< Ordonnance 2>

Paris, Archives nationales, JJ 57 F. 10 V.

C'est l'ordenance de l'ostel le roy Ph. pere mons. le roy qui ores est faites et acordees au bois de Vicenes l'an mil cciii^xxx , la semaine devant la Chandeleur.

Table

Paneterie , Eschançonnerie , Cuisine , Fruiterie , Escuierie , Chambre , Fourriere , Garde du sceau et notaires , La chambre aus deniers , Fisiciens , La chapelle ,

Ordonnance

• • 1.Premierement, tuit li panetier, li eschançon, li keu, li fruitier, li escuier et li fourrier feront serement que bien et loiaument au profit et a l'onneur du roy et de madame la reine il feront leurs offices a leurs pouers au meins de fraiz, de couz et despens que il porront.
  • 2.Item que en leur offices ou services il ne laisseront ne soufferont homme qui n'i soit especiaument establis de par le roy et par l'ordenance pour l'office faire et par nom, ne outre le nombre qui leur est bailliez et que il feront tuit et chascuns son office qui li est ordené de leur main sanz personne muer ne changer, se ce n'est par le maistre de l'ostel.
  • 3.Item que chose qui appartiegne a leur offices il ne penrront ne n'acheteront par chalandise, ne partiront aus choses vendues ne achetees pour le roy ou pour madame la reine, par quoy li rois en soit damagiez.
  • 4.Item que il ne donront li uns a l'autre ne a nul autre en l'ostel ou dehors pour porter a leur ostiex, li panetier chose qui apartiegne a eus, li eschançon, li keu, li fruitier, li escuier et li fourrier chose qui appartiengne a leurs maistiers sanz le congié du maistre de l'ostel.
  • 5.Item tuit li maistiers de l'ostel dessus nommé, chascun par lui, feront serement que il n'acheteront ne ne changeront chose qui appartiengne a acheter ou a changer en leur office qui ne soit a acheter ou a changer de necessité et que il ne le monstrent avant aus mestres de l'ostel ou a l'un d'eus.
  • 6.Item li panetiers par leurs seremens qui le doivent faire commanderont a rechergier par les chambres et par tout l'ostel les nappes et les toueilles et que cil qui les garderont [f^o11] n'en presteront nulles, se ce n'est pas leurs maistres et que il n'aient bon gaige du raporter.
  • 7.Autel feront li eschançon de ce qui appartient a leur office.
  • 8.Autel feront li keu des vaissiaus et de ce qui appartient a leur cuisine.
  • 9.Autel feront li fruitier et que il ne presteront nulle torche ne autre chose qui appartiegne a leur office.
  • 10.Autel feront li escuiers et li clers et cil qui mesurent l'aveine feront serement de 1 sextier d'aveine a la mesure de Paris 12 provendes bien mesurees et li seurcrois sera le roy et que il ne donront aveine nulle a home qui avoir ne la doie, ne a nul homme plus que son droit, ne ne soufferont cheval a ferrer a la forge le roy, qui ne soit a restor et que il ne presteront palefroy, sommier ne roncin se ce n'est du commandement le roy ou la reine ou des maistres de l'ostel.
  • 11.Ce serement feront tuit cil qui sont dessouz ceux des maistiers dessus diz, chascuns tant comme en droit lui appartient, et se il voient faire le contraire, il mettront peine a deffaire ou il le mettront a leurs maistres, se il ne le povoient amender.
  • 12.Il est ordené que garchon ne sommelier, se il n'a droit de mengier en l'ostel, puis que l'en aura crié "aus keus !" n'entre en l'ostel et tantost comme l'en aura crié "aus keus !", li portier feront vuidier la court de toute maniere de gent estrange et cercheront par chambres, par jardins et par preaus que gens n'i demeurent qui n'i doient de droit mengier en l'ostel et que nus ne passe la porte qui emporte ne pain, ne vin, ne viande, ne autre chose, de quoy li rois ne madame la reine soient damaigiez. Et feront de ce serement.
