« bullarium-franciscanum-110 »

GREGORIUS &c.

Charissimo in Christo filio Illustri Regi Francorum a Salutem, & Apostolicam Benedictionem.

Utinam, fili charissime, sicut & Nos optamus, a primævo adolescentiæ tuæ flore assuefacias temetipsum timori Divini nominis, & amori; ac persistas jugiter in eodem, ut ei serviens, cui servire regnare est, verè regnes; & post præsentis vitæ inevitabilem exitum Regnum temporale commutes felici commercio in æternum; ac de te, sicut de claræ memoriæ Progenitoribus tuis verè valeat prædicari, quod Christianissimus es inter Principes Christianos; ut a devotione Ecclesiæ Matris tuæ nullo unquam movearis impulsu, sed eam, quæ te sincero cordis affectu diligit, & honorat, tu quoque pio devotionis proposito venereris, ut præter laudem hominum mercedem consequaris æternam. Gravem siquidem Venerabilis Fratris nostri Rothomagensis Archiepiscopib recepimus questionem, quod cum in spiritualibus, & temporalibus nullum post Deum præter Nos judicem habeat; de antiqua Rothomagensis Ecclesiæ libertate, ac ipsius consuetudine hactenus observata, tu quorumdam ductus, & utinam non seductus, consiliis contra prædictorum Progenitorum tuorum consuetudinem, qui Ecclesias, & viros ecclesiasticos pio semper, & prompto venerabantur affectu, ipsum ad tuam præsentiam evocans eum inducere voluisti, ut super eo, quod in quosdam excommunicationis sententiam promulgarat, ac quibusdam aliis articulis sub tuo examine responderet. Et quia ipse non solum juri suo periculum, verum etiam subversionem metuens Ecclesiasticæ libertatis id efficere denegavit se, ac bona ipsius Ecclesiæ protectioni Sedis Apostolicæ supponendo; motus ex hoc graviter contra eum, ipsum Domibus, Villis, Terris, redditibus, & possessionibus ad Ecclesiam suam spectantibus pro tuæ voluntatis arbitrio spoliasti, ea per Ministros tuos faciens detineric. In quo tantò tibi tamquam filio Ecclesiæ speciali dolemus, & timemus amplius, quantum personam tuam inter ceteros Principes Christianos sinceritatis brachiis specialibus amplexamur; cum Regnum Francorum benedictum adeo semper in Apostolicæ Sedis devotione permanserit, ut ab ea nullo unquam, sicut credimus, sit tempore discessurum. Monemus itaque Celsitudinem Regiam, rogamus, & obsecramus in Domino Jesu Christo, quatenus erigens oculos tuæ mentis ad illum, qui est Rex Regum, & Dominantium Dominator, ac pensans illum devotionis affectum, quem præfati Progenitores tui ad Deum, & Ecclesiam habuerunt, præmissa omnia taliter corrigas, & emendes, quod existat tibi meritorium apud Deum, & apud homines gloriosum; & ex hoc Ille, qui te præ cæteris Regibus exaltavit, pleniorem tibi gratiam conferat in præsenti, & abundantiorem gloriam in futuro. Si quid autem juris in præmissis, & aliis adversus eumdem Archiepiscopum Regalis excellentia se habere proponit, faciemus justitiæ plenitudinem exhiberi &c.d

Datum Anagniæ iii. Kal. Decembris Pontificatus Nostri Anno Sextoe.