[1]

Frere Eude du Val de Rueil, moigne de Bon Port, jurez et requis se mon seignor Robert Le Veneor garde bien la forest de Bost, dit que il est vieuz homs et que il n'i va pou1 et dit que ele estoit mieuz ou ausi bien2 gardee au tens monseignor Baudouin de Longueval, que ele ne fu puis que mon seignor Robert Le Veneor i vint. Et le set par ce que il le voit et aparçoit. Et que ceus qui reperent en la forest le dient communement.

Item il dit que il oït dire a Baudet, jadis chastelain des Moulinniaus, que un valet du Val de Rueil, qui a nom Guichart, coupe bleterons en la forest et les aporte au Val de Rueil et les vent par le consentement de aucuns de la forest, mes cestui qui parole ne les connoit.

Item il dit que il oït dire au viconte du Pont de l'Arche que un des serjanz de la forest a forcee une fame puis que mon seignor Robert vint en la forest, mes il ne set le non du serjant ne de la fame.

Item il dit que monseignor Robert emprunta par un soen serjant une chareste de l'abaïe de Bon Port pour amener un tonnel de vin de son païs au Val de Rueil et la tint par 2 jorz ou par 4, mes mon seignor Robert paia les despens alant et venant.

Requis des autres choses, il n'en set plus, fors tant que mon seignor Robert envoia a Bon Port par Driart le serjant de la forest 2 levriers et une lesse de 2 cheans qui i ont toujors puis demoré et demourent encore au couz de l'abaïe.

Nos fumes a Bor en la forest du Val de Rueil et veismes a l'ueil la forest mout gastee par les moignes de Bon Port qui i prennent lor usage a quam que mestier lor est. Et veïsmes mout de arbres navrez por les quoiz que i prennent ça et la a fendre lor coustume, et veïsmes les deffensens par devers Montoire mal gardez de pieça, et veïsmes les tailleiz de petite revenue, et i a monseignor Robert Le Veneur 4 serjanz a gajes, et chevauche son gendre par la forest u lieu de mon seignor Robert, et sont les amendes tausees a volenté de ceus qui mesfont. Et ne usmes nus escriz des esplez par mon segnor Robert qui est trop nouviaus, mes l'en les prise bien 40 l. par an, et i sunt 28 viles coustumieres qui rendent les rentes au viconte du Pont de l'Arche. Et dist le prior de Montoire que il a son usage en la forest a herberger et por fere hales a ses foires et estaus et trestiaus et perches, et dist que il ne n'a point de charte, fors son lonc usage, et en atent le recort des registres le roi.

Item nos veismes la forest de la Londe ou le seignor de La Londe a les amendes des branches qui sunt coupees outre 17 piez de haut, et i mest tant de coustumiers comme il veut, si comme il dist. Et sunt levees les amendes que le rois i prent par sa main. Et prent le boais sec en estant et le vert en gesant sanz chaable et quant le coustumier a pris en l'arbre sec par devers pié tout le sec. Des quau vert le seignor de La Londe le seigne et le vent, et le fet soen, laquele chose est contre la droiture le roi quer il n'i puet riens prendre se il n'est tout sec. Et emportent ceus qui sunt pris en droit meffet lor meffet, et veismes les tailleiz de lez la vente du boais Huon malement mengiez de ore et de autre foiz, et dit le chastelein de Mouliniaus et les serjanz que ce font fere les chevaux qui viennent querre le boais en la vente, et en i a l'en bien veu a eu 80 ensemble et dist le chastelain que le mestre de la vente li requier que il quiergs pasture o chevaus qui viennent querre sa vente, et dist le chastelain que il en ont commandement des vendoors le roi, et trouvames la forest asez bien gardee, se ne fussent li coustumier, dam il i a aucun que le fermier i mest por son preu, qui n'i deust pas mestre, si comme l'en dit3. Et a 6 serjanz fieffiez et 4 a gajes, et valent les esplez entor 40 s. par an, mes nos n'avon eu nul escrit por ce que le chastelain est trop nouviaus.

Item nos veîsmes la forest de Rouvray, que Johen Tachier, chastelein de la Roche de Orival garde, bien gardee. Et veîsmes les tailleiz de povre revenue et i a 8 serjanz fieffez et 4 a gajes, et retient le meffet de ceus qui sunt pris en droit meffet puis l'Eschequier en ença, dom li coustumier se pleinnent mout pour ce que l'amende est a volenté, et se pleinnent mout aucun coustumier que le chastelein les veut fere paier herbage, c'est asavoir de chascune beste 6 d., tout n'aillent il pas en la forest ; et le chastelein dist que il prennent le tendron du hous tant comme il puent avenir haut a la mein en yver, et le donnent a mengier a lor vaches, et par ceste reson il veut avoir l'erbage por ce que il donnent a mengier a lor vaches le hous. Et de ce est a demander conseil a la cort ; Et dist le chastelein que les esplez valent aucune foiz par an, aucune foiz 40 l., aucune foiz 50, une hore plus, une autre meins. Et i a mout de coustumiers en la forest qui usent a volenté.

Item nos veïsmes la forest de Brotonne que Renaut Vellart garde, et a souz lui 5 serjanz fieffez et 3 a gajes dont li dui ne reperent point en la forest, et 4 sanz gajes, et veïsmes la forest asez bien gardee, fors les tailleiz par devers ese, ou bestes, c'est assavoir vaches et chevauz ou peu, et est l'ama de a volenté. Et reteint l'on le meffet et fet l'en paier l'amende et ne set l'en riens des esplez quar le verdier est trop noviaus.

Item nos veîsmes la forest de Montfort, ou les tailleiz de la disreenne vente qui est passee et de cele qui cort sunt penz des chevaus qui sunt venuz en la vente querre le boais, et trovasmes les banz que aucun coustumier de la forest qui ont pris des nons aus banz i ont fetes mesons et usent du boais de la forest en 2 leus, c'est asavoir en la meson qu'il tenoient devant et es mesons qui sunt fetes es banz, ou il n'ont nule droiture. Et a le verdier souz lui un serjant fieffé et un a 4 deniers de gajes, et 4 sanz gajes qui se vivent des gerbages que il quierent en aoust des coustumiers de la forest.

Nos fumes a Euvreus o il i a mouz de costumiers et de usagiers, et la guarde Bustin a 3 s. de gages, et i sunt 4 serganz fiefiez et n'en n'i doit avoir que trois, si comme l'en dit, et i a en la haie 4 serganz a guages, et especiz boais de Graingni et es autres boais sus Rille a 2 serganz fiefiez et 1 sergant par de sus eus de par le roy, qui a 8 d. p. par jor. Et sunt assez bien gardez ce nos semble, de ça et de la. Et ne seümes riens des esplez por le verdier qui estoit noviaus.