< Ordonnance 8

Paris, Centre historique des Archives nationales, JJ 57 F. 57.

C’est l’ordenance de l'ostel Ph. roy de France et de Navarre qui ores est, faite au bois de Vincennes ou mois de decembre l'an m ccc xvi.

Table

Chambre , Les maîtres de l'hotel , La chancellerie , Le confesseur , La chapelle , L'aumône , La chambre aus deniers , Les six métiers Ce sont les 6 offices de l''ostel le roy , Eschançonnerie , Cuisine , Fruicterie , Escuierie , Fourriere , Vernerie ,

Ordonnance

• • 1.Premierement en l'ostel le roy n'aura nulle chambre ce ne sont les 6 ci aprés nomees, c'est assavoir le chancelier, le conffesseur, l'aumosnier, les chappelains, les mestres de l'Ostel et la Chambre aus deniers. Et seront ces 6 chambres hebergiees par les fourriers le roy et n'auront nul autre fourrier pour eulz. Et leur sera livré par devers la fourriere ce qui leur appartendra a leurs chambres si comme il est devisé ci dessous sus chascun office. Et est assavoir que nul n'aura chambre en l'ostel le roy que celles dessus dites, mes se il avenoit que li rois feust hebergiez loing de ville et mons. de Vallois son oncle, mons. de La Marche son frere, mons. de Evreus son autre oncle nos autres grans seigneurs et nos grans dames y venoient et l'en leur prestast hostel de grace, l'en ne leur deliverroit riens par devers les mestiers, ainçois feroient faire pourveance pour elz et pour leurs gens.
• <Chambre>a
  • 2.Item, la Chambre le roy aura pour chandelle a alumer pour toise et pour cier sanz estimacion.
  • 3.Item le roy aura 3 chambellenz, c'est assavoir messire Adan Heron, mons. Robert de Bones Mares et Le Borgne de Seriz, et prendra ledit messire Adan 4 prouvendes d'avainne et fer et clou et aura 3 s. 6 d. de gages par jour pour foin, pour hostelages, pour les gages de ses vallés et pour toutes autres choses et les 2 autres chambellenz n'auront chascun que 3 prouvendes d'avaine et 3 s. chascun de gages pour toutes ses autres choses et par ceste ordenance il mengeront en salle et sera serviz l'aisnez de la viande de la bouche et n'en aura a court que 1 ou 2 au plus se il ne sont mandez et n'aura chascun que 1 escuier mengant a court et aura chascun forge pour tant de chevaus comme il prendra de prouvendes d'avaine et chascun chambellenc aura pour son restor de son pallefroy 24 £ p., pour le sommier 16 £ et pour le roncin de son escuier 12 £, et auront chascun livroison de vin de couchier 2 quartes devers les bous et livroison de chandelle 2 kaiers, 12 menues chandelles, chascun, et une torche pour touz, mes il doivent rendre le tronçon. Et se il estoient a court touz trois mes qu'il feussent mandez du roy il gerroient touz 3 en une chambre se la royne y estoit et s'elle n'i estoit l'un en gerra aus piez du lit le roy et les 2 en une chambre et auront livroison de busche, 1 molle pour touz et s'il n'en y a que 1, il n'en aura que demi molle et aura coustes et feurre souffisaument. De leur robe le Consseil en ordenera.
  • 4.Item le roy aura tourjours a court 4 vallés de chambre, c'est assavoir le barbier, l'espicier, le tailleur et 1 autre vallet et non plus et prendra chascun une prouvende d'avaine, fer et clo et 13 d. de gages pour son vallet et pour toutes autres choses et eulz et leurs personnes mengeront a court et aura chascun une couste et 2 bothes de feurre.
  • 5.Item une guiete et 1 cordouanier qui mengeront a court et prenderont une prouvende d'avaine chascun, 13 d. de gages pour son vallet et pour toutes autres choses et une couste chascun et une bothe de feurre.
  • 6.Item 6 sommeliers de la chambre le roy qui menrront sa chambre, ses armeures, ses joiax et mengeront en salle et chascun aura 8 d. de gages par jour pour robes et pour tout, et chascun une couste et une bothe de fuerre.
  • 7.Item en la chambre le roy aura 1 chariot a 5 chevaux qui seront le roy et seront en l'escuierie et aura le charretier 12 d. de gages par jour et 60 s. pour robe pour tout l'an, et son valet 10 d. de gages par jour et 40 s. pour robe et ne mengeront point a court.
• <Les maîtres de l'hotel>b
  • 8.Le grant mestre de l'ostel aussinc comme mons. Mahi de Trie prenoit, c'est assavoir que il mengera en salle et n'aura que 2 escuiers menganz a court et prendra livroison de vin de couchier 1 sextier, c'est assavoir une quarte devers le roy et 3 quartes du commun, et de la chandelle 1 septain, 1 cinquain et 2 quaiers et une douzaine de courtes chandelles et une torche dont on rendra le tronçon au matin et en la fourriere il aura 6 coustes et une charretee de feurre et 1 moolle de busche et pour toutes ses autres choses il aura 20 s.t. par jour et 5 prouvendes d'avaine.
  • 9.Des autres maîtres de l'ostel aura tourjours a la court 2 et aura chascun 1 escuier mengant a court et aura chascun 3 prouvendes d'avaine, fer et clo et restor de leur palefrois de leurs sommiers et des roncins a leurs vallés aussinc comme les chambellenz et auront livroison chascun 2 quartes de vin de couchier et 2 kaiers et 12 menues chandelles et torche quant il en auront a faire et seront hebergiez touz en une chambre par tout ou l'en pourra et aura chascun devers la fourriere 5 coustes et feurre a l'avenant et 1 moolle de busche et demi moolle se il n'en y a que 1 et auront pour leur garçon qui ne mengeront point a court, pour foin et hostelage et toutes autres choses tiex gages comme il plaira au roy.
• <La chancellerie>c
  • 10.Le chancelier se il est prelat ne prendra riens a court et se il est simple clerc, il sera en l'estat que mons Guillaume de Nogaret estoit, c'est assavoir qu'il aura 5 sodees de pain, 3 setiers de vin l'un pris devers le roy et les 2 du commun et 4 pieces de cheir et 4 pieces de poulaille et au jour de poisson aura a l'avenant et prendra 6 prouvendes de avaine et ne prendra point de forge ne n'en ne li comptera riens pour mission que il face en cuisine n'en autre chose et aura en la fourriere 8 coustes et une charretee de fuerre et 2 moolles de busche pour soy. Et quant touz les notoires seront aveques lui il en aura 4 moolles et doit heberger avec lui son chaufecire, et celui qui rent les lettres et aura livroison de chandelle 1 septain 1 cinquain 2 quaiers, une pongniee de menue chandelle et troche, mes que l'en rende le tronchon. Et le chaufecire qui sera avec lui prendra une prouvende d'avaine et 1" d. de gages pour son vallet et pour toutes autres choses et hors de court avec le chancelier il prendra 2 s. 6 d. de gages pour toutes choses.
  • 11.De ceus qui suivront le roy pour les requestes aura tourjours a court 1 clerc et 1 lay et s'il sont plus il ne prendront riens s'il ne sont mandez et mengeront a court et seront hebergiez ensamble et s'il ne viennent mengier a court il n'auront nulle livroison et prendront les 2 chascun 3 prouvendes d'avaine et 32 d. de gages chascun pour leurs valets et pour toutes autres choses, et auront en la fourriere chascun 3 coustes et feurre a l'avanant et 1 moolle de busche se les 2 gisent enssamble et livroison de chandelle chascun 2 kaiers et 12 menues et ou temps ou il seront em Parllement, il auront chascun 12 d. de gages par jour et ne prendront nulle autre chose a court.
