patrocinio communimus. Tenorem autem ejusdem Privilegii ad majorem vestram, & Monasterii memorati cautelam præsentibus litteris de verbo ad verbum duximus inserendum, qui talis est: Hugo divina miseratione Ostiensis, & Velletrensis Episcopus Apostolicæ Sedis Legatus, Dilectis in Christo Filiabus Abbatissæ Monasterii Sanctæ Mariæ ad Sanctum Sepulcrum de Monticello Florentinæ Diœcesis Advenienti, ejusue Sororibus, tam præsentibus, quam futuris Religiosam vitam professis. Prudentibus Virginibus, quæ sub habitu Religionis accensis lampadibus per opera sanctitatis se præparant obviam ire Sponso, & cum ipso ad cœlestes nuptias introire, nostrum debemus præsidium impertiri; ne fortè cujuslibet temeritatis incursus, aut a pio proposito revocet; aut, quod absit, robur sacræ Religionis infringat. Ea propter, dilecta in Domino filia Advengnente, tuis justis postulationibus grato concurrentes affectu, fundum, quem habebas ad Sanctum Sepulcrum in Monticello in Diœcesi Florentina, cum omnibus ædificiis, & pertinentiis suis nobis nomine Ecclesiæ Romanæ a te pia liberalitate collatum, in quo Monasterium ad honorem Dei, & Virginis Gloriosæ Genitricis ejusdem desideras dedicare; ut te ipsam ibi Domino offeras holocaustum, & alias exemplo tuo ad divinum obsequium provoces; in jus, & proprietatem Beati Petri, & Ecclesiæ Romanæ suscepimus; verùm quia petisti a Nobis, ut locum ipsum, & personas ibi Domino famulantes contra malignorum incursus protectionis Sedis Apostolicæ privilegio muniremus; Nos tuis justis precibus inclinati dictum Monasterium Virginis Gloriosæ, quod ad Romanam Ecclesiam nullo pertinet mediante, in quo divino estis obsequio mancipatæ, cum personis, & omnibus rebus suis sub Beati Petri protectione suscipimus, & præsentis scripti Privilegio communimus. In primis siquidem statuentes ut Ordo Monasticus, qui secundum Dominum, & Beati Benedicti Regulam, quam profitemini, in eodem loco institutus esse dignoscitur, perpetuis ibidem temporibus inviolabiliter observetur. Observantias nihilominùs Regulares, quas juxta Ordinem Dominarum Sanctæ Mariæ de Sancto Damiano de Assisio f præter generalem Beati Benedicti Regulam vobis voluntarie indixistis, ratas habemus; & eas perpetuis temporibus manere decernimus illibatas g. Præterea locum vestrum, & ea, quæ in ipsius circuitu justè, ac canonicè possidetis, vobis, & per vos eis, quæ vobis canonicè successerint, confirmamus. Ad præstationem verò decimarum clausuræ vestræ, & de Hortorum fructibus vos esse decernimus authoritate paginæ præsentis immunes. Pro his autem, & aliis, in quibus Ecclesia vestra lege Diœcesana forsan Florentinæ Ecclesiæ teneretur, unam libram ceræ tantum, & non aliud in Festo Sancti Zenobii Florentinæ Ecclesiæ annis singulis persolvetis. Liceat quoque vobis mulieres liberas, & absolutas è sæculo fugientes ad conversationem in Ecclesia vestra recipere, & eas sine contradictione cujuslibet retinere. Prohibemus etiam, ut nulli sororum vestrarum post factam in Ecclesia vestra Professionem fas sit de eodem loco discedere, seu claustrum vestrum exire; discedentem verò absque communium literarum vestrarum cautione nullus audeat retinere. Aliisque personis nequaquam liceat ingredi Claustrum vestrum, nisi eis, de quibus licentiam habueritis specialem. Dedicationes verò vestrarum Ecclesiarum, Consecrationes Altarium, Ordinationes Clericorum, qui ad Sacros Ordines fuerint promovendi, a Diœcesano suscipietis Episcopo, si eas gratis, & sine