« bullarium-franciscanum-4696 »

Dilectis filiis ‥ ministro provinciali provinciae Pennen. ac ‥ guardiano et fratribus ord. Min. de Montorio Aprutin. dioec.

Inter ceteros ordines in agro plantatos ecclesiae ordinem vestrum gerentes in visceribus caritatis ad ea vigilanter intendimus ac opem et operam benignius impertimur, per quae dictus ordo sublatis impedimentis quibuslibet ad divini nominis laudem et gloriam prosperis successibus affluat et votivis proficiat incrementis. Sane petitio vestra nobis exhibita continebat, quod locus, quem vos, filii guardiane et fratres, in contrata Montorii Aprutin. dioec. obtinetis, in quadam valle iuxta quoddam flumen, quod vocatur Gomanum, ab olim fundatus extitit et quod propter eiusdem fluminis ripas et ipsius aquae interdum excrescentis impetum nonnullae eiusdem loci fabricae ripis praedictis contiguae apertae fore noscantur et de ipsius loci destructione et ruina verisimiliter formidatur, et etiam propter malorum hominum multitudinem et illius terrae inimicorum vos, filii guardiane et fratres, aliquando in tanto fuistis periculo et timore, quod de dicto loco omnes res bonas et utiles extraxistis et ad quoddam vicinum castrum portari fecistis quodque in eodem loco divinum officium celebrare et gratias ut decet Christo reddere nequivistis et modo etiam gratias ipsas reddere ac ibidem cum salute et absque periculo remanere diutius non potestis. Quare nobis humiliter supplicastis, ut vobis, quod praefatum locum infra castrum Montorii dictae dioecesis eidem loco propinquum, in loco decenti et honesto, mutare possitis, licentiam impertiri de benignitate apostolica dignaremur. Nos itaque vestris in hac parte supplicationibus inclinati, ut locum praedictum infra dictum castrum Montorii, in loco decenti et honesto, sine parochialis ecclesiae et alterius iuris alieni praeiudicio, mutare libere valeatis, fel. rec. Bonifatii papae VIII praedecessoris nostri super hoc in contrarium edita et aliis quibuscumque contrariis constitutionibus nequaquam obstantibus, vobis plenam et liberam auctoritate praesentium licentiam elargimur: proviso, quod ecclesia et coemeterium dicti prioris loci ad clericos alios seu laicos sicut hereditas minime transferatur, sed in dicta ecclesia unus presbyter pro divinis inibi celebrandis officiis deputetur. Nulli ergo etc. Datum apud Villamnovam Avinionensis dioec. II kal. martii anno tertio.