  • 12.Notaires suivanz le roy : 1 secretaire et 2 autres dont l'un sera de sanc, et non plus que ses 3, et prendra le secretaire 2 prouvendes d'avaine et mengera a court et aura fer et clo, et pour ses gages et pour ses vallés et pour toutes autres choses 19 d. par jour fors qu'il aura une quarte de vin de couchier de livroison, 2 kaiers et 12 menues chandelles et en la fourriere 2 coustes et 2 botes de feurre et demi moolle de busche et, s'il ont tous trois a court, s'il ne sont mandez les 2 qui seurvendront ne prendront riens. Les autres 2 notaires seront herbergiez devers ceus des requestes et mengeront a court et auront chandelle et livroison, 1 kaier et 12 menues chascun et n'auront point de vin de couchier, mes il auront 19 d. de gages chascun par jour pour leurs vallés et pour toutes les autres choses, mes qu'il auront 3 coustes et 6 bothes de feurre et demi moolle de busche se il sont hors de l'ostel au chancelier.
• <Le confesseur>d
  • 13.Le confesseur le roy mengera en sa chambre et aura livroison pour son compaignon et pour sa gent c'est assavoir potage, 2 paires de mes, et au jour que il jusnera des harens avec le potage et 2 soudees de pain, et au jour que il ne jeusnera 3 soudees de pain et pour lui tourjours 2 pains de bouche et aura 7 quartes de vin le jour, 3 quartes de la bouche et 1 setier du commun et en la fourriere 3 coustes et 5 bociaus de feurre et 1 molle de busche et livroison de chandelle, 3 kaiers et une dousainne de courtes et torches et rendra le tronçon. Et aura 4 chevaus qui seront en l'escuierie et mengeront toute sa gent par devers lui. Et est assavoir que quant aucun frere de son ordre li seurviendront, il aura pour chascun frere 6 denrees de pain et viande a l'avanant et ne les peut tenir que une disnee.
• <La chapelle>e
  • 14.Les chapelains : mons. Ligier, mons. Joudouin, mons. Thibaut. Le mestre chapelain aura 3 prouvendes d'avaine, fer et clou pour tant de chevaus comme de prouvendes et mengera a court et pour les gages de ses vallés et pour toutes autres choses il aura par jour 32 d. de gages et les autres 2 mengeront a court et auront les vallés pour eulz et pour leurs autres choses 19 d. de gages par jour et chascun aura 2 prouvendes d'avainne et fer et clo et gerront touz trois en une chambre et auront touz trois livroison de chandelle, 2 kaiers, une pongniee de menue, et torche et doivent rendre le tronçon, et n'auront point de vin de couchier, fors en lieu ou il n'en pourroient point trouver a vendre, qu'il en auroient une quarte et aura chascun en la fourriere 2 coustes et une bothe de feurre, et pour eulz touz 1 moole de busche et aura le mestre chapelain pour restor de son palefroy 10 £ p. et 8 £ p. pour son sommier.
  • 15.Item il y aura 2 clers de la chapelle dont chascun aura une prouvende d'avaine et forge et 13 d. de gages par jour chascun pour leur vallés qui ne mengeront point a court et pour toutes autres choses et gerront aveques les chapelains et auront en la fourriere 3 coustes et 5 botes de feurre.
  • 16.Item les 3 sommeliers de la chapelle mengeront en salle et auront 8 d. de gages chascun pour toutes choses et chascun une couste et une bote de feurre en la fourriere et riens plus. Item la chapelle aura livroison de chandelle si comme il apratendra.
• <L'aumône>f
  • 17.L'aumosnier sera tourjours a court et mengera a l'uis de la salle, et sera serviz au jour de char d'une piece de char et d'une de rost et au jour de poisson aussi sanz riens doubler et tout devers le commun et aura avaine pour 3 chevaus et 32 d. de gages pour toutes ses autres choses, mes que il aura livroison de vin, 2 quartes de couchier, et aura en la fourriere 3 coustes et feurre a l'avanant. Et quant le clerc de l'aumosne i sera, si aura encore 2 coustes et du feurre a l'avanant et 1 molle de busche pour eulz deulz et n'aura point de livroison de chandelle, mes se l'eschançon emporte aucune chandelle pour conduite la couppe le roy, l'aumosnier l'envoiera querre aprés l'eschançon et ne devra demander point de vin pour raison de ce ne des autres offices.
  • 18.Le clerc de l'aumosne mengera a court et prendra 2 prouvendes d'avainne et 19 d. de gages pour ses vallés et pour autres choses et n'aura point de livroison de chandelle, mes il aura vin de couchier une quarte.
  • 19.Item il y aura 6 vallés d'aumosne qui feront l'office sanz nulle ayde et mengeront en salle et s'il faut aucune chose il seront corrigié par les mestres de l'ostel qui les pourront changer quant il se forferont si comme il verront que bon sera et auront en la Chambre aus deniers pour robes et pour toutes choses par an 30 s. a la Toussains.
  • 20.Fuziciens dont il y aura tourjours 1 a court et mengera a court et prendra avaine pour 2 chevaus et 2 s. p. de gages par jour pour son vallet et pour toutes choses et aura une quarte de vin de couchier et chandelle, 1 kaier et 12 menues et aura en la fourriere 3 coustes et feurre a l'avenant et quant il serront touz enssamble il seront en 1 hostel hebergier et auront touz enssemble 1 moolle de busche et quant il n'en ara que 1 il n'aura que demi moolle de busche.
  • 21Cirurgiens dont il n'aura que 1, tourjours a court et aura 2 prouvendes d'avaine et mengera a court et aura 2 s. de gages par jour pour son vallet et pour toutes les autres choses, mes il aura une karte de vin de couchier et chandelle 1 kaier et 12 menues, sanz fourriere.
• La chambre aus deniers
  • 22.Il samble que il y ait assez d'un clerc mestre de la Chambre qui fera les poiemenz et se il plaist au roy il en y ait 2, chascun fera l'office par demi an, et ne vendra point l'un a court tant comme l'autre fera l'office et se il y vient il ne prendra riens et celui qui fera l'office aura 2 prouvendes d'avaine et forge et mengera a court et aura par jour pour ses vallés qui ne mengeront point a court 16 d. de gages et pour foin et autres choses 12 d. le jour, et aura 1 clerc a cheval qui mengera a court et une prouvende d'avaine et 13 d. de gages pour toutes les autres choses.
  • 23.Arnoul de Soissons, contreroolleur qui sera de par le roy sus les mestiers mengera a court et aura 2 provendes d'avaine et forge et pour ses vallés et pour toutes ses autres choses 19 d. de gages par jour. Et auront le dit paieur et le contre roolleur 2 quartes de vin de couchier et chandelle 2 quaiers et 1 cinquain pour la toise et une pongniee de menue chandelle et torche, et rendront le tronçon. Et aura toute la chambre en la fourriere 8 coustes et une charretee de feurre et 1 moolle de busche. Et n'aura point la chambre de fourriere.
  • 24.Item il y aura une charete a 3 chevaus qui menrra le tonnel a l'argent et aura celui qui les menrra 5 s. de gages par jour pour ces 3 chevaus.
    Item il y aura 2 sommiers pour la chambre, qui seront en l'escuierie et portera l'un de ses commiers les bouges a l'argent et ira et vendra pour le querre, et l'autre sommier portera les escriz du paieur et 1 coffre et en l'autre coffre les escrips du contreroolleur et les registres. Et les 2 sommeliers, ce est a savoir Macé et Jehannot, qui menrront ces 2 sommiers, auront bouche a court et une couste en la fourriere et une bothe de feurre et n'auront point de kaier a souper et pour robes et pour toutes leurs autres choses il auront 8 d. de gages de chascun.
    
