[1]

Testes producti ex parte magistri P. de Latilliaco et domini R. de Bruilliaco contra consules Montis Gaillardi ad probandum intentionem suam in causa que vertitur inter ipsas partes et que probare intendunt dicti P. et R. contra dictos consules qui juraverunt dictis presentibus et deposuerunt, prout inferius in eorum depositionibus continetur, anno Domini M^oCC^o nonagesimo octavo.

I Magister Raimundus dictus Vita, notarius curie appellationum Tholose, etatis 33 annorum vel circa, qui juravit die lune post festum beati Dionisii et deposuit die mercurii post festum beati Luce evángeliste, requisitus quid sciat de contentis in primo dictorum articulorum, dicit quod ipse vidit et presens fuit quando consules Montis Gaillardi ut dicebant, gratis et spontanei composuerunt cum dictis P. et R. ad 1200 l.t. super casalagiis, homagiis, feudis nobilibus et aliis articulis.

Req. quomodo sciat quod gratis et spontanei composuerunt ut predixit, dicit quod leti se offerebant et cum bonis faciebus et letis recedebant, nec tunc in aliquo contradicebant, sed eam gratam habebant, prout videbatur.

Req. de consulibus et eorum nominibus, dicit quod Arnaldus Beneti, Johannes de Cugno, Petrus Gilaberti et Raimundus Hugonis qui tunc nominaverunt se consules et quorum nomina scripta sunt in papiru regis.

Req. de loco, dixit in capella sancti Martini juxta aulam novam domini regis Tholose.

Req. de tempore, dicit circa festum Omnium Sanctorum ultimo preteritum.

Item req. super secundo art. dicit quod credit quod si ante dictam compositionem pignorati fuerunt vel aliter compulsi, hoc fuit pro solvendis questis sibi impositis. Nam mandatum quod Raimundus Durandi habebat extendebat se ad questas levandas et non ad aliud, et dicit quod licitum est domino regi debitores suos compelli facere ad solvendum per captionem corporum et bonorum, et ita vidit uti pluries et in pluribus debitoribus questarum et aliorum debitorum domini regis.

Item req. quomodo scit quod mandatum R. Durandi extendebat se ad questas levandas et non ad aliud, dicit quod illud vidit et legit, sub sigillo senescallie Tholose.

Item req. super tercio art., dicit se scire quod usi fuerunt dicta compositione et quod litteras a dictis P. et R. vel eorum altero, prout melius recolit, impetraverunt, quod B. de Podio Thinoso et quidam alii dicti Hugones de Montegaillardi compellerentur contribuere cum eis in dicta financia et qui ipsi B. et Hugones asserebant se nobiles, nolebant contribuere, et propter hoc fuit diu litigatum inter ipsas partes coram auditoribus eis datis a domino Radulpho. Et credit, quia aliter nescit, quod ad eorum requisitionem, post compositionem predictam a levationibus questarum fuit supercessum.

Req. quomodo scit quod impetraverunt consules loci litteras predictas, dicit quia ipse testes scripsit eas ad requisitionem dictorum consulum qui satisfecerunt eidem de scriptura dictarum litterarum. Et aliud nescit.

II Magister Guillelmus de Gauderiis, etatis 46 annorum vel circa, ut dicit, qui juravit, die lune et deposuit die mercurii predictis, req. quid sciat de contentis in primo dictorum art., dicit quod quidam qui se dicebant consules Montisgaillardi quorum nomina ignorat, composuerant gratis ad 1200 l.t. pro caselagiis, homagiis etc.

Req. qualiter scit, dicit quod fuit presens dicte compositioni et predicta vidit et audivit.

Req. de loco, dicit ut supra.

Req. de numero consulum, dicit quod non recolit.

Req. de presentibus, dicit de se, Raimundo Vita, notario, et credit quod essent ibi Raumundus Durandi et B. Valaderii et quidam alii.

Req. de tempore, dicit in hyeme proximo preterita.

Item req. super secundo art. dicit se nichil scire, nisi quod dicit consuetum esse compelli homines domini regis ad solvendum questas quandoque per captionem bonorum et corporum quandoque per ostiorum clausionem, et ita vidit pluries uti.

Item req. super tertio art. dicit se nichil scire nisi quod dicit quod quandoque illi qui se dicebant consulis dicte ville requisiverunt ipsum qui loquitur quod Bernardus de Podio Thinoso et quidam alii de dicta villa compellerentur ad contribuendum cum eis in summa financie supradicte.