  • 13.Li huissier feront vuidier la sale quand l'en aura crié "aus keus !", de toute maniere de estrange gens ne n'i soufferront a demeurer mengier nulle personne estrange se ce n'est du commandement au maistre de l'ostel. Et de ce il feront serement.
  • 14.Il est ordené que tuit cil qui ont valez mengans a court les monsterront aus huissiers, aus portiers et aus valés de porte et ne les porront changer.
  • 15.Il est ordené que l'en penra en tele ville tel vin et que l'en achetera ne menra point de vin aprés le roy fors pour son cors seulement.
  • 16.Il est ordené que nul escuier ne estrange personne, se il n'est de la court, ne mengut a court se il n'est chevalier, mais li escuier y porront mengier 1 ou 2 selonc ce que il est grans hons, qui seront aus barons ou aus prelas, lesquiex li rois feroit semondre pour mengier avec lui.
  • 17.Il est ordené que li aumosniers fera serement que bien et loiaument il departira s'aumosne et que il ne lessera entour lui ne entour l'aumosne plus de personnes que il y en convient par necessité et le mains que il porra. Item que il fera le mains de peticions au roy que il poura et se il li comvient faire, il la fera juste et de pité et sans chalandise.
  • 18.Il est ordené que toutes fois que l'en comptera de gaiges, que tuit cil serement soient renouvelé et de ce sont chargié li maistre de l'ostel par leur serement.
• Paneterie
  • 19.Panetiers : 5. Robert de Meudon pour le roy, aura 3 s. de gaiges par jour, 3 provendes d'aveine, 2 valés mengans a court, vin et chandele, restor et forge si come il est acoustumé. Li autre qui sont pour le commun auront 2 s. de gaiges, 2 provendes d'aveine, 2 valés mengans a court et des autres choses si comme li diz Robert et il est acoustumé.
  • 20.Galerans qui fait le siege le roy aura 6 d. par jour, une provende d'aveine et 30 s. pour robe par an.
  • 21.Maistre Nicholas d'Aigleincourt fera la paie et aura 6 d. de gaiges, une provende d'aveine, 1 valet mengant a court, 100 s. pour robe et chandele si comme li autre ont acoustumé. Li clers soit ostez et 1 queu ou 1 aideur fera la paie si comme il seut estre1.
  • 22.Sommeliers des napes : 2. Huet de Saint-Germain, Gerart Lalemant. Chascuns aura 2 deniers par jour et chascuns 30 s. pour robe par an, 1 chandelle par 4 et 6 chandelles menues et 12 d. par jour pour vinaigre et pour moustarde. Et seront mis li sommier et li valés qui les garde par devers les escuiers.
  • 23.Porte chapes : 4. Vaulart, Rogerin, Doublet, Jehan, chascun 4 d. de gaiges par jour et mengeront a court, et auront ensemble 20 chandeles menues.
  • 24.Ly pastoiers fera les pastés le roy et dou commun et le pain si comme il a acoustumé et mengera a court touz seus, ou cil qui fera ceste chose pour lui quand il n'i sera.
  • 25.Li oubloiers aura 3 d. de gaiges, une provende d'aveine, 100 s. pour robe par an et pournuiles 8 d. par jour.
  • 26.La lavendiere des napes : une provende d'aveine, 12 menues chandeles et pour son vivre et pour sa maisniee 3 s. par jour et pour chascun cent de napes laver 3 s., et lavera les toueilles davantaige et fera la lavendiere serement et toute sa maisniee que tant comme l'en mengnee a court, elle ne sa maisniee n'enterront en sale.
  • 27.La charete de la paneterie aura si comme elle a acoustumé et quant li rois vendra a son sejour qu'il a ordené, elle sera ostee.
  • 28.Li maistres de l'ostel doit savoir le nombre des napes et des toueilles et n'en doit l'en nulles changer ne acheter se ce n'est par son congié.