  • 25.La lavendiere du chief aura livroison chascun jour 12 denreees de pain et 1 setier de vin, 2 pieces de cheir, une poulle et riens plus et aura une prouvende d'avaine et forge et pour son vallet et toutes ses autres choses chascun jour 13 d. de gages.
  • 26.Huissiers d'armes : 3 c'est assavoir Jehan d'Ienville, Andri Tiart et J. Le Mire dont l'un sera tourjours a court et mengera en salle et aura les gages qui sont acoustumez et ne se partira point de court sanz congié des mestres sus paine d'estre privez de son office, et aura chascun en la fourriere une couste et 2 bothes de feurre.
  • 27.Les sergens d'armes qui seront a court, il mengeront a court et ne se meuvent de leur ordenance. Et est assavoir que les huissiers d'armes et tant de sergens d'armes comme il y aura a court, n'auront que 3 kaiers de chandelle et demie pongniee de menues et 1 setier de vin pour eulz touz au couchier, et quant il ne seront que 2 ou 3 il n'en auront que 2 quartes et chascun aura une couste et 2 bothes de feurre.
• <Les six métiers>g Ce sont les 6 offices de l''ostel le roy
  • 28.Premierement en la Paneterie aura 4 penetiers, c'est assavoir Guillaume le Viscomte, mestre panetier, Thomas de Belloy et Pierre de Tramblay et un autre qui i doit estre mis par le roy et en seront tourjours les 3 a la court et servira l'un devers le roy et les autres 2 devers le commun, l'un aus premiers et l'autres aus derreniers, et chascun des 3 aura 2 prouvendes d'avaine et forge et vin de couchier chasucn une quarte et 1 kaier et 12 menues chandelles et chascun pour ses vallés qui ne mengeront point a court et pour toutes ses autres choses 2 s. p. de gages par jour. Et doivent les panetiers acheter le pain et faire venir et recevoir par compte, et quant le roi sera a sejour il achateront du blé pour savoir se il auront bon marchié de pain, et feront venir le pain en salle et le compteront par dousainnes si comme l'en a acoustumé. Et y aura 1 clerc de par le roy qui est appelez Perrot de Morgnival et saura la despenses du pain et aura une prouvende d'avaine et 13 d. de gages par jour pour son vallet qui ne mengera pas a court, et pour toutes ses autres choses, mes il aura 8 petites chandelles de livroison et en la fourriere une couste et 2 botes de feurre et se il y avoit defaute de panetier il servira en salle.
  • 29.Item il y aura 3 portes chappes qui mengeront a court et auront chascun 4 d. de gages par jour pour toutes leurs autres choses.
  • 30.Item il y aura 2 aides qui mengeront sus le sac sanz autre chose.
  • 31.Item il y aura 1 bachoier a 2 chevaus qui mengera en salle et aura 40 d. de gages par jour pour ses chevaus et seront prisié.
  • 32.Item il y aura 3 sommiers de la penneterie et seront sommeliers Malebeste et Perrot des Nappes et 1 autre que l'en querra et mengeront en salle touz trois et auront chascun 2 d. de gages par jour pour toutes choses et une couste et une bothe de feurre chascun.
  • 33.Item il y aura 2 aides qui mengeront a court et n'auront riens plus.
  • 34.Item la Paneterie aura 12 chandelles mesnues de livroison, item la chambre des nappes autant.
  • 35.Item Jehan de Vernon fera le pain de bouche, les pastez et les oublies et l'en fera l'en a lui marchié du pain et de la pastoierie faite et ne fera l'en que 10 sodees de pain de bouche et 6 denreees d'oublees le jour et prendra ledit Jehan une prouvende d'avaine et forge et 6 courtes chandelles de livroison et 13 d. pour son vallet qui ne mengera pas a court et pour toutes autres choses.
  • 36.Item la lavendiere aura pour le cent de nappes laver 5 s. et les touailles davantage.
  • 37. Item, les panetiers feront savoir aus mestres de l'ostel le nombre de leurs nappes et n'en changeront nulles ne n'achateront autres sanz leur congié et de ce que il rendront a l'aumosnier il prendront lettres ou autrement les mestres ne recevront point leur compte.
    Item les panetiers ne se pourront partir de court sanz prendre congié aus mestres de l'ostel et s'il le font il en seront puniz et privez de leurs offices par les mestres de l'ostel et aussi les autres mestires et officiaus ci dessouz nommez.
    