pravitate aliqua vobis voluerit exhibere. Alioquin liceat vobis, quemcumque malueritis adire Antistitem, gratiam, & communionem Apostolicæ Sedis habentem, qui vobis auctoritate Sedis Apostolicæ, quod postulastis, impendat. Sacerdos siquidem annuus, ut perpetuus in Ecclesia vestra cum conscientia Diœcesani Episcopi assumatur, & Sacerdotis ejusdem correctionem canonicam Florentino Episcopo reservamus. Obeunte vero te nunc ejusdem loci Abbatissa, aut tuarum sororum tibi qualibet successura, nulla ibi cujuslibet subreptionis astutia, seù violentia præponatur; nisi quam sorores communi consensu, aut sororum pars consilii sanioris secundum Dei timorem, & Beati Benedicti Regulam providerint eligendam. Electionem quoque Romano Pontifici, aut Legato ab ejusdem Latere destinato, aut ei, cui Pontifex Romanus injunxerit, repræsentent, a quo electæ confirmationis, & benedictionis gratia impendatur. Correctiones insuper tam capitis, quam membrorum super omnibus, quæ in Ecclesia vestra fuerint corrigenda, soli Romano Pontifici, aut ei, quem ipse ad hoc deputaverit, reservamus. Prohibemus igitur, ne quis Episcopus, aut quælibet alia Ecclesiastica, Secularisve Persona libertates vestras infringere, aut obtentu cujuslibet consuetudinis, aut alio modo quicquam a vobis audeat extorquere: seù in vos, & Ecclesiam vestram interdicti, & excommunicationis sententias promulgare præsumat. Cum autem generale interdictum Terræ fuerit, liceat vobis, clausis januis, exclusis excommunicatis, & interdictis, non pulsatis campanis, suppressa voce divina officia celebrare: specialiter inhibentes, ne usurarios, & excommunicatos, & hæreticos, vel de hæresi infamatos, & nominatim a Florentina Ecclesia interdictos præsumatis in vita, vel in morte quomodolibet recipere ad divina. Nec vobis liceat sepulturam habere, nisi pro vobis, & personis aliis, quæ ad vestrum fuerint servitium deputatæ. Ad indicium autem hujus a Sede Apostolica perceptæ libertatis aureum unum h persolvetis Romano Pontifici annuatim. Decernimus ergo, ut nulli omninò hominum liceat præfatum Monasterium temerè perturbare, aut ejus possessiones auferre, ablatas retinere, minuere, seu aliquibus molestationibus fatigare: sed omnia integrè serventur eis, pro quarum gubernatione, aut substentatione concessa sunt, usibus omnimodis profutura; salva Sedis Apostolicæ auctoritate. Si qua igitur in futurum Ecclesiastica, Secularisve Persona hanc nostræ Constitutionis paginam scienter contra eam temerè venire tentaverit, secundo, tertiove commonita, nisi reatum suum congrua satisfactione correxerit, potestatis, honorisve sui dignitate careat, & a Sanctissimo Corpore, & Sanguine Dei, & Domini Nostri Jesu Christi aliena fiat, atque in extremo examine districtæ ultioni subjaceat. Cunctis autem eidem loco sua jura servantibus sit pax Domini Nostri Jesu Christi, quatenùs & hic fructum benedictionis percipiant, & apud districtum Judicem præmia æternæ pacis inveniant; Amen. Datum Perusii apud Monasterium Sancti Petri vi. Kalendas Augusti, Anno Domini millesimo ducentesimo nonodecimo, Indictione septima, Pontificatus Domini Honorii Papæ Tertii anno Quarto. Nulli ergo omnino hominum liceat hanc paginam nostræ Confirmationis infringere, vel ei ausu temerario contraire. Si quis autem hoc attentare præsumpserit, indignationem Omnipotentis Dei, & Beatorum Petri, & Pauli Apostolorum ejus se noverit incursurum.

Datum Viterbii V. Idus Decembris; Pontificatus Nostri Anno Quartoi.