Description
-
Alexandre IV (1254-1261)
-
Indulgentiæ conceduntur porrigentibus manus adjutrices fabricæ Conventus, & Ecclesiæ FF. Minorum Castiniani. (Ex Autographo Archivii dicti Conventus.)
-
Anno 1255. die 16. Aprilis.
-
1255
-
ALEXANDER &c.
Universis Christifidelibus præsentes Litteras inspecturis Salutem, & Apostolicam Benedictionem.
Quoniam, ut ait Apostolus: omnes stabimus ante tribunal Christi recepturi, prout in corpore gessimus, sive bonum fuerit, sive malum; oportet nos diem messionis extremæ misericordiæ operibus prævenire; & æternorum intuitu seminare in terris, quod reddente Domino cum multiplicato fructu recolligere valeamus in Cælis, firmam spem, fiduciamque tenentes, quoniam qui parce seminat, parce & metet; & qui seminat in benedictionibus, de benedictionibus & metet vitam æternam. Sane dilecti filii ... Minister, & Fratres Ordinis Fratrum Minorum de Castignanoa Asculanæ Diœcesisb ibidem, sicut accepimus, Ecclesiam cum aliis ædificiis suis usibus opportunis cœperunt construere, in qua Divinis possint laudibus deservire. Cum itaque in hujusmodi ædificiis construendis Fidelium indigeant juvari subsidiis, qui propter Christum extremæ ferunt sarcinam paupertatis; Universitatem vestram rogamus, & hortamur in Domino in remissionem vobis peccaminum injungentes, quatenus de bonis a Deo vobis collatis pias eleemosynas, & eis grata charitatis subsidia erogetis, ut per subventionem vestram opus hujusmodi consummari valeat; & vos per hæc, & alia bona, quæ Domino inspirante feceritis ad æternæ possitis felicitatis gaudia pervenire. Nos enim de Omnipotentis Dei misericordia, & Beatorum Petri, & Pauli Apostolorum ejus auctoritate confisi omnibus, & singulis vere pœnitentibus, & confessis, qui eis pro dicti consumatione operis manum porrexerint adjutricem, centum dies de injuncta sibi pœnitentia misericorditer relaxamus. Præsentibus post septennium minime valiturisc.
Datum Neapoli xvi. Kalendas Maji, Pontificatus Nostri Anno Primo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XLIV., p.37
-
(a) De Castignano: Al. Castineano ultimo loco Custodiæ Asculanæ Provinciæ Marchiæ Anconitanæ in veteri Provinciali Ordinis apud Bartholom. Pisanum Conform. xi., x. vero apud Chronicon Jordani MS.
-
(b) Asculanæ Dioecesis: Provinciæ Piceni ex supradictis; nunc autem Diœcesis est Montis Alti, ex quo istud Oppidum a Sixto V. in Civitatem Episcopalem erectum fuit.
-
(c) Meminit hujus loci, & Bullæ Alexandri IV. Waddingus in Annal. Min. ad annum 1252. num. 48, sed errat, dum eo anno scriptam affirmat.