• Eschançonnerie
  • 38.En l'Eschançonnerie aura 6 eschançons, c'est assavoir Manessier de Moncy pour la bouche, Poillevillain, Jeahn de Rameru, Jehan Villain, Jehan de Cabourc et Pierre de Bantellu, dont il y aura 3 a court sanz faillir l'un pour la bouche et les 2 autres pour le commun servir, l'un aus premiers et l'autre aus derreniers, et prendront chascun 2 prouvendes d'avaine, 1 kaier et 12 menues chandelles et 2 s. pour chascun pour leurs vallés qui ne mengeront point a court et pour toutes autres choses et celui de la bouche n'aura point de vin devers le commun. Et doivent prendre garde les echançons devers le commun que les bous soient souffisaument empliz et de droite moison et ne fera l'en livroison de vin fors en salle aus bous, et livroison de vin de couchier sera faite a droite heure ordenee, et qui n'i vendra il perdra livroison.
  • 39.Item i y aura devers la bouche 3 barilliers Perrot qui fu a mons. RobertBaudoin et l'autre Guillot Poillet et menront 2 des sommiers de l'eschançonnerie et 1 autre que l'en querra qui menra le tiers et mengeront a court et aura 13 d. de gages chascun par jour et non plus mes qu'il auront une couste chascun et une botte de feurre.
  • 40.Item Hermant demeure a cheval et aura une provende d'avaine et 13 d. par jour pour son vallet qui ne mengera pas a court et pour toutes autres choses.
  • 41.Item il y aura un garde huche devers la bouche qui demourra tourjours en l'Eschançonnerie et gardera au chemin la charette ou la huche sera portee a mestre le vin et mengera a court et n'aura pour toutes autres choses fors que il aura une couste et une bothe de feurre en la fourriere.
  • 42.Item il y aura Raoul d'Aubegny, clerc de par le roy qui prendra garde de la despensse du vin et mengera a court et prendra une prouvende d'avaine et forge, et 8 courtes chandelles et 13 d. de gages pour son vallet, qui ne mengera pas a court, et pour toutesk autres choses et servira de vin en salle s'il y avoit defaute d'eschançon.
  • 43.Item, devers le commun, aura 2 boutiers, c'est assavoir Adenet de Paris et Yvonnet le Breton et mengeront en la salle et aura chascun 3 d. de gages pour toutes choses.
  • 44.Item, il y aura 2 porte bous qui ne mengeront point a court et auront chascun 8 d. de gages pour toutes choses.
  • 45.Item, il y aura 2 aydes avec pour emplir les bous qui ne mengeront point a court et auront chascun 8 d. de gages par jour pour toutes choses.
  • 46.Item, Jehan de Saint Jasque qui gardera les vessiaus et le vin du commun et en aura ce qu'il a eu autrefois.
  • 47.Item il y aura un potier mengant a court et fera l'en a li marchié des pos.
  • 48.Item celui qui sera maderinier, qui servira de voirres, de hanaps et mengera a court et aura 3 d. pour toutes autres choses.
  • 49.Item il y aura une charrete a 3 chevaus qui aura 5 s. par jour et menrra la huche et ne mengera point le charretier a court.
  • 50.Item il est assavoir que les eschançons ne se pourront partir de court sanz congié des mestres si comme il est ci dessus dit en la Paneterie et se doivent ordener si qu'il en y ait tourjours 3 a court sanz defaute.
  • 51.Item il y aura Geffroy de Saint Reverien, acheteur des vins ou 1 vallet tourjours pour lui qui mengera a court et li liverra l'en hostel et riens plus et les eschançons li doivent commander le service de querre le vin et quant le roy vendra ou il devra desner ou gesir, les eschançons devront savoir de lui quel marchié de vin il aura trouvé et prendre le meilleur pour le roi.
  • 52.Item 7 vallés dont les 4 seront tourjours a court et aura chascun une prouvende d'avaine et 13 d. de gages pour toutes choses, et son nommez les noms des 7 vallés : Jehan Le Clerc, Jehan de Biaugieu, Jaquet de Chambeli, Jehan de Maucreu, Jehan des Barres, Girardin de Troies et le frere Michiel Pasmé.
• Cuisine
  • 53.En la cuisine aura 2 escuiers dont l'un sera tourjours a court et prendra 2 prouvendes d'avaine et forge et livroison de chandelle 1 kaier et 12 menues et une quarte de vin de couchier, et 2 s. de gages par jour pour son vallet qui ne mengera pas a court et pour toutes ses autres choses et ne s'entremetra d'acheter ni de querir nulle chose et sera a servir en salle chevailliers, chapelains et sergenz d'armes, et le queu du commun servira les autres personnes qui seront en salle et respondra aus mestres de son office.
  • 54.Item il aura 2 queus devers la bouche dont il y aura tourjours 1 et prendra autant comme l'escuier dessus dit.
  • 55.Item 2 aydes pour la bousche dont il y aura tourjours un, qui prendra une prouvende d'avaine et 13 d. par jour pour son vallet qui ne mengera pas a court et poru toutes autres choses et 6 courtes chandelles de livroison.
  • 56.Item il y ara un hasteur, Guillot le Goulu et Cossart , souffleur, tourjours sans partir de court et mengeront a court et n'auront nulle autre chose que leur droit.
  • 57.Item 2 pages tourjours mengenz a court qui auront chascun 3 d. par jour sans plus.
  • 58.Item 2 enfans mengans a court qui auront chascun pour le mois 2 s. 6 d. pour solliers.
  • 59.Item Juliens, huissier de la bouche, mengera a court et aura 4 d. de gages par jour et riens plus.
  • 60.Item Thomassin qui sera saussier aura 4 d. par jour de gages et menrra le sommier de la sausserie et gardera les espices et les liverra par pois et sera au mortier tant qu'elles soient broiees et aura 12 chandelles courtes pour livrer la sausserie et une couste et une bothe de feurre et aura une ayde qu'on apelle Thevenot qui ne mengera point a court mais aura le pain du sel devers la bouche.
  • 61.Item au Commun 3 keus dont il en aura tourjours les 2 a la court et sera l'un gardemenger et prendront 8 chandelles, avoine et argent pour leurs vallés qui ne mengeront point a court, aussi comme les keus de la bouche.
  • 62.Item 2 aydeurs, Adam de Taverny et Maci de Rochefort prendront chascun autant comme 1 des aydeurs de la bouche.
  • 63.Item 2 hasteurs, Guillot du Gardemenger et Hanequin Maubue, et prendront aussinc comme celi devers la bouche.
  • 64.Item 2 souffleurs, Pontalie et Renier qui mengeront a court et n'auront riens que leurs droits.
  • 65Item 1 magnen mengant a court et n'aura riens plus
  • 66.Item 4 enfanz menganz a court, et aura chascun 2 s. 6 d. pour le mois pour sollers.
  • 67.Item Jehannot Petit clerc, mengera a court et aura 4 d. de gages par jour et menrra le sommier de la sausserie et des espices et aura 12 menues chandelles.
  • 68.Item 3 vallés en la Sausserie souz lui, qui ne mengeront point a court, mes il auront le pain du sel devers le commun et avant que le saussier moeille les escuelles il les doit hoschier et compter en la presence d'un des keus ou d'un des aideurs et les fere recueillir par ses vallés en salle et celles qui auront esté hoschieees ne doivent pas estre comptees l'endemain.
  • 69.Item il y aura 1 bouchier et 1 poulaillier qui mengeront a court et n'auront riens plus.
  • 70.Item 1 huissier de la cuisine mengant a court et aura 4 d. par jour pour toutes choses.
  • 71.Item Nicholas de Neuville, clerc, qui sera en la cuisine et mengera a court et aura une prouvende d'avaine et 13 d. de gages par jour pour son vallet qui ne mengera pas a court et pour toutes choses et 8 couretes chandelles de livroison.
    Et ne se pourra nul partir de court sanz le congié des mestres sus la painne contenue ci dessus en la Paneterie.
    
