« bullarium-franciscanum-4897 »

Venerabili fratri episcopo et dilectis filiis capitulo Trecoren.

Laudabilis et longaevae observationis exemplo imitatione digno decrevit antiquitas, dies, quibus primum sanctorum corpora de ipsorum tumulis transferuntur, festivitate celebri venerandos, ut iuxta sacrae paginae veritatem de loco suo laudibus pullulent ossa sanctorum et, sicuti in tempore suo tritici acervus infertur, sic sancti post congesta opera recolenda sepulcrum in abundantia gratiae comperiantur ingredi, dum post praesentis vitae pressuras praemia patriae caelestis inveniunt et non solum eorum spiritus in caritate veri luminis et secreto aeternae gloriae occultantur, horreum quasi conservationis ingressi, sed et eorum corpora licet adhuc terrea de humilitatis tumulo ad venerationis cumulum eriguntur. Profecto translationem huiusmodi mystice praefigurasse videtur ille « accrescens et decorus aspectu », qui de hoc saeculo transiturus fratres adiurans ad promissionis locum ex Aegypto sua petiit ossa transferri. Nos igitur novi sancti sanctorum noviter aggregati collegio et signorum insignium praeclari congerie, beati videlicet Ivonis confessoris, olim Trecoren. dioecesis presbyteri, translationem volentes solemniter celebrari, auctoritate apostolica praesentium tenore concedimus, ut corpus confessoris eiusdem, congrua temporis opportunitate captata, convocatis clero et populo Trecoren., cum debita solemnitate ac honorificentia digna ad locum transferatur idoneum, diem translationis huius, quem perpetuis temporibus celebrandum fore decernimus, festivis solemniis celebrantes. Ut autem eo plenius ad solemnitatem huiusmodi fideles Christi conveniant, quo ibidem meritis dicti sancti uberioris retributionis gratiam se conspexerint praemiari, nos de omnipotentis Dei misericordia et sanctorum Petri et Paoli apostolorum eius auctoritate confisi, omnibus vere poenitentibus et confessis, qui causa devotionis ad eiusdem sancti corpus die, quo transfertur, accesserint, septem annos et septem quadragenas, iis vero, qui ex tunc annuatim in die translationis eiusdem, unum annum et unam quadragenam, et his etiam, qui in octavis et per octavas dierum huiusmodi ecclesiam ipsam devote duxerint visitandam, centum dies, videlicet singulis translationis et octavarum ipsarum diebus, quibus ecclesiam ipsam visitaverint, ut praefertur, misericorditer relaxamus. Datum Avinione, IV idus maii, anno septimo.