« bullarium-franciscanum-4597 »

Dilecto filio Bonaventurae Benevenuti de Fabriano electo Maranen.

Pastoralis officii debitum etc. Nuper siquidem ecclesia Maranen. ex eo pastoris regimine destituta, quod nos venerabilem fratrem nostrum Vincentiuma Pacten. olim Maranen. episcopum, apud sedem apostolicam constitutum, a vinculo, quo tenebatur eidem Maranen. ecclesiae, cui tunc praeerat, de fratrum nostrorum consilio et apostolicae potestatis plenitudine absolventes, ipsum ad Pacten. ecclesiam tunc vacantem duximus transferendum, praeficiendo eum ipsi Pacten. ecclesiae in episcopum et pastorem: nos volentes eidem Maranen. ecclesiae, ne dispendia longa vacationis incurreret, paterna sollicitudine praecavere, cum nullus praeter nos hac vice de ordinatione ipsius ecclesiae Maranen. se intromittere potuerit etc., post deliberationem, quam de praeficiendo eidem Maranen. ecclesiae personam utilem et fructuosam habuimus cum nostris fratribus diligentem, demum ad te ordinis fratrum Minorum professorem et in sacerdotio constitutum, cui de religionis zelo, litterarum scientia, honestate morum ac vitae aliisque virtutum meritis apud nos laudabilia testimonia perhibentur, direximus oculos nostrae mentis. Quibus omnibus debita meditatione pensatis de persona tua ipsi Maranen. ecclesiae ... providemus teque illi praeficimus in episcopum et pastorem, curam et administrationem ipsius tam in spiritualibus quam in temporalibus tibi plenarie committendo etc. Datum Avinione V idus iunii anno secundo.

In e. m. capitulo et vassallis ecclesiae Maranen., clero ac populo civ. et dioec. Maranen., archiepiscopo Ianuen.