Description
-
Nicolas IV (1288-1292)
-
Potestatem facit ingrediendi nonnulla Monasteria Cistercien. & S. Claræ Ordin. quater in anno cum aliis conditionibus. ex Reges. Vatic. Pontif. epist. 125. ann. 2.
-
Anno 1289. die 13. April.
-
1289
-
NICOLAUS &c.
Dilectæ in Christo Filiæ Nobili mulieri Johannæ de Brenaa Dominæ de Ursione Salutem, & Apostolicam Benedictionem.
Pium arbitramur & congruum, ut in iis prompti simus ad gratiam, quæ salutem respiciunt animarum, præsertim circa personas Nobiles, quæ pura fide conspicuæ, Deo & Ecclesiæ sunt devotæ. Hinc est, quòd Nos tuis devotis precibus favorabiliter annuentes, auctoritate Tibi præsentium indulgemus, ut de Baugezoes, de Lorres, de Laudes, de Olivetob Cistercien. & de Custodia Beatæ Mariæ juxta Blesisc, de Humilitate Sanctæ Mariæd, & Sanctæ Claræe Ordinum Monasteria Bituricen. Carnoten. & Parisien. Diœcesum, & eorum claustra cum quinque honestis mulieribus quater in anno libere possis causâ devotionis intrare, dummodo Tu, vel ipsæ Matronæ infra illa nullatenus pernoctetis, vel etiam comedatis: Non obstantibus contrariis eorumdem Ordinum consuetudinibus vel statutis & quibuslibet Apostolicæ Sedis privilegiis, vel indulgentiis, per quæ hujusmodi gratiæ valeat quomodolibet derogari: Præsentibus post sex annos minime valituris. Nulli ergo omnino hominum liceat hanc paginam nostræ concessionis infringere, vel ei ausu temerario contraire. Si quis autem hoc attentare præsumpserit, indignationem omnipotentis Dei, & Beatorum Petri, & Pauli Apostolorum ejus se noverit incursurum. Datum Romæ apud Sanctam Mariam Majorem Idibus Aprilis, Pontificatus Nostri Anno Secundo.
-
Bullarium Franciscanum romanorum pontificum, tomus IV, n°CI., p.70
-
(a) De Brena: al. Brennaco vulgò Mezieres, seu S. Michelen Brenne oppidulo Galliæ ad amnem Claise in Provincia Turonensi, & confinio Bituricensis Ducatus ex Baudrando in Lexico Geograph.
-
(b) De Oliveto: Bituricensis Diœcesis, cujus Monasterii Virorum meminit Ang. Manrique in Annal. Cistercien. ad ann. 1144. cap. 8. n. 5. Monialium verò nequaquam, sicut nec trium præcedentium Baugezoes, Lorres, & Laudes.
-
(c) De Custodia B. M. juxta Blesis: Carnutensis Diœcesis, de quo dictum est ad epist. 15. hujus Pontificis.
-
(d) De Humilitate S. M.: prope S. Clodoaldum vulgò S. Cloud, Burgum cultissimum cum ponte lapideo ad fluvium Sequanam in Campolongo, duabus leucis infra Lutetiam Parisiorum in occasum, cujus Monasterii mentio habetur in 2. & 3. tomis hujus Operis.
-
(e) S. Claræ: prope Parisios juxta villam S. Marcelli, de quo Monasterio agit 4. Bulla hujus Pontificis, & 74. Honorii IV. in 3. hujus Operis tomo relata.