« bullarium-franciscanum-121 »

Document | bullarium-franciscanum/notice/151581
plus d'informations

Description

  •  
    Grégoire IX (1227-1241)
  •  
    Scribit Episcopo Auximano, ne Fratres Continentes Auximanos, seu Tertii Ordinis Sancti Francisci recipere publica officia, aliave gravamina subire permittat. (Ex Archivo Conventus Sancti Francisci Auximi.)
  •  
    Anno 1233. die 15. Martii.
  •  
    1233

  •  

    GREGORIUS &c.

    Venerabili Fratri Episcopo Auximan. a Salutem, & Apostolicam Benedictionem.

    Ne is, qui bonis actibus invidet, valeat exultare, si Fratres, qui Continentes b dicuntur, compellantur redire ad seculum, quod Divino intuitu reliquerunt; Fraternitati tuæ per Apostolica Scripta mandamus, quatenus cum eis per Litteras Apostolicasc sit concessum, ut recipere publica officia, vel nova exactionum, aut alterius gravaminis subire onera non cogantur; Fratres eosdem tuæ Civitatis, vel Diœcesis super prædictis, & aliis contra Litterarum ipsarum tenorem non permittas ab aliquibus indebitè molestari, molestatores hujusmodi per Censuram Ecclesiasticam appellatione postposita compescendo.

    Datum Anagniæ Idibus Martii Pontificatus Nostri Anno Sexto.
  •  
    Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XCIV., pp.-100
  •  
    (a) Episcopo Auximan.: Rainerio, qui ab anno 1240. al. 1245. translatus est cum Cathedra Recinetum ex Ughello tom. I. Ital. sac.
  •  
    (b) Continentes: Hoc etiam vocabulo veniunt Fratres de Pœnitentia, & Tertii Ordinis S. Francisci: sic epistola Bonifacii VIII. anno 1296. incip. Devotionis vestræ &c. data est universis Fratribus & Sororibus Ordinis Continentium de Pœnitentia S. Francisci vulgariter nuncupatis per Alemaniam constitutis: quæ infra dabitur ex Waddingo. In Clement. lib. 5. tit. 10. c. 3. Cum ex eo legimus: Fratres, & Sorores de Ordine Tertio, quam B. Franciscus instituit, qui Continentes, seu de Pœnitentia nuncupantur: sic & Joannes xxii. ep. 57., & 82.; qui etiam in sua ad Galliæ Prælatos epistola anno 1322. data, & infra referenda habet: constat B. Franciscum tres Ordines instituisse, primum Fratrum Minorum, secundum Clarissarum, & tertium Continentium: incipit epist. Si ea quæ &c. apud Waddingum n. cxi.; in præcedenti vero, ibi num. cx. incip. Dudum fel. recordat. ait: universis Fratribus, & Sororibus Ordinis Continentium de Pœnitentia S. Francisci vulgariter nuncupatis &c.: similiter Eugenius IV. epist. Sacræ Religionis &c. anno 1439. die 1. Maji Episcopo Florentino scribit: Sorores domus S. Hieronymi Florentini tertii Ordinis S. Francisci Continentes, seu de Pœnitentia nuncupatæ &c.: & in alia Pastoralis Officii debitum &c. anno 1442. die 25. Octobris scripta pro dictis Sororibus habet: Ministræ Generalis Sororum tertii Ordinis Sancti Francisci de Continentia, seu de Pœnitentia nuncupatarum &c. apud cit. Waddingum. Hinc in Glossario Cangii ad Script. med. & inf. Latin. legitur: de Pœnitentia Sancti Francisci. Vide Continentes:
  •  
    (c) Apostolicas: Nempe Nimis patenter anno 1227., & Detestanda anno 1228. ab ipso Gregorio editas, & superius exhibitas, quæ alias etiam Honorii iii. confirmare testantur.

Informations

Document
bullarium-franciscanum admin (IRHT), dans  Bullarium Franciscanum
Bullarium Franciscanum romanorum pontificum, dir. I. Heullant-Donat, éd. électronique TELMA (IRHT), Orléans, 2021 [en ligne], acte n. 151581 (bullarium-franciscanum-121), http://telma.irht.cnrs.fr/chartes/en/bullarium-franciscanum/notice/151581 (mise à jour : 15/12/2020).
http://telma.irht.cnrs.fr/chartes/en/bullarium-franciscanum/notice/151581
bullarium-franciscanum/notice/151581
XML  JSON