Description
-
Nicolas III (1277-1280)
-
Fr. Joanni Amerino O. M. in Sutrien. Episcopum electo, facultate a suo Ministro opportunè non obtenta alter sufficitur. (Ex Vatic. Reges. Pontif. epist. 164. anni 2.)
-
Anno 1279. die 22. Septembr.
-
1279
-
NICOLAUS &c.
In supremæ dignitatis specula &c.c Sanè dudum Ecclesiâ Sutrina Pastoris solatio destitutâ, dilecti Filii Capitulum ejusdem Ecclesiæ prius obtentâ plenâ licentiâ eligendi, ad tractandum de provisione faciendâ ipsius Ecclesiæ de Prælato, prout moris est, convenerunt in unum; & tandem post multiplices tractatus super hoc habitos inter eos in dilectum Filium Fratrem Joannem de Ameliad Ordinis Fratrum Minorum vota sua unanimiter dirigentes ipsum in Sutrinum Episcopum canonicè, & concorditer elegerunt. Verùm quia postmodum idem Frater à … Ministroe sui Ordinis acceptandi electionem hujusmodi infra tempus debitum licentiam non obtinuit; propter quod juxta Lugdunensis statuta Conciliif à jure cecidisse dinoscitur, si quod sibi ex electione hujusmodi fuerat acquisitum; Nos provisionem ejusdem Ecclesiæ eâ vice Nobis duximus reservandam; & demum de ipsius ordinatione attentiùs cogitantes, ne vacationis incommodis diutiùs subjaceret; & talem illi cupientes præesse Pontificem, quòd ipsum clara meritorum suorum insignia redimerent; nec dubia esset ipsius charitas erga plebem suo regimini commendandam; & in cujus fide fida recumberet securitas subditorum; in te direximus oculos Nostræ mentis, quem Nobis, & Fratribus Nostris de litterarum scientiâ, morum maturitate, prudentiâ, spiritualium, & temporalium providentiâ, & ad Romanam Ecclesiam devotione sincerâ familiaris experientiag dinoscitur approbasse. Quapropter gregi Dominico speciali volentes diligentiâ providere, de consilio eorumdem Fratrum Nostrorum, te ipsi Ecclesiæ præfecimus in Episcopum & Pastorem, tibique munus consecrationis Nostris manibus duximus impendendum; firmam spem, fiduciamque tenentes, quòd eadem Ecclesia, auctore Deo, per tuæ industriæ, ac circumspectionis fructuosum studium præservabitur a dispendiis, & spiritualibus proficiet incrementis. Tolle igitur jugum Domini tam leve collis humilibus, quàm suave, ac in dilectione Dei pascendum suscipe gregem ejus, super quem noctis vigilias diligens sollicitusque custodi, ut liber non pateat aditus invasori; & Dominus insuspicabili horâ venturus, si te invenerit sic agentem cursu consummato, qui tuo labori proponitur; & fide servatâ, quæ tuæ sollicitudini dimittuntur, te fidelem compertum in modico, supra multa constituat; ac in dilecta gaudiorum suorum Tabernacula introducat.
Datum Viterbii x. Kalend. Octobris, Pontificatus Nostri Anno Secundo.
-
Bullarium Franciscanum romanorum pontificum, tomus III, n°CXXXI., p.419
-
(a) F.: Florasius; de quo legendus Ughellus to. 1. Ital. Sac., quique obiit 1282.
-
(b) Sutrin.: In Etruria, Patrimonioque S. Petri ad amnem Pozzolo 5. mill. a Nepe in occasum, cui Episcopatus unitus est, & 3. a Capranica in ortum.
-
(c) Specula &c.: Ut in epist. 102. hujus Pontificis hoc anno die 25. Febr. data usque plebs lætetur.
-
(d) Fr. Jo: de Amelia: Rerum Minoriticarum Scriptoribus hucusque ignoto.
-
(e) Ministro: Provinciæ Romanæ, erat enim Sutrii locus 3. al. 4. Custodiæ Romanæ ex aliàs & sæpe cit. veteri Provinciali Ordinis nostri; præeratque tunc Guido, quem Joannes XXI. anno 1277. destinarat cum nonnullis aliis Nuncium ad Imp. Palæologum ex ejusdem Joannis epist. 30. & sequ.
-
(f) Lugdun. statuta Concilii: II. anno 1274. celebrati cap. 5.
-
(g) Familiaris experientia: Versabatur igitur in Curia Romana; & forsan est ille Fr. Florasius Vicentinus Ord. Min. sub Urbano IV. pluribus muniis pro S. A. occupatus, ut in 2. hujus Operis to. legere est.