Description
-
Clément IV (1265-1268)
-
{131}Ut secum deliberent, quid magis sibi expediat, an Fratres Minores benevolè admittere, an Sedis Apostolicæ præstolari censuram. (Ex Reges. Vatic. epist. 406. to. 4. inter litteras extravag. apud Waddingum in Regesto Pontif. num. 20., & Martene tom. 2. Thesau. Anecdot. epist. 564. Clementis IV.)
-
Anno 1267. die 11. Decembris.
-
1267
-
CLEMENS &c.
Dilectis Filiis … Abbati, & Conventui Monasteriia ‥ Sal., & Apost. Ben.
Orta dudum inter vos, & dilectos Filios, ‥ Priorem, & Conventum Carilocib ex parte unâ, & dilectos Filios … Ministrum, & Fratres Minores Burgundiæ ex alterâ occasione domus cujusdam, quam in villa Cariloci acquisiverantc; in qua sibi mansionem elegerant pro salute Fidelium, quibus inibi posse multum proficere se credebant, vobis, & dilectis Monachis Cariloci verbis, & factis similiter opponentibus vos eisdem, gravis materia quæstionis; pro hujusmodi tollendâ discordiâ olim multa a fel. record. Alexandro, & Urbano d Romanis Pontificibus prædecessoribus Nostris, diversa, & sub diversis formis noscuntur emanasse rescriptae. Sed & carissimus in Christo Filius Noster Ludovicus Rex Francorum Illustris, & plures alii magni viri plurimum laborarunt. Nos insuper, cum minori fungeremur officio, ad hoc dedimus opem & operam, quas potuimus, sed pax hactenus nulla potuit inveniri. Sanè nuper dilecto Filio N.f, & … Fratrum Minorum Burgundiæ Procuratoribus in Nostrâ præsentiâ constitutis, sustinere noluimus inter eos ordinari judicium; sed ex Nostro dumtaxat officio indulgentias, & rescripta, quibus poterant se juvare, Nobis fecimus exhiberi; quibus diligenter inspectis, quamvis magnum favorem exprimerent, quem ad Fratrum Minorum Ordinem Apostolica Sedes habuit, cujus judicio specialiter regitur totus Ordo, Nos nihilominus advertentes, quòd & vos estis Romanæ Ecclesiæ filii speciales, procedendum non duximus ad contentionem hujusmodi finaliter dirimendam, sed volumus, quod supersedeant dilecti Fratresg a prædicti prosecutione negotii; donec illud Nobis placuerit ordinare. Cum igitur iidem Fratres Nostris per omnia beneplacitis æquanimiter se coaptent; devotioni vestræ per Apostolica scripta mandamus, quatenus & vos, & eos de charitatis visceribus affluentes, deliberetis vobiscum, quid magis vobis deceat, quid & magis vobis expediat; an benevolè Fratres admittere certis pactis adhibitis; an Sedis Apostolicæ præstolari censuram; quæ peculiari gregi suo compatiens multo forsan tempore sustinere non poterit suorum scandala pusillorum.
Datum Viterbii ii. Idus Decembris, Pontificatus Nostri Anno Tertio.
-
Bullarium Franciscanum romanorum pontificum, tomus III, n°CXLII., pp.-132
-
(a) Monasterii ‥: Cluniacensis habet epistola apud suprarelatum Martene, Abbatiæ celebris Diœcesis Matisconen., a qua Civitate 4. leucis distat.
-
(b) Cariloci: In Burgundia, Provinciaque Lugdunensi a Cluniaco Monasterio 6. leucis distantis in Diœcesi Matisconen. vulgo Charolles al. Carlocè.
-
(c) Acquisiverant: Quo anno, & a quibus locus Cariloci datus sit Fratribus Minoritis, incompertum; est autem 3. locus Custodiæ Lugdunen. in Provincia Burgundiæ apud veterem Autorem Polychronici, & Barthol. Pisanum Conform. xi., & verisimile putatur, sub Alexandro IV. Ordini pervenisse.
-
(d) Alexandro, et Urbano: IV. hujus nominis.
-
(e) Rescripta: Quæ tamen desiderantur, sed memorantur in epist. Nicolai III. Olim ex relatione &c. anno 1280. Idibus Febr. scripta.
-
(f) N.: Abbate Cluniacensi habet cit. epistola apud Martene.
-
(g) Dilecti Fratres: Nempe Ord. Minorum.