• Eschançonnerie
  • 29.Il est ordené que l'en ne menra point de vin aprés le roy fors pour son cors et pour le commun l'en penra en tele ville tel vin ou plus prés de la ville que l'en poira.
  • 30.corsEschançons : 5. Autelz gaiges et d'autel condicion en toutes choses comme les 5 panetiers devant diz : Anceaus de Chaastenay, Symon de Gannes, Hebert Le Brun, Raoul Guillart, Renier de Senlis.
  • 31.Guillot de Machiau, sommelier de l'eschançonnerie, 6 d. par jour, une provende d'aveine, 100 s. pour robe et 1 valet mangant a court.
  • 32.Boutiers : 4. Robert, Guillot, Pierre, Naudet, chascuns 3 d. par jour et feront l'office en leurs propres personnes et mengeront a court si comme il ont acoustumé.
  • 33.Barilliers : 4, et menront leurs sommiers en leurs personnes et aura chascuns 2 d. pour son couchier et 25 s. pour robe pour tout l'an, et seront mis li sommier et li garchon qui les garderont par devers l'escuierie et 2 garchons qui les garderont qui seront a gaiges : Jehan, Richart, Girart, Maquerel.
  • 34.Guillaume d'Espone, 6 d. par jour, une provende d'aveine, 100 s. pour robe, 1 valet mengant a court.
  • 35.Colins qui sert des hanas 3 d. par jour tant seulement.
  • 36.Porte bous : 2, chascuns 4 d. par jour.
  • 37.La charrete des bous aura si comme il est acoustumé.
  • 38.Li potiers aura 2 s. pour ses pos par jour et mengera touz seus a court et n'aura point de livreson et n'achera l'en nus voieres a court fors aus festes anues.
  • 39.Il est ordené que l'en n'achera ne changera ne bous ne vousseaus ne barilz sanz le congié le maistre de l'ostel.
• Cuisine
  • 40.Keus , 6. Jaques, Adan Bouars : autex gaiges et d'autel condicion comme Robert de Meudon et Anseaus de Chastenay.
  • 41.Ph. le keus devers la bouche, a 4 provendes, 2 garçons mengans a court et prent ses gaiges en Chastelet.
  • 42.Jehan Guillot, Ph. Gauvrein, autiex gaiges et d'autel condicion comme li 4 panetier et li 4 eschançon pour le commun.
  • 43.Aideurs : 6. Alixandre, Pierre de Vittry, Pierre le fil Ph., Adan de Grés, Guillaume Le Poulailler, chascuns 12 d. par jour et provende d'aveine et garçon mengant a court.
  • 44.Saussier du commun, 4 d. par jour, une provende et n'aura que 2 valés qui penront le pain de sel, qui auront 6 d. de gaiges pour toutes choses et se prengne garde le <maistre d'ostel>a que l'en ne face trop de pain de sel.
  • 45.Le saussier devers le roy mengera a court et penra le pain de sel ou il a acoustumé et pour sausses 3 s. par jour et 30 s. pour robes par an.
  • 46.Jehan Broquun pour le commun, Amiquet pour le roy.
  • 47.Souffleurs : 4. dont li uns sera mengans et prendront le flambart en tele maniere que le potaige n'en vaille pis, et mengeront a court, c'est assavoir Li Briois, Roussel, Tregier et Fate Mare.
  • 48.Hasteurs : 7, c'est assavoir Andrieu, Gieffroy ly Meignon, Morequin, Jehan Le Goulu, Jehan Morel, Poire Mole, Guillaume Le Goulu.
  • 49.Paiges : 8, c'est assavoir, Jehannot de Vittry, Mignot, Jehannot de Chambly, Perrot le fix Andrieu, Guillot Mathiot, Maritnet, Jehannot le Maire et Do.
  • 50.Huissiers : 2, Loupart pour le commun et Baudet par devers le roy, chascuns a 4 d. par jour et chascuns 25 s. pour robe l'an.
