Description
-
Clément V (1305-1314)
-
Mandat episcopis infra nominatis, ut quosdam fratres Minores provinciae Tusciae a suis conventibus recedentes et alia loca recipientes ad priora redire compellant.1
-
1313, iulii 13, Grauselli.
-
1313
-
Ad nostri apostolatus auditum relatio fide digna perduxit, quod nonnulli fratres locorum ordinis Minorum tam civitatis Florentinae quam nonnullarum aliarum partium Tusciae ab eisdem locis eorumque conventibus temeritate propria recedentes alia loca in eisdem civitate et partibus contra statuta eiusdem ordinis receperunt nec absque gravi scandalo morantur in eis pro ipsorum libito voluntatis.d Cum igitur nos in desideriis habeamus, ut idem ordo eiusque personae in stabilis caritatis dilectione persistant, fraternitati vestrae per apostolica scripta mandamus, quatenus vos vel duo aut unus vestrum per vos aut per alium seu alios praedictos fratres et eorum singulos, ut, eisdem locis ut praemittitur receptis per eos omnino dimissis, ad praefata priora loca una cum aliis dictorum conventuum fratribus sub dicti ordinis ac superiorum suorum obedientia moraturi, qualibet occasione et exceptione posposita, revertantur, per censuram ecclesiasticam, appellatione postposita, super quae plenam vobis potestatem concedimus, compellatis: non obstantibus generalis concilii de duabus et fel. record. Bonifatii papae VIII de una dietis et aliis tam praedicti Bonifatii papae VIII quam aliorum praedecessorum nostrorum constitutionibus contrariis circa iudices promulgatis. Datum in prioratu de Grausello prope Malausanam Vasionen. diocesis, idibus iulii, pontificatus nostri anno octavo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°217., pp.96-97
-
Reg. Vat. t. 60, f. 128, ep. 392 (n. 9366), apud Wadd. Ann. Min. ad a. 1313, n. 5.
1 -
(a) Porchetto Spinulae ex ord. Min.
-
(b) Henrico de Caretto ex ord. Min.
-
(c) Uberto.
-
(d) Spiritualium factionis origines non minus in Tuscia quam in aliis ordinis Min. partibus cum ipsius ordinis originibus fere simul exstiterunt. Maiora incrementa eo maxime tempore haec secta ibi capiebat, quo fr. Petrus Ioannis Olivi lectorem Florentiae agebat (anno 1287 vel 1288). Tempore autem Clementis papae V Ubertinus de Casali Spiritualium ibi princeps fuisse videtur. Quo a Spiritualibus Provinciae, ut supra n. 158, not. 1, diximus, ad se vocato illi Tusci duce carebant et sic id, quod eo praesente vix fecissent, attentabant. A « Communitate » se nimis premi querentes exeunte anno 1312 vel ineunte anno 1313 e suis conventibus ad illud tempus ipsis cum communitatis fratribus communibus aufugerunt et partim quosdam conventus (praesertim Carminianensem, Aretinum, Ascianensem) ingressi fratres Communitatis inde expulerunt, partim alias in domos ab amicis concessas easque antea non religiosas se receperunt. Quibus scandalis ut occurreret summus pontifex, litteras praelatis supradictis dedit. Qui Bernardum ecclesiae s. Fidelis Senensis priorem, ut causam instrueret, delegarunt. Is Spirituales numero 34 singulos suis nominibus dictos, ut mandatis apostolicae sedis obedirent, litteris iussit 15 febr. 1314 datis. At Spirituales dicto priori eadem pertinacia resistebant, quam antea exercuerant in Antonium episcopum Florentin. ac fr. Grimaldum de Prato ord. Min., inquisitorem haer. prav. in partibus Tusciae, a quibus, antequam Clemens V literas dedit, in ius iam vocati erant. Cum autem causa instructa per diuturnum tempus se defendere non posse cognovissent, aufugiebant fere omnes in Siciliam. Adversus illos aufugos quid acturus sit Ioannes papa XXII, intelligemus infra n. 256 et 302.