« bullarium-franciscanum-126 »

GREGORIUS &c.

Illustri Regi Georgiæ a .

Cum sit omnis ab Omnipotente potestas, & quæ ab eo sunt, ordinata credantur; illi profectò Reges non portant gladium sine causa, qui & erecti adversus impios libenter vindicant injuriam Creatoris, & Fidelibus inclinati pia ipsorum facta fovendo pariter, & muniendo collaudant. Sanè dilecto filio Jacobo de Russanob de Ordine Fratrum Minorum latore præsentium accepimus referentec, quod tu thronum gloriæ, cui præsides, ab auctore omnium recognoscens, personas ipsius Ordinis, quin potius operantem in eis Spiritum veneraris, intelligens, sicut credimus, & attendens, quod qui custodit parvulos, hodiè in confusionem hæreticæ pravitatis, catholicam dignatur Ecclesiam evidentibus signis, atque miraculis decorare per eos; ut quo se fortius paupertate simul, & simplicitate dejiciunt, eo majoribus ab eo, qui humilia respicit, virtutum honoribus attollantur. Ut igitur Justi, & Prophetæ mercedem accipias; si Rex pro Illo Rege, qui per ignem vivos, & mortuos judicare venturus, quidquid minimis suis actum clementer invenerit, sibi præstitum reputabit; gratiam, & favorem talium factis accomodas, & eorum misericorditer infirma supportas: Serenitatem vestram rogamus, monemus, & hortamur attentiùs, ac per Apostolica tibi Scripta in remissionem peccaminum injungentes, quatenus dictum Fratrem, dilectum familiarem nostrum, & ceteros ipsius Ordinis Professores, qui in Ordine voluntariæ paupertatis pro Christo legatione funguntur ad gentes, quæ non noverunt Deum, & assumunt in vanum nomen ejus, benignè recipias, & charitativè pertractes, in ipsis magnificans opus ejus, qui seipsum nobis præbuit, & pro nobis, & nos de corruptionis redimens servitute, in filiorum libertatem vocavit, hæreditaturos cum ipso gloriam sempiternam.

Datum Laterani iii. Idus Aprilis, Pontificatus Nostri Anno Septimo.