« bullarium-franciscanum-3595 »

Dilectis filiis sancti Donati et sanctae Mariae ecclesiarum Ianuen. praepositis.

Decet Romanum pontificem, cum inter ecclesiastica loca de aliquorum agitur permutatione bonorum, illam adhibere cautelam, quod, si ex permutatione ipsa alteri dictorum bonorum provenit commodum, sic et alteri non proveniat detrimentum. Exhibita siquidem nobis ex parte venerabilis fratris nostri Leonardi Cathanien. episcopi petitio continebat, quod, cum quaedam terra sive possessio sita in loco, qui dicitur Calignanum, spectans ad ecclesiam sancti Ioannis de Pavagrano ordinis sancti Augustini Ianuen. dioec., adeo sit propinqua et quasi contigua monasterio sancti Leonardi in Calignano ordinis sanctae Clarae dictae dioecesis, quod dictus episcopus fundari fecit et construi, quod possessionem ipsam ab eodem monasterio via tantummodo publica dirimat, et per hoc dicta possessio sit utilis et accommoda plurimum monasterio memorato, ac dilecti filii prior et capitulum eiusdem ecclesiae, licet pluries ab eodem episcopo requisiti, possessionem ipsam sibi eiusdem monasterii nomine noluerint neque velint pro maiori quam valeat pretio vendere neque cum terris aliis longe maioris valoris et pretii permutare: [nos super praemissis de remedio opportuno providere dignaremur]. Nos [itaque], volentes tam ecclesiae quam monasterii praedictorum utilitati prospicere ac utriusque ipsorum indemnitatibus providere, praenominati etiam episcopi super hoc supplicationibus inclinati, gerentes insuper de circumspectione vestra fiduciam in Domino specialem, discretioni vestrae per apostolica scripta mandamus, quatenus de valoribus dictae possessionis, quae ab eodem episcopo petitur, nec non et illarum terrarum, quae ab eo pro permutatione huiusmodi offeruntur, et de circumstantiis omnibus ad permutationem ipsam (sine ecclesiae et monasterii praedictorum incommodo) opportunis diligentius inquirentes nobis inquisitionem ipsam mittere quantocius studeatis, ut nos informati per eam providere dictorum ecclesiae et monasterii et utriusque ipsorum indemnitatibus auctore Domino valeamus. Datum Avinione, V idusa martii, anno secundo.