« bullarium-franciscanum-3709 »

Dilecto filio Gerardo electo Bruniaten.

Rationis oculis intuentes etc. Sane dudum ecclesia Bruniaten.a per obitum bonae memoriae Iacobi Bruniaten. episcopi solatio destituta pastoris, Franciscus filius quondam Ioannis Alegrini, presbyter Bruniaten., cum omnes eiusdem ecclesiae canonici tunc ab eadem ecclesia absentes essent nec ibidem sine personarum suarum periculis tute residere valerent, falso asserens se fore ecclesiae praedictae canonicum, cum non esset, et ad eum ea vice ius eligendi episcopum pertinere, rectorem ecclesiae de Coczana Bruniaten. dioecesis de facto, cum de iure non posset, in episcopum Bruniaten. elegit, et tam Franciscus quam rector praedicti electionem huiusmodi, cui idem rector suum consensum praebuisse infra tempus debitum praetendebat, petierunt a venerabili fratre nostro archiepiscopo Ianuen., loci metropolitano, auctoritate metropolitica confirmari, idemque archiepiscopus, ipsius electionis discusso negotio, electionem ipsam tamquam attentatam ab illo, ad quem electio eadem de iure minime pertinebat, decrevit irritam et inanem iustitia suadente. Deinde vero dilecti filii capitulum ipsius ecclesiae dilectum filium Bernardum abbatem monasterii sancti Siri Ianuen. ordinis sancti Benedicti, tunc in Romana curia existentem, in Bruniaten. episcopum concorditer elegerunt, dictusque abbas, huiusmodi electionis per procuratorem dictorum capituli in dicta curia sibi praesentato decreto, eidem electioni renuit consentire, dictique capitulum postmodum te, ordinem fratrum Minorum expresse professum et in sacerdotio constitutum, in eorum et dictae ecclesiae Bruniaten. episcopum et pastorem concorditer elegerunt. Demum tu certis ex causis omne ius, si quod tibi ex huiusmodi electione fuerat acquisitum, resignasti libere in manibus venerabilis fratris nostri Nicolai episcopi Ostien., de mandato nostro vivae vocis oraculo sibi facto resignationem huiusmodi admittentis.

Nos autem de ordinatione praedictae ecclesiae sollicite cogitantes ac pensantes virtutum merita, quibus personam tuam virtutum Dominus multipliciter decoravit, post vigilem, quam circa provisionem dictae ecclesiae faciendam habuimus diligentiam, ad te nostrae mentis oculos duximus convertendos, teque, cui litterarum scientia, vitae munditia, morum honestas, prudentia spiritualium et temporalium providentia suffragantur, de fratrum nostrorum consilio et apostolicae plenitudine potestatis eidem ecclesiae praeficimus in episcopum et pastorem, curam et administrationem ipsius tibi tam in spiritualibus quam temporalibus plenarie committendo etc. Datum Avinione, XVII kalendas februarii, anno quinto.