« bullarium-franciscanum-4294 »

Venerabili fratri Ugolino episcopo Perusino.

Publicae utilitatis interesse noscitur, ne crimina remaneant impunita, iurisque favor concedit innocentes absolvi, cum debita indago praeambula patefacit innocentiam eorundem. Sane dudum fama seu infamia potius publica referente perlato ad nostri apostolatus auditum, quod, licet nos antea contra Michaelem de Caesena olim fratrem ordinis Minorum generalem ministrum certum processum habuerimus, per quem ipsum suis gravibus culpis et excessibus detestandis exigentibus excommunicationis sententia innodavimus et etiam declaravimus innodatum ipsumque officio ministeriatus dicti ordinis privavimus et ad gradus, honores et status ac beneficia quaecumque ecclesiastica obtinenda reddidimus inhabilem et indignum, dictumque processum et contenta in eo fecerimus tam in illis quam diversis aliis partibus, ne fratres eiusdem ordinis aliique fideles per astutias, fraudes et calliditates dicti Michaelis eiusque complicum et sequacium circumveniri valerent quomodolibet, publicari ac moneri ministros, custodes, gardianos aliosque fratres ipsius ordinis sub excommunicationis in personas ac interdicti in ecclesias et loca ipsorum nec non depositionis ab officiis et inhabilitationis ad quoscumque honores, dignitates, gradus et status ecclesiasticos poenis et sententiis, quas (non obstantibus quibuscumque privilegiis apostolicis sibi vel eidem ordini suo sub quacumque forma vel expressione verborum concessis, quae quo ad hoc nulli voluimus suffragari eorum, qui contra monitionem huiusmodi aliquid attemptare praesumerent) incurrere voluimus ipso facto, ut nulli dictum Michaelem excommunicatum et depositum ac inhabilem ad honores, gradus, dignitates et status ecclesiasticos redditum, ut praefertur, haberent, reputarent seu tenerent pro ministro nec eidem parerent aut praestarent per se vel alium, publice vel occulte, super hiis auxilium, consilium aut favorem, sed tam ipsum quam dictos complices velut excommunicatos de haeresis et scismatis suspectos criminibus potius evitarent: quia tamen Humilis custos fratrum eiusdem ordinis in provincia sancti Francisci, ad illicita et inconsulta dilapsus, tam in capitulo suo dudum celebrato Perusii quam in locis aliis diversis, multa contra tenorem processus et monitionis praedictorum (adhaerendo dicto Michaeli ac in ipsius suorumque complicum et rebellium, haereticorum ac scismaticorum commendationem et favorem diffamationemque ac detractionem processus praedicti et contentorum in ipso) dixisse, procurasse ac fecisse non sine suspicione vehementi haeresis et scismatis criminum ferebatur, nos tibi tunc abbati monasterii s. Petri Perusini et bonae memoriae Francisco episcopo Perusino, proximo praedecessori tuo, eius et tuo propriis nominibus non expressis, per apostolica scripta commisimus et mandavimus, ut super praemissis et ea tangentibus (summarie, simpliciter et de plano, et sine strepitu ac figura iudicii) veritatem diligentius inquirentes praefatum Humilem, si eum reperiretis culpabilem in hac parte, excommunicationis, depositionis et inhabilitationis poenas declararetis incurrisse praedictas ipsumque alias iuxta sanctiones canonicas (etiam ad degradationem, si hoc delicti qualitas exigeret, procedendo) taliter corrigere ac punire non obstantibus supradictis omnibus studeretis, quod talia vel similia ex tunc minime attemptaret, aliisque ipsius exemplo perterritis merito praecluderetur aditus in similibus delinquendi, prout in nostris litteris inde confectis plenius continetur.

Nuper autem, sicut nobis expositum extitit ex parte Humilis praelibati, tu et idem praedecessor in huiusmodi negotio usque ad diffinitionis calculum processistis, dictoque praedecessore deinde sublato de medio tu a nobis fuisti promotus in episcopum Perusinum. Volentes igitur, ut praedicto negotio finis debitus imponatur, porrectis nobis super hoc pro parte ipsius Humilis piis supplicationibus inclinati, fraternitati tuae per apostolica scripta committimus et mandamus, quatenus, si praemissa nobis taliter exposita repereris ita esse, tuo et ipsius praedecessoris in dicto negotio habito legittime servato processu, contra praefatum Humilem, si eum super praedictis nobis de ipso perlatis culpabilem inveneris, sententialiter procedas iuxta praedictarum tibi et eidem praedecessori super hoc directarum continentiam litterarum; alioquin eundem Humilem per diffinitivam sententiam auctoritate nostra cures ab illis absolvere, prout iustitia exegerit et videris rationabiliter expedire, ac sententiam, sive condempnatoriam seu absolutoriam, quam super his a te fieri contigerit, studeas auctoritate praedicta executioni debitae demandare: contradictores per censuram ecclesiasticam appellatione postposita compescendo, non obstante, si aliquibus communiter vel divisim a sede apostolica sit indultum, quod excommunicari, suspendi vel interdici non possint per litteras apostolicas non facientes plenam et expressam ac de verbo ad verbum de indulto huiusmodi mentionem. Datum Avinione, III nonas septembris, anno sextodecimo.