• Fruicterie
  • 72.En la Fruicterie, aura 3 fruictiers, c'est assavoir Geffroy de la Chapelle, Jehan de Troies et Guiot de Houdenc, dont il n'aura a court que les 2, et prendra chascun 2 prouvendes d'avaine et 19 d. de gages par jour pour son vallet qui ne mengera point a court et pour toutes ses autres choses et vin de couchier une quarte.
  • 73.Item il y aura 2 sommeliers qui menrront 2 sommiers, l'un du fruit et l'autre de la chandelle et mengeront a court et auront chascun 8 d. de gages pour toutes choses et aideront a faire le service en salle sanz nulle autre ayde.
  • 74.Item 4 vallés de la fruicterie et un chauffecire qui mengeront en salle et auront chascun 3 d. de gages et riens plus.
  • 75.Item il y aura 1 porteur pour les torches, qui aura 8 d. de gages par jour et riens plus et ne demourra point a court puis qu'il aura mis jus les torches.
  • 76.Item Guillaume de Monstereul demeure a cheval en l'ordenance du roy.
  • 77.Item en la fruicterie aura 1 chariot que l'en querra.
  • 78.Et ne s'en pourra nul partir de court sanz le congié des mestres sus la paine qu'il est contenu en la Peneterie.
  • 79.Et servira l'en de fruit en salle en la maniere qui s'ensuit, c'est assavoir la table le roy, les chambellans, les chevaliers, les mestres de l'ostel, les chapelains, les clers, les vallez de chambre et les mestiers. Et le commun sera servi de nois tant seullement, ne mes que en karesme qu'en leur donrra figues et raisons et nois et est a entendre que les escuiers le roy, huissiers d'armes et sergenz d'armes seront servi de fruit comme les chiez des mestiers.
• Escuierie
  • 80.En l'escuierie, aura 4 escuiers dont il y en aura tourjours 2 a la court, c'est assavoir 1 pour le cors et 1 pour le commun. Et n'aura chascun que 2 prouvendes d'avaine et forge et une quarte de vin de couchier chascun et chandelle de livroison un septain pour voir les chevaus et chascun pour soi un kayer et 12 menues chandelles et 16 d. de gages par jour pour son vallet et pour toutes autres choses. Et saura celui du commun de qui le fain et l'avaine sera achetee et qu'il aura cousté et sera au livrer l'avaine.
  • 81.Item il y aura 2 mareschaus, c'est assavoir Hemri et Jehannot et mengeront a court et chascun une provende d'avaine et 8 d. de gages pour son vallet et pour toutes autres choses et 12 courtes chandelles de livroison chascun et chascun prendra pour robe 100 s. en la Chambre aus deniers a 2 termes et la defferre sera le roy.
  • 82.Item 3 vallés de forge menganz a court, et ne prendront nulle autre, mes il y aura 2 sommiers de la forge que les 2 vallés des 3 desuss dis menrront et l'autre ira a pié, et auront touz trois par an chascun 60 s. pour robe.
  • 83.Item il y aura une charete a 3 chevaus qui seront le roy et aura 5 s. par jour pour toutes choses.
  • 84.Item vallés d'estables et chevaucheurs, 8 qui mengeront a court et auront 60 s. pour robe a 2 termes et riens plus, et les 4 seront tourjours a court pour faire office de l'escuierie et les autres 4 seront pour aller hors porter lettres, et leurs chevaus en l'escuierie.
  • 85.Jehan de Chevreuse pour les palefrois mengera a court, son cheval sera en l'escuierie, et aura 60 s. pour robe et riens plus.
  • 86.Mellenc des coursiers tout enssinc.
  • 87. Item Jehan le clerc de l'escuierie mengera a court et aura une prouvende d'avaine et 8 d. de gages pour son vallet et pour toutes autres choses, et aura 8 chandelles courtes et 1 couste sans feurre.
    Et est assavoir que nul cheval ne sont acheté par les escuiers fors du commandement le roy ou par le congié d'un des mestres d'ostel et quant il seront achetez il seront monstrez a ycelui mestre pour ce qu'il sache de qui il auront esté achetez et combien chascun aura cousté et lors il les fera mettre telle part comme il voudra et verra que il sera a faire et deffendra que nul n'en soit bailliez fors par le roy ou par lui, et toutes fois que les escuiers lesseront chevaus en chemin pour essoingne de maladie ou pour toute autre cause il le feront savoir ce jour mesmes aus mestres de l'ostel ou en la Chambre aus deniers.
    
