« bullarium-franciscanum-2491 »

NICOLAUS &c.

Ad certitudinem præsentium & memoriam futurorum.

Hæc est forma litterarum, de quibus a Dionysio Portugalliæ & Algarbii Rege illustri dilectis filiis ... Priori Prædicatorum, & ‥ Guardiano Minorum Fratrum Ordinum Ulixbonen. vel eorum vicem gerentibus Ecclesiæ Romanæ nomine concedendis fit mentio in aliis nostris litterisa, per quas compositionem habitam inter Venerabiles Fratres nostros T.b Archiepiscopum Bracharensem, A. Colimbriensem, B. Silvensem, & J. Lamecensem Episcoposc pro se, Prælatis aliis, Ecclesiis, & personis Ecclesiasticis Regni ejusdem ex parte una, & dilectos filios Martinum Petri Cantorem Elborensem, & Johannem Martini Canonicum Colimbrien. Procuratores dicti Regis nomine ipsius ex altera super articulis numero quadraginta sub certa forma duximus confirmanda. “Nos Dionysius Dei gratia Portugalliæ & Algarbii Rex notum facimus Universis præsentes litteras inspecturis, quòd pridem in Romana Curia inter Venerabiles Patres Fratrem T. Archiepiscopum Bracharen. A. Colimbrien. B. Silven. & J. Lamecen. Episcopos pro se, ac aliis Prælatis Ecclesiis & personis Ecclesiasticis, pro quibus componendi, & pacificandi nobiscum, seu cum Procuratoribus nostris nomine nostro Sanctissimus Pater Dominus Nicolaus Divinâ providentiâ Papa iv. concessit eis plenam, & liberam potestatem ex parte una, & dilectos Clericos, & Procuratores nostros Martinum Petri Cantorem Elboren. & Johannem Martini Canonicum Colimbrien. sufficiens ad componendum, & pacificandum cum Prælatis prædictis a Nobis mandatum habentes ex altera super quibusdam articulis numero quadraginta per Dei gratiam pax & compositio intervénit, prout instrumentum publicum confectum per manum discreti viri Magistri Nicolai Bartholomæi de Guarcino publica auctoritate Sedis Apostolicæ Tabellionis seriosiùs manifestat. Cujus quidem instrumenti tenorem memoratus Summus Pontifex ad supplicationem Prælatorum, & Procuratorum eorumdem fecit suis litteris ad perpetuam rei memoriam annotari. Et per alias suas certæ formæ litteras compositionem confirmans eamdem, ad majus robur firmitatis ipsius ordinavit providit decrevit & statuit in omnibus, & singulis articulis memoratis ea, quæ in factis ad eos responsionibus continentur, tam a Nobis, quàm a nostris in Regno præfato Successoribus, & quibuslibet Officialibus, Ministrisve nostris, necnon Baronibus, cæterisque habitatoribus Regni ejusdem, prout singulis eorum competit, perpetuò inviolabiliter observanda, nonnullis pœnis, & sententiis, ac pœnarum, & sententiarum comminationibus, prout Summus Pontifex expedire putavit, adjectis. Proviso de partium voluntate, quòd postquam Nos ratificaverimus acceptaverimus & approbaverimus in nostra Curia generali ad hoc congregata specialiter omnia, & singula, quæ cum Archiepiscopo, & Episcopis memoratis per eosdem Procuratores nostros acta sunt nostro nomine in præmissis, & hujusmodi confirmationi ordinationi provisioni decreto seu statuto dicti Summi Pontificis consenserimus expresse, eaque, ac omnia, & singula contenta in eis Nos, dictosque Successores nostros promiserimus plene adimpleturos, & perpetuò inviolabiliter servaturos, & super ratificatione acceptatione approbatione ac promissione hujusmodi, tam Priori Prædicatorum, & ‥ Guardiano Minorum Fratrum Ordinum Ulixbonen. seu eorum vicem gerentibus Ecclesiæ Romanæ nomine, quàm dicto Archiepiscopo, & singulis Episcopis Regni ejusdem, vel ipsis absentibus eorum Vicariis, vel aliqua ejusdem Regni Ecclesia Cathedrali vacante, Vicariis, seu Vicario quoad spiritualia in eadem, necnon & singulis Capitulis Ecclesiarum Cathedralium prædicti Portugalliæ & Algarbii Regni patentes litteras nostro Regio plumbeo sigillo pendenti munitas concesserimus in formâ Nobis super hoc a Sede Apostolica destinatâ, nec nos, nec dictorum successorum aliquis ad observandam provisionem, sive ordinationem fel. record. Domini Gregorii Papæ x. super articulis, de quibus inter ipsos Prælatos, & claræ memoriæ A. Regem Portugalliæ Genitorem nostrum erat controversia, editam, aliquatenus teneamur. Idem enim Summus Pontifex ex tunc de partium earumdem expresso consensu decrevit, ipsam quoad omnes, quos eadem provisio, seu ordinatio contingebat, postquam prædictæ ratificatio acceptatio approbatio & promissio factæ, ac litteræ per Nos datæ fuerint, ut præmittitur, super eis fore omnino viribus vacuam, & carere omni robore firmitatis. Nos itaque in hac nostra Curia generali ad hoc specialiter congregatâ dictam compositionem ac omnia & singula, quæ cum ‥ Archiepiscopo, & Epipis memoratis per eosdem Procuratores nostros acta sunt, nostro nomine in præmissis ratificamus acceptamus & approbamus ex certa scientia, tanquam nomine nostro acta, & præfatis confirmationi ordinationi provisioni statuto atque decreto ejusdem Summi Pontificis consentientes expresse promittimus vobis Religiosis Viris .... Priori Prædicatorum, & ... Guardiano Minorum Fratrum Ordinum Ulixbonen.d in hac Curia nostra præsentibus, ejusdem Ecclesiæ Romanæ nomine solemniter stipulantibus, & promissionem nostram recipientibus ex concessa vobis ad hæc per Sedem Apostolicam plenâ & liberâ potestate Nos, & successores nostros prædictos, quos omnes & singulos ad hæc specialiter obligamus, dictam compositionem, & prædicta omnia & singula, prout ad Nos, & successores ipsos pertinet, plenarie impleturos, & perpetuò inviolabiliter servaturos, vobis præsentes patentes litteras plumbeo nostro Regio sigillo pendenti munitas, ejusdem Ecclesiæ Romanæ nomine juxta formam Nobis a Sede Apostolica destinatam in perpetuum veritatis testimonium concedentes. Datum in ‥ loco in nostra Generali Curia die ‥ Anno ‥”. Quòd si forte dicti Prior, & Guardianus in dicta Curia præsentes non fuerint, sed Vicarii eorumdem, loco dictorum Prioris, & Guardiani mentio similis de ipsis Vicariis solùm fiat. Datum Romæ apud S. Mariam Majorem XVII. Kalendas Aprilis, Pontificatus nostri Anno Secundo.