  • 51.Rochart de Creeil, poissonnier, 12 d. par jour pour son cheval et pour soy heberger et mengera a court quant il y sera.
  • 52.Les 2 grans charetes de la Cuisine a 4 chevaus auront chascune pour toutes choses 8 s. par jour et doivent pour chascun cheval au roy 16 £ ou le cheval. Il est ordené que quant li rois venra a son sejour l'on ostera une des grans charetes.
  • 53.La charete du petit disner a 4 chevaus, aura 5 s. par jour pour toutes choses et le restor des chevaus par le pris qui mis y est.
• <Fruiterie>b
  • 54.Fruitiers. Lusions aura autelz gaiges comme li uns des maistiers et seront li remois portés aus coffres. Symons de Neaufle 6 d. par jour, une provende, 100 s. pour robe et restor.
  • 55.Valés du fruit. Do[...] Jehan Couronne, Guillot Cleremont, Guillaume Guillot, Girart le Bourgueignon et Chaufe cire, auront chascun 60 s. pour robe par an.
  • 56.Aides, 3, Colechon, Perrot, Rogerin mangeront a court tant seulement.
  • 57.Les sommiers du fruit et les garchons qui les garderont seront mis par devers les escuiers.
  • 58.Quant li rois venra a son sejour que il a ordené, l'en ostera le chariot du fruit.
  • 59.L'en serc vira a la table le roy de fruit et a la table ses freres si comme l'en a acostumé ; aus autres tables neent, fors que en quaresme que l'en servira de figues et de roisins et de nois tant seulement.
  • 60.Item, il est ordené que l'en fera 8 grans torches pour le roy et le remanant auteles comme l'en faisoit au temps le roy Loïs et ne prestera l'en nulles de ses torches a nul homme qui ait livroison de chandele.
  • 61.Li cierge de la chapelle seront raportés au coffre avant que l'en en baille nulz noveaus et les torches du dreçoir aussi.
  • 62.Il est ordené que, en quelque lieu que li rois viengne, li aumosniers aura tel luminaire comme il aura a sa table et ne poura demander autre.
• Escuierie
  • 63.Escuiers, 4. Pierre Gencien, Roger, Denise d'Argent et Perrot si comme il ont acoustumé et aura chascuns 1 valet mengant a court et sera li uns d'eus a livrer l'aveine toutes fois que il porra et fera l'on de chascun sextier d'aveine a la mesure de Paris 12 provendes bien mesurees et li seurcrois sera le roy, et venront compter li escuiers et li clers qui livre l'aveine au matin devant les maistres, des provendes d'aveine et des menues choses.
  • 64.Mareschaus 3 : maistre Jehan, maistre Richart et maistre Juncte qui seront en l'escuierie avec les escuiers et n'auront que 1 valet mengant a court, et auront de chascune douzine de fers 3 s. et la deffeire sera leur, tant comme il plaira au roy.
  • 65. : 5, et mengeront a court et auront leur louier par le marchié que les escuiers feront a eus.
  • 66.Valés de estables : Jehan le Flament, Guillequin, par devers Roger pour la besoigne le roy.
  • 67.Guillaume de Arras, Jehan de Crespy, Oudin de Chambly, Perrot de Compiegne, Jehannot du Louvre et Perrot Bernart : cil vont en messaigerie et n'auront que 2 s. le jour quant il seront envoiez hors.
  • 68.Jehan d'Erras pour gouverner les chevaus du tinel.
  • 69.Garin pour veoir l'aveine par le conseil des escuiers et pour mesurer.
  • 70.Perrot de Toutencourt pour porter l'arbaleste le roy et pour tendre.
  • 71.Raoul de Villeneuve pour garder les chevaus du sejour de Paris.
  • 72.Hanequin de Walescaire et Jaque le Chat, cil sont couratier pour le roy a Compiengne et ailleurs.
  • 73.Tuit cil valet d'estables dessus dit, chascuns a 60 s. pour robe pour tout l'an.
