Description
-
Jean XXII (1316-1334)
-
Conradum Minoritam prov. Alamanniae de haeresi condemnatum signis verae poenitentiae praeviis suo ordini restitui iubet.1
-
1330, novembris 23, Avinione.
-
1330
-
Episcopo Parisiensi et inquisitori haereticae pravitatis in regno Franciae auctoritate apostolica deputato.
Pridem intelleximus, quod vos contra Conradum de provincia Alamanniae ordinis fratrum Minorum, qui diabolico exagitatus spiritu in diversas praesertim dampnatas per constitutiones nostras haereses inciderat, in eis diutius pertinaciter persistendo, secundum sanctiones canonicas et privilegia officio inquisitionis haereticae pravitatis concessa exigente iustitia provide procedentes eundem Conradum tandem coram vobis haereses supradictas confessum ad perpetuum carcerem, ut ibidem commissa defleret et ea ulterius non committeret, sententialiter condempnastis, certis sibi poenitentiis aliis impositis vobisque ac vestris in officio praedicto successoribus commutandi seu mitigandi poenitentias sive poenas huiusmodi vel ipsum ab eis absolvendi penitus nichilominus potestate retenta. Nos autem illius, cuius vices in terris licet insufficientibus meritis gerimus cuique proprium est misereri semper et parcere, quantum possumus inhaerendo vestigiis, volentes agere in hac parte misericorditer cum eodem, discretioni vestrae per apostolica scripta mandamus, quatinus, si dictus Conradus signa verae correctionis et poenitentiae manifeste praetenderit et praetendat, ipsum suo assignetis ordini, prius tamen ei poenitentia, de qua discretioni vestrae videbitur, imposita et iniuncta: inde facientes instrumentum confici publicum praesentium seriem continens, illud nobis postmodum fideliter transmissuri. Quod si te, fili inquisitor, abesse forsan contigeret, volumus, frater episcope, quod tu praemissa solus exequi valeas et complere. Datum [Avinione,] IX kalendas decembris, anno quintodecimo.a
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°884., p.484
-
Reg. Vat. t. 116, f. 4, ep. 17; cfr. supra n. 857 et infra n. 885.
1 -
(a) Aliis litteris eodem die datis summus pontifex episcopo Parisiensi haec scribit: « Quae circa publicationem litterarum uostrarum super conversione dilecti filii Petri de Corvario ord. fr. Min. tibi directarum velut zelator honoris sanctae Dei ecclesiae fideique catholicae solemniter egeris, audivimus noviter, super quibus Deo utique et sedi apostolicae gratis et acceptis admodum tuam providentiam multipliciter commendamus. — Super mitigatione autem poenarum et poenitentiarum contentarum in sententia per te et dilectum filium inquisitorem haer. prav. in regno Franciae auctoritate apostolica deputatum contra Conradum de provincia Alamanniae dicti ordinis promulgata litteras nostras alias patentes tibi et eidem inquisitori dirigimus, sicut in eis tua circumspectio plenius poterit intueri. Ad quarum executionem te praefatumque inquisitorem, si praesens fuerit, alias te solum procedere volumus iuxta continentiam earundem. Datum IX kal. decembris, anno quintodecimo ».