Description
-
Jean XXII (1316-1334)
-
Committit episcopo Vratislavien., quod dispenset cum Anna de Fürstenberg sorore monasterii Strehlensis ord. s. Clarae, ut non obstante defectu aetatis possit eligi in ipsius mon. abbatissam.1
-
1327, novembris 21, Avinione.
-
1327
-
Venerabili fratri episcopo Vratislaviensi.
Oblatae nobis pro parte dilectarum in Christo filiarum sororum monasterii Strelinensisa ordinis sanctae Clarae tuae dioecesis petitionis series continebat, quod monasterium ipsum nunc abbatissae regimine destitutum per nonnullos illarum partium nobiles et potentes diversis et gravibus gravatur offensis, molestatur iniuriis et opprimitur violentiis et rapinis, quodque ipsae diligentius intendentes, quod dilecta in Christo filia Anna de Vorstenbergb, soror dicti monasterii ordinem ipsum expresse professa, pro eo quod est de nobilibus orta natabilibus et non solum fratres sed et nonnullos alios in illis partibus eidem monasterio contiguis et vicinis habet consanguineos nobiles et potentes, quorum ope, consilio et favore dictum monasterium posset a praedictis oppressionibus et iniuriis liberari, et quod alias dicta Anna utpote religionis observantia, maturitate morum et aliis virtutibus redimita, provida et etiam circumspecta, regimini dicti monasterii esset plurimum opportuna, desiderant eam in suam et dicti monasterii eligere abbatissam. Sed quia dicta Anna defectum patitur in aetate, cum nondum eiusdem aetatis tricesimum annum compleverit, licet in vicesimo sexto eiusdem aetatis anno constituta existat, illam eligere nequeunt dispensatione super hoc apostolica non obtenta. Quare pro parte ipsarum fuit nobis humiliter supplicatum, ut propter evidentem utilitatem et urgentem necessitatem dicti monasterii cum eadem Anna, quod defectu praedicto nequaquam obstante licite possit in abbatissam dicti monasterii eligi et assumi, dispensare misericorditer curaremus. De tuae igitur circumspectionis industria plenam in Domino fiduciam obtinentes, fraternitati tuae per apostolica scripta committimus et mandamus, quatenus, si diligenter attenta quo ad illa, quae officium abbatissae respiciunt, sufficientia eiusdem Annae probabiliter reperias, promotionem ipsius esse dicto monasterio profuturam, cum ea, quod praedicto aetatis defectu nequaquam obstante possit in abbatissam dicti monasterii eligi vel assumi quacumque constitutione contraria non obstante, auctoritate apostolica studeas dispensare. Datum Avinione, XI kalendas decembris, anno duodecimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°690., p.336
-
Reg. Vat. t. 86, f. 22, ep. 1062.
1 -
(a) Strehlen in Silesia. Ibi quoque erat locus fr. Min. pertinens ad custodiam Vratislav. prov. Saxoniae. Cfr. supra p. 17, not. 4.
-
(b) Sive: Fürstenberg.