  • 88.Item toutes les fois que les escuiers vendront compter de leurs mises de l'escuierie et de leur despensse, il ne le pourront faire se l'un des mestres de l'ostel n'i est appelé. Et ne s'en partira nul de court sanz congié des mestres sus peine d'encourre la paine contenue en la Paneterie, excepté l'escuier du cors qui prendra congié au roy.
  • 89.Ce sont les chevaus qui doivent estre en l’escuierie.
    Premierement pour le cors le roy, pallefrois, courciers et autres tant qu'il li soufira.
    Item pour les 2 escuiers 4 chevaus et non plus, 2 pour les mareschaus, 2 pour les sommeliers de forge,; 2 pour vallés d'estable, Jehannot de Chevreuse et Mellin, 8 pour chevaucheurs et autres vallés d'estable, 1 pour le clerc de l'escuierie, pour la chapelle 3 sommiers, 4 chevaus pour le confesseur, 2 sommiers pour la Chambre aus deniers, pour la Chambre le roy 6, et pour le chariot le roy 5, pour la Paneterie 3 sommiers, pour l'Eschançonnerie 3 sommiers, pour la Sausserie 2? pour la Fruicterie 2 sans les pallefrois et les courciers que il plaira a ordener au roy et aura pour 2 chevaus garder 1 vallet a 12 d. de gages pour toutes choses.
    Somme : 49 chevaus en l'escuierie sanz seus du cors le roy que on estime a 24.
    