  • 74.Gilet le Keu, Raoulin du Somaige, Oudinet de Saci, Estienot Le Bourgeois, cil 4 vont aus hosteux pour pourveoir les chevaus.
  • 75.Robin Harel, Arnoul Roussel, Chaceur, Ph. Bourgeois, cil 4 sont en l'escuierie et les doit li rois pourveoir et s'en doivent aler.
  • 76.Li valés du tinel, a 2 chevaus, 1 valet et seront a gaiges.
  • 77.Li boureliers, 8 d. de gaiges et sera avec les escuiers.
  • 78.Il est ordené que li rois aura 6 coursiers, 6 palefrois et 3 grans chevaus pour son cors, 6 sommiers et 6 roncins pour sivre la court et 18 chaceurs desquiex l'en emmerra chascun jour que li rois ira en bois tant seulement.
  • 79.Il est ordené que tuit li menestrel qui estoient valet entier, que chascuns n'aura que 6 d. de gaiges et une provende d'aveine et 1 valet mengant a court. Tuit li autre valet penront 13 d. et une provende d'aveine si comme il est acoustumé.
• <Chambre>d
  • 80.Li granz maistres de l'Ostel, frere Arnoulz de Wissemale, aura restor de palefroy et de sommier des propres chevaus le roy et chambre en l'ostel ou si prez que l'en porra, 1 clerc, 2 escuiers mengans a court et 10 s. par jour de grace tant comme il plaira au roy.
  • 81.Maistres chambellans : messire Pierre de Chambly, cil qui a la chape, pour restor de cheval 40 £, pour sommier 20 £ et pour roncin 12 £, vin, aveine, forge et chandele si comme il est acoustumé, et est assavoir 5 s. de gaiges, 5 provendes d'aveine et 2 valés mengans a court.
  • 82.Les autres chambellans Hue de Bouville, messire P. de Macheau et Pierre de Chambly auront restor pour palefroy 32 £, pour sommier 16 £ et pour roncin 12 £, vin, aveine, forge et chandele si comme il est acoustumé, chascun 4 provendes, 4 s. et 2 valés mengans a court.
  • 83.Tuit cil des mestiers de l'ostel, soient clerc ou prestre, auront leur restor si comme il est acoustumé et comme l'en le puet savoir par la Chambre des comptes.
  • 84.Il est ordené que l'en n'achate nul cheval sanz le congié le maistre de l'ostel et quant il seront achaté, que l'en ne les baille a nulle personne que li maistres de l'ostel ne les voie.
  • 85.Valés de chambre, 7 ; Jehans li Barbiers, Yve, Richart le Barbier, Yve Grossetete, Malengreine, Victor et Jehan d'Avrenches, et aura chascuns une provende d'aveine, 10 d. de gaiges et 1 valet mengant a court.
  • 86.Gaites 2
• <Fourriere>e
  • 87.[Fourriers 2]. Guillaume de Pontoise et Nicholas de Fontaine Bluiaut. Chascuns 2 s. par jour et une provende d'aveine et 100 s. pour robe.
  • 88.Valés de fourriere 6, maistre Pierre qui aura 4 d. et une provende, Oudinet le Clerc, Henry, Geuffrin, Guiart de Bulles et Guiot Le Sec, chascun a 4 d. de gaiges et mengeront a court s'il n'est ordené. Il n'aura point de fourrier en la Chambre aus Deniers ni en la Chambre aus Clers.
  • 89.Il est ordené que l'en baudra pour 1 lit faire une couste, un coussin et 1 faissel de feurre a ceus qui devront lit avoir de la fourriere, si comme chapellain, clerc et tele maniere de gent, fors a celui qui porte le scel, qui aura 2 faissiaus de feurre et coutes, selonc ce que li fourrier verront que bien sera.
  • 90.Item il est ordené que l'en ostera 6 aides qui y sont quant il venra a son sejour qu'il a ordené.
