Seignars li lombarz se plaint de Tassart de Betisy, jadis prevost d'Amiens, que comme 1 hom deust a celui Seignar 4 muis de blé, il s'en plaint au prevost devant dit. Li prevos prist celui qui devoit les 4 muis de blé et le mist en prison tant de terme qu'il despendi 55 s. Il Tassars contraint celui Seignart pour cuidete il le tenoit et li fist paier ces 55 s. que ses detes avoit despendu. Et plus il ot dou lombart devant dit 20 s. pour faire l'assonement d'une maison, dont il ne devoit avoir que 2 s. Et encore est li lombarz a paier de son blé.

Giles li Angles se plaint de Tassart de Betisi que comme il eust contenz a sa fame, dont ele wida la maison son baron, cil Tassars vint a la fame celui Gilon, l'an ele estoit a waran et li dist qi'il li feroit honte dou cors, par la requeste de baron qui l'en avoit pramis deniers, si comme il faisoit, entendant la fame se ele ne l'en donnoit plus que ses barons ne li permetoit. Ele dit que ele n'avoit nul denier se il ne li venoient de son baron, et il dit que ele les pourchaçat, ele emprunta 100 s. et li donna. Apres cil Tassars vint a celui Gilon et li demanda pour coi sa fame n'estoit avuec lui e il respondi que ce pesoit lui Li prevot li dit qu'il li feroit honte dou cors se il ne li faisoit courtoisie pour ce que sa fame avoit widié son ostel, il convint que cuis Giles donnat au prevost 32 s. et li commanda li prevoz qu'il les aportast si coiement que si serjant n'en seussent rien.

Robert Morteriex se plaint de Tassart de Betisy qui eut don dou sien 4 l. et 10 s. de tor. sans cause.