« bullarium-franciscanum-4482 »

Dilectis filiis Nicolao Boneti sacrae theologiae professori, Nicolao de Molano, Ioanni de Florentia et Gregorio de Hungaria ordinis fratrum Minorum.

Votis zelantes ferventibus in terris Tartarorum et aliis circumpositis regionibus Orientis, in quibus multorum hominum corda sic benedictus Dominus, a quo manant omnium charismata gratiarum, illustrare dignatus est, quod fugatis errorum tenebris in eorum mentibus verae fidei catholicae lumen lucet, corroborari et dilatari fidem ipsam, sine qua non est alicui gratia neque salus; et attendentes, quod divina clementia vobis thesaurum scientiae contulit vosque multis virtutibus edotavit, ita quod potestis proficere vobis per vitae meritum et aliis per doctrinam: vos ad terras et partes easdem propterea providimus destinandos, firma spe repromissa de vobis fiduciaque concepta, quod, cum zelum habere vos asseratis ad praemissa fervidum, per vestrum et aliorum catholicorum tam religiosorum quam ceterorum ecclesiasticorum virorum ministerium, terris et partibus supradictis vomere sanctae praedicationis excultis et imbre divinae gratiae irrigatis iactoque in eis per manum coelestis agricolae salutifero semine verbi Dei, fructiferam producent segetem, ex qua tandem multiplicata messis in horrea Dominica inferetur. Quocirca discretionem vestram monemus et hortamur in Domino vobisque in remissionem peccaminum districtius iniungimus et mandamus, quatenus vos cum divino auxilio ad terras et partes conferentes praedictas tamquam fideles ministri tam per praedicationem verbi Dei quam alia virtuosa et exemplaria opera, sicut vobis Dominus ministrabit, corroborare in fide orthodoxa credentes et non credentes ad eam attrahere ac inducere in luce sermonis et rectitudine operis taliter studeatis, quod demum commissa vobis talenta cum multiplicato fructu possitis reddere Domino et tamquam servi fideles in retributione iustorum mereamini super multa constitui et intrare in gaudium cum gloria talibus repromissum.

Ut autem ministerium huiusmodi eo plenius, utilius et fructuosius valeatis implere, quo maiori fueritis auctoritate suffulti, proponendi ubi, quando, quoties ac quibus in eisdem partibus pro eiusdem corroboratione et dilatatione fidei expediens videritis, verbum Dei et constitutis ibidem (non obstante, si aliqui maiori excommunicatione ligati fuerint) in verbo, officio et cibo aliisque honestis et licitis communicandi secure in ipsis partibus, nec non illos, qui sedis apostolicae magisterio non intendunt, quos converti ad unitatem eiusdem fidei cupimus, ad eam recipiendi, baptizandi et ovili fidelium aggregandi (ut per regenerationis gratiam de longinquo ad suum revertentes auctorem liberi efficiantur ex servis, de extraneis provehantur in filios, ex corruptibili carne nati Dei spiritu renascantur et obtineant per gratiam, quod non obtinent per naturam); rursus et in locis partium praedictarum, in quibus vos hospitari vel residentiam facere continget, missas et divina officia (servata tamen honestate debita) celebrandi ac ibidem fidelium confessiones audiendi et iniungendi eisdem poenitentias salutares, in ecclesiarum quoque partium praedictarum dedicationibus et sanctorum, quorum altaria in ecclesiis ipsis fuerint, festivitatibus seu, cum vos continget proponere in supradictis partibus verbum Dei (absentibus tamen patriarchis, archiepiscopis et episcopis), omnibus fidelibus tunc ibidem praesentibus, vere poenitentibus et confessis, quadraginta dies de iniunctis eis poenitentiis misericorditer relaxandi vobis et aliis ordinis vestri fratribus in sacerdotio constitutis, qui vobiscum proficiscentur ad partes praedictas, ac vestrum et ipsorum singulis plenam concedimus tenore praesentium facultatem.

Praeterea volumus et concedimus, quod fratres eiusdem ordinis proficiscentes una vobiscum ad partes easdem vel morantes ibidem, qui fuerint ad omnes vel ad aliquos ordines promovendi, a quibusvis patriarchis, archiepiscopis et episcopis catholicis gratiam et communionem apostolicae sedis obtinentibus possint, rite tamen, ad huiusmodi ordines statutis a iure temporibus promoveri et alia ecclesiastica recipere sacramenta. Et ut fructum uberem de vestris laboribus reportetis et sentiatis ex eis aeternae salutis vobis commoda uberius proventura, de omnipotentis Dei misericordia et beatorum Petri et Pauli apostolorum auctoritate confisi, vobis et dictis fratribus vobiscum ad dictas partes proficiscentibus, ut praefertur, et vestrum singulis, vere poenitentibus et confessis, illam indulgentiam praesentium auctoritate concedimus, quam proficiscentibus in Terrae sanctae subsidium sedes praedicta concedere consuevit. Ac nihilominus, ut Christi fideles quasi per praemia salubriter invitemus ad merita, omnibus vere poenitentibus et confessis, qui ecclesias et loca ecclesiastica fidelium partium earumdem inibi constructa vel imposterum construenda causa devotionis visitaverint vel fabricis ecclesiarum et locorum ipsorum aut ministris et servitoribus fidelibus eorum caritativa duxerint subsidia eroganda, singulis diebus, quibus id vere poenitentes et confessi fecerint, centum dies de iniunctis eis poenitentiis misericorditer relaxamus. Et quia vos et fratres alii ad partes praedictas pro ampliatione fidei orthodoxae proficiscentes vobiscum in eundo, morando et redeundo fidelium caritativo noscimini subsidio et securo conductu egere, omnibus vere poenitentibus et confessis, qui vobis prosecutioni tam pii operis instantibus subsidium et securum conductum gratis praestiterint et circa hoc auxilium et consilium impenderint opportunum, iuxta quantitatem subsidii et devotionis affectum illius indulgentiae, quae vobis et eisdem fratribus ad dictas partes accedentibus est concessa, participationem concedimus, ut eis proficiat ad salutem.

Vobis insuper et cuilibet vestrum auctoritate apostolica concedimus, ut in civitatibus, castris vel villis seu locis quibuscumque ad habitandum domos et loca quaecumque pro fratribus ordinis vestri de novo recipere seu hactenus recepta mutare vel ea permutationis, donationis aut cuiusvis alterius alienationis titulo in alios transferre, dummodo de his, quae ex causa permutationis aut cuiusvis alterius alienationis praedictae titulo vos contingeret forte recipere, in acquisitione, constructione vel ampliatione locorum aliorum Deo dicatorum utilius in eisdem partibus expendantur et loca semel Deo dicata profanis usibus nullatenus applicentur, in permutatione et donatione huiusmodi locorum dioecesanorum petita nihilominus licentia et obtenta, de nostra et dictae sedis speciali licentia (constitutionibus fel. rec. Bonifatii papae VIII praedecessoris nostri et aliorum pontificum Romanorum praedecessorum nostrorum in contrarium editis, etiamsi de illis plenam et expressam ac de verbo ad verbum in praesentibus oporteat fieri mentionem, nequaquam obstantibus) valeatis, dummodo loca seu domus huiusmodi, quas recipietis de novo in civitatibus, castris vel villis partium earumdem, in quibus domus seu loca aliorum ordinum Mendicantium extiterint, a praedictis domibus seu locis per spatium triginta cannarum mensurandarum per aerem, ubi alias mensurari loci disposito non permitteret, distare noscantur. Praesentibus usque ad decennium tantummodo valituris. Datum Avinione, II kal. novembris, anno quarto.a