Description
-
Boniface VIII (1294-1303)
-
Constituitur Archiepiscopus Genuensis. ex Reg. Vat. ep. 3. apud Vaddingum in Reges. Pontif. 38.
-
Anno 1299. die 3. Febr.
-
1299
-
BONIFACIUS &c.
In supremæ dignitatis specula &c.c Sane dudum Ecclesiâ Januen. per obitum bonæ memoriæ Fratris Jacobid Archiepiscopi Januen. Pastoris solatio destitutâ, Nos provisionem ipsius Ecclesiæ hac vice dispositioni Sedis Apostolicæ duximus reservandam, & tandem de ipsius Ecclesiæ ordinatione solliciti cogitantes, ac volentes eamdem a viduitatis incommodis præservare, in te ordinis Fratrum Minorum professorem, litterarum scientiâ, honestate morum, & vitæ, ac aliis virtutum meritis redimitum direximus oculos mentis nostræ, teque de Fratrum nostrorum consilio, ac Apostolicæ plenitudine potestatis eidem Ecclesiæ præfecimus in Archiepiscopum, & Pastorem, & deinde per Venerabilem Fratrem nostrum M.e Portuen. Episcopum munus consecrationis impendi, ac postmodum Pallium de Corpore Beati Petri sumptum in plenitudine Pontificalis officii a te cum instantia, qua decuit, postulatum tibi fecimus exhiberi, ut eo utaris infra Ecclesiam tuam certis diebus, prout in ipsius Ecclesiæ privilegiis continetur, firma spe, fiduciaque tenentes, quòd eadem Ecclesia per tuæ circumspectionis industriam præservabitur a noxiis, & adversis, ac continua, Deo auctore, in spiritualibus, & temporalibus suscipiet incrementa. Reverenter itaque suscipe jugum Domini, & tua ejus oneri humiliter colla submitte, manumque utiliter mittens ad fortia, curam & administrationem ejusdem Ecclesiæ prudenter exequi studeas, & gregis tibi commissi custodiam prosequi diligenter, solerter, & constanter, oppositurus te murum pro Domo Domini ascendentibus ex adverso, ut laudabili de grege ipso redditâ in die districti examinis ratione, Regnum Patris æterni ab origine Mundi præparatum electis accipias lætabundus, in dilecta Domini Tabernacula intraturus. Datum Laterani III. Nonas Februarii, Pontificatus nostri Anno Quinto.
-
Bullarium Franciscanum romanorum pontificum, tomus IV, n°CLXII., pp.482-483
-
(a) Fratri Porcheto: Spinolæ O. M. patria Januensi, viro doctrina, ac nobilitate conspicuo, qui sequenti anno onus, ac decus Pontificale sponte, & libere dimisit, ut Pontifex testatur in epistolis Considerantes, & Inter cetera & anno 1301. mense Augusto datis, & suo loco exhibendis. Cur autem Archiepiscopali dignitate se abdicaverit, inter se non conveniunt Scriptores. Sunt qui volunt hoc accidisse ob intestinum, civileque bellum inter Spinolas, & Aurias familias excitatum. Quidam dicunt id evenisse ob excommunicationem anno 1300. in die Cœnæ Domini a Pontifice latam in Januenses Siculis adhærentes ex Raynaldo in Annal. Eccl. ad eum an. n. 10. Tandem adsunt, qui dicunt, hoc factum esse ob interdictum a Pontifice Civitati, locisque Januensium eodem anno die festo S. Martini impositum, quia roganti ne opem rebellibus Siculis ferrent Januenses nihil indulgendum duxerunt, ex Georgio Stella in Annal. Genuen. in tomo 17. Rer. Ital. Script. Quomodocumque res se habuerit, certe F. Porchetus sponte, & libere dignitatem resignavit, iterumque Januensis Ecclesiæ administrationem, ac regimen resumpsit anno 1301. ex epistolis, quas infra subjiciemus.
-
(b) Januen.: olim Liguriæ, nunc præclaræ Reipublicæ Metropolis.
-
(c) Specula &c.: reliqua usque ad plebs lætetur ut in epist. 45. hujus Pontif. pag. 376.
-
(d) F. Jacobi: de Voragine O. P. viri doctrina, ac pietate celebris, qui a Sacro Januensi Senatu unanimiter electus, vacante Apostolica Sede, inauguratus est a Latino Cardinali Ursino Apostolicæ Sedis Legato anno 1292. decessitque anno 1298. mense Junii. Ughellus tomo 4. Ital. Sac.
-
(e) Fratrem nostrum M.: Matthæum Aquaspartanum O. M.