« bullarium-franciscanum-2484 »

NICOLAUS &c.

Dilecto Filio Johanni tituli S. Cæciliæ Præsbytero Cardinali Apostolicæ Sedis Legato Salutem, & Apostolicam Benedictionem.

Duduma tibi per Nostras litterasb intimasse recolimus, qualiter ex parte carissimi in Christo filii nostri Philippic Regis Francorum illustris propositum fuerat coram Nobis: quòd quondam Magister Galienus de Pisis tunc Canonicus Ecclesiæ de S. Audomaro Morinensis Diœcesis de propria salute &c.d, tibi per easdem commisimus & mandavimus litteras, ut præmissis veris existentibus juxta prædictam ordinationem ipsius Magistri Galieni concederes mandares & faceres per te, vel per alium aut alios in dictis Maneriis Monasterium ordinari, & hujusmodi Sorores auctoritate nostra institueres, & collocares etiam in eodem, ut ibidem perpetuis temporibus viverent sub observantia Regulæ supradictæ, ipsisque Sororibus, postquam ibidem collocatæ fuissent, eâdem auctoritate concederes, ut possent in Ecclesia inibi constructa libere facere celebrari Divina, & uti privilegiis indulgentiis libertatibus ac immunitatibus, quæ Sororibus prædicti Ordinis a Sede Apostolica sunt concessa; contradictores per censuram ecclesiasticam appellatione postposita compescendo; non obstante, si aliquibus, quòd interdici suspendi vel excommunicari non possint, sub quacumque forma verborum a Sede Apostolica esset indultum, & quacumque indulgentiâ dictæ Sedis, per quam Nostris litteris non expressam, vel de verbo ad verbum totaliter non insertam effectus litterarum ipsarum impediri valeret quomodolibet, vel differri. Verùm quia, sicut accepimus, ‥ Decanus, & Capitulum Ecclesiæ S. Marcelli prædicti satisfactione Regiâ ipsis super hoc præstitâ non contenti, super iis consentire minime voluerunt, quod in hac parte mandavimus, exequi distulisti. Cum autem hujusmodi negotium ob Divini cultus augmentum cordi specialiter habeamus, discretioni tuæ per Apostolica scripta mandamus, quatenus si prædicti Decanus, & Capitulum, quos ad hoc per te juxta datam tibi a Domino gratiam moneri volumus, & induci, cum, sicut asseritur, satisfactio sufficiens offeratur eisdem, consentire noluerint in hac parte, tu in aliis prædicti Manerii partibus dudum ad Ecclesiam S. Genovefæ, ac Hospitale præfatum spectantibus Monasterium juxta ordinationem prædictam construi facias, ac Sorores, sicut præmittitur, colloces, seu instituas in eodem, in aliis auctoritate Nostra, prout superiùs exprimitur, processurus, sicque te habiturus solicite in præmissis, ut exinde præmium consequaris a Domino, & a Nobis non immeritò valeas commendari. Datum Romæ apud S. Mariam Majorem Nonis Martii, Pontificatus Nostri Anno Secundo.