Bertram, évêque de Metz, écrit au pape Innocent III pour lui demander de trancher en appel une affaire entre Godefridus de Leyr et l’abbaye Saint-Symphorien de Metz

Sanctissimo patri ac domino suo Innocentio, summo pontifici, B[etrannus], Mettensis ecclesie minister humilis, tam devotum quam debitum omnimode subjectionis et obedientie famulatum. Volentes in necessitate eis que partim vidimus, partim quoque probabilium personarum assertione didicimus nostrum prebere testimonium, processum et ordinem cause diu inter abbatem Sancti Symphoriani Mettensis et Godefridum de Laiez presbiterum ventilate, et nunc a nobis ad audientiam vestram per appellationem translate, paternitati vestre duximus intimandum. Cum enim militis jam retroactis diebus Egidius, nepos prefati God[efridi] decimam de Areies ad abbatiam Sancti Symphoriani juste pertinentem violenter occupasset, et tam in detentione quam occupatione ipsius memorati God[efridi] consilium et auxilium habuisse diceretur, predictus abbas in synodo, coram bone memorie Mettensis ecclesie primicerio et archidiacono loci, Hug[o], super hiis querimoniam de ipso sacerdote deposuit. Ipse vero, tactis sacrosanctis Evangeliis, quod in hoc malefitio nullum nepoti suo consilium vel auxilium ex tunc in antea [prestaret ?] coram sacerdotibus, clericis qui synodo intererant, juravit. Et nisi ab ista cessaret malitia ipsum deinceps nec in hospitio nec in mensa reciperet, sed et eum a suo faceret consortio, simul et auxilio pentius alienum. Qui sicut abbas nobis in synodo nostra nuper preterita gravi conquestione monstravit prestitum parvipendens juramentum, ipsam hoc anno decimam illicite vendidit. Abbate itaque ipso suam super hoc probationem offerente, res usque ad diem Quadragesimum fuit judiciata. Ipsis autem ambobus ad nostram presentiam ea die redeuntibus et abbate ad probationem prius oblatam parato iterum et munito presbiter jamdictus ante litis ingressum a nullo gravamine cancellario nostro W. Sancti quoque Vincentii Mettensis ac Saline vallis abbatibus aliisque multis presentibus ad sedem apostolicam appellavit domenica qua cantatur Letare Jherusalem, diem appellationis instituens quam abbas in purificatione beate Marie coartavit.