Description
-
Nicolas IV (1288-1292)
-
Ut de consilio Præfectorum Prædicat. & Minorum Ragusin. confirmet electionem Episcopi Saven. si ratam repererit, aliàs ad alteram procedat. ex Reg. Vat. ep. 281. apud Raynaldum ad hunc ann. num. 42. & inde in Bullario Ord. Prædicat. to. 2. pag. 32. num. 26.
-
Anno 1291. die 11. Junii.
-
1291
-
NICOLAUS &c.
Venerabili Fratri ‥ Archiepiscopo Antibarensia Sal. & Ap. Ben.
Per tuas, & etiam charissimæ in Christo filiæ Nostræ Elenæ Reginæ Serviæb Illustris Litteras nuper Nobis transmissas accepimus, quòd in Albaniæc partibus juxta Sclavosd quædam habetur Civitas Savae nomine, & quæ jam longi temporis spatio destructioni succubuit, ejus incolis per diversa loca dispersis, sed de novo in Civitate prædicta quamplures viri Catholici de incolarum ipsorum progenie, ut dicitur, existentes, & alii etiam diversarum partium convenerunt, moramque in illa continuam contrahunt, Episcopum cum instantia postulantes, propter quod prædictæ Civitatis Clerici ad electionem procedentes Episcopi, quemdam Presbyterum Petrum nomine, virum utique Catholicum & fidelem in suum, & ejusdem Civitatis elegerunt Episcopum, & Pastorem, petendo a te utpote Metropolitanof ipsorum humiliter, & instanter, ut electionem hujusmodi auctoritate tibi tradita confirmares, sed petitioni eorum annuere noluisti, nisi priùs super hoc a Nobis licentiam obtineres. Quare tu, & præfata Regina Nobis supplicastis humiliter, ut super hoc providere de benignitate Apostolica dignaremur. Nos igitur ad augumentum Catholicæ fidei sollicitis studiis intendentes, & volentes, ut expedit, salubriter, & mature procedere, ac tuis, & ipsius Reginæ desideriis benigne annuere in hac parte, gerentes quoque de tuæ circumspectionis industria fiduciam in Domino specialem, Fraternitati tuæ per Apostolica scripta mandamus, quatenus, si inquisita de modo electionis, eligentium studiis, & Electi meritis diligentiùs veritate, dictam electionem canonicam, & de persona idonea inveneris celebratam, ipsam de consilio dilecti filii .... Prioris Prædicatorum, & ...... Guardiani Minorum Fratrum Ordinum de Ragusiog auctoritate nostra confirmare procures, ac eidem Electo munus consecrationis impendas, faciens sibi a suis subditis obedientiam, & reverentiam debitam exhiberi. Alioquin, electione prædicta rite cassata, eisdem Clericis de aliqua persona catholica, idonea, & Apostolicæ Sedis devota, quæ tanto congruat oneri, & honori, hac vice auctoritate prædicta de ipsorum tamen Prioris, & Guardiani consilio providere non differas in Episcopum, & Pastorem, contradictores per censuram Ecclesiasticam, appellatione postposita, compescendo. Datum apud Urbem veterem III. Idus Junii, Pontificatus nostri Anno Quartoh.
-
Bullarium Franciscanum romanorum pontificum, tomus IV, n°CDLXXXI., pp.257-258
-
(a) Antibaren.: vulgò Antivari ut in 424. super. ep. pag. 223. no. (b).
-
(b) Elenæ Reginæ Serviæ: ad quam extant hujus Pontificis epistolæ jam supra relatæ, quæque modò Serviæ, modò Sclavorum Regina dicitur.
-
(c) Albaniæ: Europeæ, aliàs Arbaniæ nuncupatæ, quæ olim Epirus dicebatur.
-
(d) Sclavos: nempe populos Illyrici latioris, quod tunc usque ad Epirum protendebatur; At nunc Sclavonia angustioribus coarctatur limitibus.
-
(e) Sava: quæ apud Geographos frustra requiritur; liquet igitur, aut iterum destructioni succubuisse, aut nomen mutasse, ni fortè sit Sappa, de qua infra.
-
(f) Metropolitano: cujus jurisdictio etiam in Albaniæ Provincia extendebatur.
-
(g) De Ragusio: Dalmatiæ Republica valde nota, cujus Minorum Cœnobii meminimus in superiori 424. epistola (e): Illud verò Prædicatorum videre est in illorum Bullario tom. 1. fol. 484.
-
(h) Cum autem hujus Episcopatus nulla alia memoria occurrat, aut institutio effectu caruit, aut eum parùm durasse oportet.