« bullarium-franciscanum-2094 »

NICOLAUS &c.

Dilectis Filiis Fratribus Gerardo de Pratoa Antonio de Parma, Johanni de Sancta Agatha, & Andreæ de Florentia, & Matthæo de Aretio Ordinis Minorum in Terras Tartarorum proficiscentibus Nuntiis Nostris Salutem, & Apostolicam Benedictionem.

Cum vos ad partes Tartarorum pro commisso vobis negotio Fidei cum Apostolicis litteris destinemus, Nos tanti negotii qualitatem, & ea, quæ possunt ipsum contingere propter sui præexcellentiam attendentes, devotioni vestræ recipiendi ad Ordinem vestrum duodecim personas idoneas ad illum convolare volentes, cujuscumque conditionis extiterint; ac eas ad professionem, & alia Instituta ejusdem Ordinis admittendi; vosque ad invicem ab excommunicationum sententiis; & vobiscum etiam super irregularitatibus, si quas vos, vel aliquem vestrum incurrere contigerit, si necessitatis articulus id exquirat, dispensandi; ac distrahendi res vestris usibus deputatas, & alias ipsas eisdem usibus in prosecutione dicti negotii, prout expedire videritis, applicandi; deficientibus insuper famulis vobis necessariis substituendi alios, etiamsi signo Crucis assumpto sint Terræ Sanctæ itineri obligati, & voluerint votum emissum in laborem hujusmodi commutare; ac cum eis super commutatione hujusmodi dispensandi; dummodo non sint talis conditionis, aut status, quòd per hoc eidem Terræ grave præjudicium generetur; & eis, seu quibuslibet aliis Christianam Fidem profitentibus, quos ad id per vos assumi permittimus, vobiscum laborem ipsum gerentibus, illam suorum peccatorum veniam indulgendi, quæ concessa est Transfretantibus in dictæ Terræ subsidium, liberam vobis concedimus tenore præsentium facultatem.

Datum, ut supra.