• Fourriere
  • 90.En la fourriere 3 fourriers : Broudier, Michiel Pasmé, Estienne le Chien, dont l'un sera tourjours a court et aura 2 provendes d'avaine et forge et mengera a court et aura 19 d. de gages par jour pour son vallet qui ne mengera pas a court et pour toutes autres choses et une quarte de vin a couchier.
  • 91.Item il y aura 3 vallés a cheval, c'est assavoir Le Clerc, Renaudin et un autre que l'en querra, dont il aura tourjours 2 a court et aura chascun une provende d'avaine et 13 d. de gages pour toutes autres choses et feront le service eulz meesmes ou il en seront privez par les mestres de l'ostel.
  • 92.Item il y aura en la fourriere 12 aides et non plus et ne mengeront point a court et aura chascun 8 d. de gages pour toutes choses et porteront le feurre, les coustes et la busche es chambres le roy sans nulle autre ayde et ne liverra l'en riens a nulles perssonnes fors aus 6 chambres si comme il est ci dessus ordené.
  • 93.Item il y aura 1 servant de l'iaue qui mengera a court et aura 3 d. de gages pour toutes choses.
  • 94.Item le fourrier ne pourra mestre ayde en la fourriere ne hoster par son serement ce n'est par le congié des mestres de l'ostel.
    Item la fourriere aura pour faire le service 30 courtes chandelles et non plus.
    Item il ordené que toutes manieres de genz gerront en leurs hostieus sans gesir chiez le roy.
    