  • 91.Item, li fourrier prendront la chambre du seel, des deniers, du maistre de l'ostel, des chapellains, de l'aumosnier, du confessor, en l'ostel le roy ou au plus prez que il porront.
  • 92.Il est ordené que li chapellain et li clerc de la chapelle geiront tout en 1 hostel et en une chambre, pour chascun 1 garçon et 2 garçons 1 lit.
  • 93.Il est ordené que li fourrier ne baudront feure, buche ne lit a homme qui ne le doie avoir par l'ordenance.
  • 94.Le chariot le roy a 5 chevaus aura pour toutes choses 8 s. 4 d. p. de gaiges et restor de cheval pour le pris qui y est mis, mes il doit pour chascun cheval au roy 16 £ ou le cheval.
  • 95.Huissiers de sale : 6, dont il aura touz jours 3 a court, Thibaut de Courbeul, Pierre de Braie, Symon de Boissoy, Nicholas de Mons, Gautier et Guillaume Bruiant et aura chascuns 2 s. 6 d. de gaiges, 2 provendes d'aveine et 1 garçon mengant a court.
  • 96.Portiers: Phelippot, Jehan Le Grant, Raoul de Saint-Germain, Raoul Le Charetier, Symonnet de Mante, Colin de Fonteine Bluiaut, chascun 6 d. par jour, une provende et un garchon mengant a court et 40 s. pour robe pour tout l'an.
  • 97.La lavendiere le roy 2 s. 2 provendes d'aveine, 2 pieces de char et une geline et 3 quartes de vin.
  • 98.Li clers de la Chambre aus Deniers fera la paie aus serjans d'armes et li clers des arbalestiers n'aura pas les 12 d. de gaiges que il souloit prendre.
  • 99.Li hosteus des sommeliers cherra du tout et seront mis li sommier de la chapele le roy, cil de sa chambre et tuit li autre des mestiers par devers les escuiers.
• <Garde du sceau et notaires>f
  • 100.Li arcediacres de Flandres qui porte le seel aura 6 s. de gaiges par jour, quant il sera a Paris, il aura 20 s. pour toutes choses et forge et mengera en son hostel.
  • 101.Maistre Guillaume de Crespy, 32 d. et 3 provendes d'aveine, ses manteaus, chandele et forge si comme l'en a acoustumé ; et quant il sera a Paris, 6 s. par jour et forge et mengera en son hostel.
  • 102.Guillaume d'Erquoil, Guillaume de Nongent, Jehan le Picart comme clerc de sanc, iront avec le roy et aura chascuns 12 d. de gaiges, 2 provendes d'aveine, 1 valet mengant a court et a gaiges, forge, chendele si comme il est acoustumé ; et quant il seront a Paris, il auront 6 s. pour toutes choses.
  • 103.Nicolas de Chartres, Robert de La Marche, seront a Paris pour les registres et pour le Parlement et auront chascuns 6 s. par jour et leur restor de chevaus.
  • 104.Gieffroy Le Gorring, Jehan Clersens, Jehan de Dyjon, maistre P. le Bourgh, Nichole de Loncpré, Richart de Mondidier, seront avec le chancelier et auront autiex gaiges a court et dehors comme Guillaume d'Arcuel et li autre qui sont aveques eus.
  • 105.Maistre Jehan Bequet, maistre Robert de Senlis, sont du Conseil aus Parlemens et ne prenront riens a court.
• La chambre aus deniers
  • 106.Maistre Jehan de Saint-Just aura 12 d. 2 provendes d'aveine, 1 valet mengant a court et 1 a gaiges, restor et chandele si comme il a acoustumé et sommier pour les escrips et 1 vallet a gaiges et une provende pour le sommier.
  • 107.Masitre Jehan Clersens, comme maistre Jehan de Saint Just, fors tant que il n'aura point de sommier pour les escris.
  • 108.Martin Marcel, pour compter les deniers, et a gaiges de valet entier.
