« bullarium-franciscanum-3102 »

BONIFACIUS &c.

Venerabili Fratria ... Episcopo Parisien. Salutem, & Ap. Ben.

Paupertati, quam propter Deum dilecti filii Fratres Ordinis Minorum Parisien. voluntarie substinent, paterno compatientes affectu, ac volentes necessitatibus dictorum Fratrum Minorum per nostræ providentiæ studium aliquid temporale subsidium provenire, dilecti filii nostri Jacobib tituli Sancti Clementis Presbyteri Cardinalis Nobis super hoc supplicantis precibus inclinati, de legatis indistincte in pios usus relictis in Regno Franciæ mille Marchas argenti apud quoscumque hæredes, seu Successores legata ipsa taliter relinquentium, sive executores testamentorum eorumdem in præfato Regno reperiantur, pro nominatorum Fratrum necessariis auctoritate illis præsentium duximus concedendas. Volumus autem, ut si prætextu concessionis hujusmodi aliquid ultra prædictas mille Marchas dicti Fratres receperint, ipso facto excommunicationis sententiam incurrant. Quocirca Fraternitati tuæ per Apostolica scripta mandamus, quatenus præfatis Guardiano, & Fratribus de præfatis legatis apud quoscumque hæredes, seu Successores legata ipsa taliter relinquentium, sive executores testamentorum eorumdem in præfato Regno reperiantur, prædictas mille Marchas juxta hujusmodi concessionis nostræ tenorem facias per te, vel per alium, seu alios exhiberi. Non obstante, si aliquibus a Sede Apostolica sit indultum, quòd excommunicari, aut interdici nequeant, vel suspendi per litteras Apostolicas non facientes plenam & expressam, ac de verbo ad verbum de indulto hujusmodi mentionem. Contradictores per censuram Ecclesiasticam appellatione postposita compescendo. Datum Anagniæ XVI. Kalendas Augusti, Pontificatus nostri Anno Secundo.