« bullarium-franciscanum-2113 »

NICOLAUS &c.

Dilecto Filio Fratri Conradoa Ministro Fratrum Minorum superioris Alemanniæb Sal., & Apost. Ben.

Cum te ad charissimum in Christo Filium Nostrum Rodulphum Regem Romanorum Illustrem pro certis negotiis remittamus; sic te gerere volumus in iis, quæ tibi imminent facienda. In primis eumdem Regem ex parte Nostrâ cum benedictionis dulcedine salutabis. Item præsentabis sibi litteras Nostrasc, quæ incipiunt: Intima mentis nostræ &c. Item alias, quæ incipiunt: Ad tuæ devotionis augmentum: Item alias, quæ incipiunt: In aliis, quæ tibi dirigunturd: Deinde facias ratificari, innovari, recognosci, confirmari, & de novo concedi; & nihilominuse in tuâ præsentiâ corporali præstito juramento firmari per ipsum Regem omnia, & singula, quæ per te facta fuerunt suo nomine coram Nobis; prout continentur in quinque Instrumentis confectis per manus Magistri Pauli de Reate Apostolicâ auctoritate, & nunc Cameræ Nostræ Notarii tuo sigillo signatis, quorum tenores tibi de verbo ad verbum facimus exhiberi; ita quòd de prædictis quinque Instrumentis ratificandis fiant quinque alia sub aurea Bulla Regis, videlicet de quolibet unum secundum notam, quam tibi tradi fecimus, quæ incipit: In nomine Domini. Amen. Nos Rodulphus Dei gratia Rex Romanorum semper Augustus. Ad æternam rei gestæ memoriam recognoscimus, & fatemur &c.f Proviso, quòd in diversitate ratificationum prædictorum quinque Instrumentorum verba competentia factis cum discretione, & maturitate mutentur & ordinentur; sicut per eamdem notam instructio tibi datur; diligenter attendens, quòd inter Testes alios, qui in ratificationibus hujusmodi apponentur, ponantur Principes, & alii Nobiles cum subscriptionibus eorumdemg. Item per ea, quæ in tenoribus Privilegiorum Romanorum Imperatorum propriis oculis inspexisti, referendo ipsi Regi, quomodo Civitas Bononiæ, Ravennæ, & cæteræ aliæ Civitates, & Loca, quæ in litteris directis eidem Regi expressiùs nominantur, ad Nos, & Romanam Ecclesiam clarè, & distinctè pertinere noscuntur; quorum etiam Privilegiorum tenores per te dicto Regi sub Bulla Nostra transmittimush; inducas eumdem Regem, ut omnia, & singula, quæ tàm in declarando, quàm in recognoscendo, & de novo etiam concedendo, atque donando, & alia faciendo; prout in notis, quas tibi tradi fecimus, quarum una sic incipit: Summa Reipublicæ tuitio &c. Et reliqua: In nomine Sanctæ, & Individuæ Trinitatis; Rodulphus Divina favente Clementia Romanorum Rex semper Augustus. Ab eo solo &c.i: continentur promptè, ac liberaliter faciat Nobis super his suas litteras secundùm formam ipsarum notarum sub Bulla aurea concedendo; & nihilominus omnia & singula, quæ fecit in Nostrâ, & Nostrorum Fratrum præsentiâ Magister Gottifredus Præpositus Ecclesiæ Solien. Salzeburgen. Diœcesis, ipsius Regni Protonotarius de mandato Regis ejusdem, facias confirmari secundum formam, quam fecimus tibi exhiberi; & procures attentiùs per dictum Regem litteras, & Nuntios fideles, utiles, & aptos ad talia, qui fideliter, & clarè, prout decet, expediant; nec involvant, ad partes illas solemniter destinari per quos ea, quæ idem Rex fecerit in prætactis, solemniter publicenturj; & ad omnium notitiam deducantur; & per eosdem circa prætacta omnia faciant, & integrè impleantur, quæ Nobis necessaria, vel utilia videbuntur. Item quia multùm inhæret Nostris affectibus, ut inchoati tractatus solidandæ concordiæ inter charissimum in Christo Filium Nostrum Carolum Siciliæ, & prædictum Rodulphum Romanorum Reges Illustres, dante Domino, compleantur; & intentionis Nostræ sit super iis, per vias, quas poterimus, dare operam efficacem; ne ex defectu Procuratorii, vel mandati ex parte ipsius Romanorum Regis bonum tantæ concordiæ contingeret impediri, vel etiam retardari; procurare studeas diligenter, quòd idem Rex Romanorum mittat speciales Ambasciatores, & Nuntiosk ad Nos cum plenariâ potestate tractatus resumendi prætactos, illosque prosequendi, nec non consummandi, & circa dictam concordiam, charitatem, amicitiam, ac fœderis unionem ordinandi, componendi, paciscendi, transigendi, compromittendi, promittendi, & confirmandi cautionibus opportunis; & omnia alia plenè, liberè, generaliter, & specialiter faciendi, quæ in solemnitate, ac expeditione tanti negotii requiruntur, absque conditionali adjectione: salvo jure, vel demembratione Imperii, aut aliâ simili; cum tales clausulæ captiosæ plurimùm videantur; cum intendamus ab eodem Rege Siciliæ ad solidationem prædictæ concordiæ potestatem similem procurarel. His autem per sollicitudinem tuam cum omni celeritate, quâ poteris, plenariè adimpletis; cum Privilegiis, litteris prædicti Regis, & aliis, quæ petimus, infra instans festum Nativitatis Beatæ Virginis, vel Kalendas futuri proximi Mensis Octobris ad Nostram præsentiam revertarism, intentionem ejusdem Regis Romanorum in his, & aliis, quæ tibi commiserit, Nobis fideliter relaturus. Intendimus enim, quòd sive Rex ipse mittat alios Nuntios, sive non; tu nihilominus ad Nos in prætacto termino in omnem eventum negotii redire aliquatenus non omittas. Cæterùm prætacta, quæ in memoriali hujusmodi continentur; & eorum quodlibet sic attentè percurras; diligenti sollicitudine investiges; ac sollicitâ diligentiâ prosequaris; quòd nihil per incuriam negotio tanto depereat; nihilque super iis tuæ negligentiæ valeat imputari; quin potius diligentiam tuam possimus exinde meritò commendare.

Datum, ut supra.