  • 95.Item huissiers 5, c'est assavoir Ollivier, Thibaut, Pheliset, Geffroy et Thomassin, dont il y aura a court tourjours les 3 et si ordeneront par temps et aura chascun une prouvende d'avaine et 19 d. de gages pour toutes ses autres choses et livroison de chandelle, 1 kaier, et 6 courtes et non point de livroison de vin.
  • 96.Portiers 4, dont les 3 seront tourjours a court, et aura chascun une prouvende d'avaine et 13 d. de gages pour toutes choses, et aura la Porte 1 cinquain, 1 kaier et 12 courtes chandelles, et chascun portier pour soy 6 courtes chandelles et auront pour touz demi moolle de busche a la porte et une couste et une bothe de fuerre chascun.
  • 97.Item vallés de porte : 3 qui mengeront a court et n'auront autre chose mes que eulz 3 enssemble auront 1 kaier pour aler esveillier et chascun une couste et une bote de feurre.
  • 98.Item, Crasse Joe, roy des ribaus, et ne mengera point a court, mes il aura 6 denrees de pain, 2 kartes de vin et une piece de char, une poulle et une prouvende d'avaine et 13 d. de gages et sera montez par l'escuierie, et se doit tourjours tenir hors de la porte et garder illeuc qu'il n'i entre que ceulz qui y doivent entrer.
  • 99.Item 2 vallés trenchanz dont l'un sera tourjours a court et aura 2 prouvendes d'avaine et 19 d. de gages pour toutes ses autres choses, et aura 1 kaier et 12 courtes et vin de couchier une quarte.
  • 100.Item Escuier recueillira la vessellemente d'argent et ne mengera point a court et aura pour toutes choses 2 s. de gages et ne doit point entrer en salle tant comme l'en mengusse.
• <Vernerie>h
  • 101.Et le fureteur mengera a court et aura 18 d. de gages par jour hors et ens et non plus et furés et fillez paiez en la Chambre aus Deniers.
  • 102.Item le perdrieur mengera a court et aura hors et ens 18 d. de gages et riens plus.
  • 103.Item les mestres des forés, s'il viennet a court, il ne prendront riens fors que bouche a court.
  • 104.Item veneurs, archiers et de brachés a la volenté le roy.
  • 105.Item est assavoir que les huissiers de salle sitost comme l'en aura crié "aus queus" feront vuidier la salle de toutes gens fors que de ceus qui y doivent mengier et les doivent delivrer a l'huis de la salle aus vallés de porte et les vallés de porte aus portiers et les portiers doivent tenir la court nepte et les livrer au roy des ribaus, et li roys des ribaus doit garder qu'il n'entrent plus en la porte et sil qui sera trouvez defaillant de faire son office sera puniz par le mestre de l'ostel qui fera la journee.
    Et sont toutes chambres deffendues ne nul ne doit mengier en chambre par son serement se il n'est asigniez et ne durra la saingniee a toutes manieres de genz que 1 jour, et s'il avenoit que aucun soit malades outre 8 jours que il s'en voisent tantost en leurs mesons et que l'en leur face donner argent selonc ce que il seront.
    
  • 106.Item les mestiers jurront que il tendront sanz enfraindre ceste ordenance en la maniere que elles est faite ne l'auront par eulz chevaus ne gent a court plus que il est ordené ci-dessus, et se il savoient que aucun feist le contraire, il le doivent dire par leur serement aus mestres de l'ostel, ou autrement il seront privez de leur office et si doivent lesdis mestiers faire leur service en la maniere que il est dessus ordené et vendront au jour que li roy sejournera dedens la premiere messe le roy pour compter et se le roy chevauche, le clerc de chascun office des mestiers prendra dés le soir ses parties et vendra avec l'un des mestres compter l'endemain a heure de la messe, et se il en defaillent il seront puniz par les mestres de l'ostel et avec ce il Ms :prendronti leur avaine et leurs gages de la journee.
  • 107.Item, les mestiers et les vallés des mestiers demouront a court le temps d'uns gages et seront aus comptes d'iceus gages et se il ont oublié a compter de leur office, il leur seroit refusé a compter es gages ens, et seront recouvré sur eulz sanz ce que le roy em paiast riens et ne donrront riens lesdis mestiers par leurs serements sanz congié des mestres.
  • 108.Par ceste ordenance li roys n'entent pas a nul de ses mestiers ou de ses officiaus qui sont a li donner congié, mes il li souffist le nombre devant dit. Et pour ce, quant l'un des dis mestiers sera hors, l'autre d'icelui mestier aprés si pourra retourner, si que le nombre des personnes soit tel comme il est dessus devisé.

Comment citer cette notice

Elisabeth   Lalou . " Ordonnance de l'hotel de Philippe V ( Paris, Centre historique des Archives nationales, JJ 57 F. 57. )", dans Ordonnances de l'hôtel du roi , Elisabeth   Lalou , Benjamin   Suc , éds, Orléans : Institut de Recherche et d'Histoire des Textes , 2006 . (Ædilis, Publications scientifiques, 5). [En ligne] http://www.cn-telma.fr/ordonnances/ordonnance 8 / .