  • 109.Mons. Oudart de Chambly, maistre Pierre de Condé, mons. Pierre de Maloués et li autre clerc de la Chambre aus deniers, quans il y seront, si comme il ont acoustumé.
• Fisiciens
  • 110.Maistre Robert le Fevre, 32 d., un valet mengant a court, 3 provendes d'aveine, restor, forge et chandele et 6 s. pour toutes choses quant li rois sera a Paris. Masitre Dudes aura ses manteaus et aveine quant il y sera mandez.
• La chapelle
  • 111.Chapellains 3, chascuns 6 d. , 2 provendes d'aveine, 1 valet mengant a court, leurs manteaus, 6 menues chandeles et leur restor.
  • 112.Clers de chapelle : 3 s. 6 d. de gaiges chascun, une provende d'aveine, 1 valet mengant a court, 6 chandeles menues, chascun 100 s. par an.
  • 113.Il est ordené que tuit li chapellain et li clerc de la chapelle geiront tuit en un hostel et en une chambre se elle est souffisanz et que nus ne gise avec eus, fors pour chascun 1 valet, et 2 valés 1 lit.
  • 114.Tuit li cierge de la chapelle seront raporté aus coffres et chascun chapellain aura en recompensation 100 s. et chascuns clers 50 s.
  • 115.Portiers au Parlement. Ph. et Symonnet de Mante. Chascuns 2 s. par jour et quant li rois y sera ou il seront a court comme li autre portier et feront serment que il ne penront nul don se ce n'est par les grans maistres ausquiex il penront congié.
  • 116.Guillaume d'Issie leur aidera.
  • 117.Chaufe cire, 3 d., une provende d'aveine, 18 d. quant il sera a Paris au Parlement, 40 s. pour robe par an, forge et restor.
  • 118.Le roy des ribaus, 6 d. de gaiges, une provende, 40 s. pour robe pour tout l'an et mengera a court et n'aura point de livroison.
  • 119.Messaigers a cheval, 3 d. de gaiges, une provende d'aveine, 3 a pié chascuns, 3 d. de gaiges et chascun 10 s. pour robe pour tout l'an.
  • 120.Maçon, charpentier, le fuireteur, le perdriseur, fauconnier, veneur, archier, valés de chiens, bréchés, tout en tel estat comme il est escrip en la Chambre aus Deniers.
  • 121.Il est ordené que nus des serjans de la forest ou li roys chacera ne autre personne estrange ne mengeront a court fors seulement 1 des serjans de la forest qui conduira le roy par la forest.
  • 122.Frere Guillaume de Saint Yvulte n'aura plus les 6 £ pour robe que il prenoit en la Chambre aus deniers.
  • 123.L'en pourveira 1 preudomme qui achatera dras, tiretaines et fourreures pour le roy et pour madame et pour donner, et cire en Flandres et rendra compte d'ices choses comme il seront despensees, au Temple devant les maistres, et par qui et autel fera il des dras d'or et des cendaus.
  • 124.Victor et Lambert ne porront rien tailler sans celui qui sera ordenez et rendront compte de leurs recepte et de leurs mises, et en tele maniere comme cil fera.
  • 125.Il est ordené que nus ne doit mengier en chambre s'il n'est deshaitiez ou sainiés.
  • 126.Il est ordené que nulz serjans d'armes ne mengera a court fors li 4 huissiers d'armes et li 4 serjant qui feront le gait, fors la journee que li roys chevauchera pour errer.

Comment citer cette notice

Elisabeth   Lalou . " Ordonnance de l'Hôtel ( Paris, Archives nationales, JJ 57 F. 10 V. )", dans Ordonnances de l'hôtel du roi , Elisabeth   Lalou , Benjamin   Suc , éds, Orléans : Institut de Recherche et d'Histoire des Textes , 2006 . (Ædilis, Publications scientifiques, 5). [En ligne] http://www.cn-telma.fr/ordonnances/ordonnance 2 / .