« bullarium-franciscanum-3607 »

Dilectis filiis Peregrino Oppolien.a Praedicatorum, et Nicolao Hyspodinet de Cracovia Minorum ordinum fratribus.

Prae cunctis mentis nostrae desiderabilibus tota mente optantes fidei catholicae incrementa et eam a malignorum et pravorum, haereticorum potissime et « credentium », fautorum, defensorum et receptatorum ipsorum dolosis insidiis et fraudulentis fallaciis, quibus vineam Domini Sabaoth nequiter demoliri satagunt, pro viribus conservare, nimio dolore replemur, cum audimus aliquos vel sentimus ad illius depressionem qualicumque malignitate consurgere vel damnabilibus ipsam depravando reprehensionibus aut eis detractionibus abrogabilibus derogando seu iam fictis et mendacibus pervertendo commentis; ad quorum iniqua consternenda molimina eo animosius aspiramus, quo in animarum stragem huiusmodi pestilentes viros perniciosius agnoscimus conspirare, facies quidem habentes diversas, sed caudas ad invicem colligatas. Sane dolentes accepimus, quod in aliquibus partibus regni Boemiae et Poloniae et in confinibus et limitibus terrarum ipsarum, praecipue in Cracovien. et Wratislavien. civitatibus et dioecesibus, adeo infidelitatis diversimode error invaluit, quod ibidem quamplurimi a via veritatis prorsus aversi, euntes post devium falsitatis ac seipsos diversis et variis haeresibus maculantes, pestiferas ad concutiendum orthodoxae murum fidei machinas construunt, molientes ipsam fallacium argumentationum dolosis, falsis ac vulpinis impulsibus demoliri. Verum, licet ubilibet sedis apostolicae diligentia contra talium periculosam et dolosam astutiam, ne diffusius huiusmodi serpat morbus, remedium libenter adhibeat opportunum, in praedictis tamen civitatibus, dioecesibus, locis et terris veluti gentibus et paganis quasi conterminis (cupientes anxie, ut negotium fidei iugi profectu, elisis omnino quibuslibet erroribus haeresumque quarumlibet eradicatis vepribus, fortius convalescat) studemus ad haec, nec immerito, per nos et alios attentius vigilare. Providemus itaque in praedictis civitatibus, locis et terris aliquas circumspectas personas ad praesens pro tanto negotio deputare, quarum honesta conversatio exemplum tribuat puritatis et doctrinam fundant erudita labia salutarem, ut sacro ipsorum ministerio ac vigili studio et sollicitudine indefessa praefatae civitates et dioeceses, terrae et loca huiusmodi pravis contagiis, assistente divina gratia, expurgentur ac fidei catholicae nitor multiplicetur et solidetur ibidem et clarius et lucidius elucescat in Dei honorem et eiusdem fidei incrementum, soliditatem et statum. Cumque de prudentiae vestrae industria, de qua nobis a fide dignis et maioribus vestrorum ordinum laudabile testimonium perhibetur, plenam in Domino fiduciam habeamus, propter quod ministerium vestrum ad id specialiter exequendum et debite ac (prout tanti negotii requirit arduitas) vigilanter et sollicite prosequendum elegimus, discretioni vestrae per apostolica scripta sub virtute sanctae obedientiae firmiter praecipiendo mandamus, in remissionem vobis peccaminum iniungentes, quatenus inquisitionis officium in praefatis civitatibus et dioecesibus, terris et locis contra haereticos, « credentes », fautores, defensores et receptatores eorum, iuxta formam canonum et auctoritatem fratribus vestrorum ordinum inquisitoribus huiusmodi pravitatis deputatis auctoritate apostolica et in posterum deputandis concessam, solerter et sollicite exequi studeatis; nos enim vos ad praefatum officium exequendum in locis et partibus illis expresse duximus deputandos ac illam potestatem et auctoritatem habere vos volumus in partibus et locis eisdem, quae fratribus vestrorum ordinum inquisitoribus pravitatis haereticae in aliis locis et provinciis, in quibus eam exercent, noscitur esse concessa, ac in executione praedictorum plenam vobis concedimus iuxta formam canonum tenore praesentium facultatem. Et quia extirpationem praedictarum haeresum, quae in illis partibus periculose pullulare dicuntur, et incrementum catholicae fidei zelamus ex corde, volumus et mandamus, ut frequenter de statu fidei in illis partibus et executione vestri officii nos informare velitis, ut, si per nos ad extirpationem praefatarum haeresum et haereticorum, credentium, fautorum, defensorum et receptatorum ipsorum conculcationem aliud remedium adhiberi oporteat, certificati per vos possimus officii nostri debitum in praedictis et ea contingentibus salubriter impertiri. Datum Avinione, kal. maii, anno secundo.

In e. m. dilectis filiis Coldae Praedicatorum et Hartmanno Pilsnen.b Minorum ordinum fratribus (pro Pragen. et Olomucen. civitatibus et dioecesibus).c