Ce sont les raisons que li grangier d'Ienville dient contre cels de la vile por la dreiture le rei que li baillis lor commanda a garder par lor serement.

Pierre Buignet dit que il vint as chans d'Ienville por champarter et que il trova aucuns de cels de la ville qui donoent les javelles et les en feisoent porter a la ville par lor menues aincés que il non brassent que il ne poent feire ne devoient. Apres il troverent le succes des chans mengies verz don il voloient le champart le reie. Et cil de la ville dient que li rois n'i a riens, que il les puent totes mangier verz. Et cil Pierres dit encontre que se droiz lor doneit que il le preissent feire, donc nel font il pas si com il deivent, car il sont vendeor de chavaus et gainent as chevaus autres terres ou li rois n'a point de champart. Don il dit que il ne la poent doner a autres bestes que a celes qui gainent ou champart le roi, empres il vendent les chans desvetes li uns a l'autre et en font tel marchié cum il volent, don il dient que li rois n'a en 12 d. que 2 d. Et cil Pierres dit que li rois ne vendra mie son champart s'il ne vielt, don il dit que ce encontre la dreiture li roi, et por ce que il ont en lonc tens cele grange a moison en ont il ovré si com il volent que nus n'en parlet contra els, ne plaite n'en estoit feite.

Ampres cil Pierres dit que il avoit bien 80 muis de blé en la grange, qui estoit toz prez a amener quant ele fut arse, et cil Pierres avet fet crier a dos marchiez l'un apres l'autre que cil qui devoient le charrei lo roi, qu'il estoit toz priz, et au premier marchié nus ne vint, en l'autre apres il en menerent 21 mui orlenés et li autres demora en cele grange et cil Pierres vint d'Orliens por recevoir le blé, et cel jor demora a Orliens tote la jornee et a celui diemenche fu la grange arse. Dont cil Pierres dit que li blez qui demora leens par lor defaut qu'il sont tenu au rendre come cil qui deivent le charrei lo roi, et furent requis de rendre a la mesure ausit com l'an lor aveit baillié a mesure, et il ne voldrent. Don il sont tenu a rendre le defaut et double et de l'aveine.

Empres icil Pierres dit que li prevot deivent metre 6 eschauguetes en la ville, et les deivent asorer, des que les premieres gerbes sunt en la grange, et ce ont bien queneu li prevost, par l'anqueste que li baillis a feite, que il n'en n'i ot nul cele nuit. Et celes eschaugueites deivent garder la grange et la ville dou cist domages en venuz par lor defaut. Et por ce que li grangier amenerent ces torz fez davant diz davant le baillif, et por ce que nous creumes la moison le roi de 100 muis plus que il n'i voloient doner, il se corrocierent as grangiers et disoient aucuns d'aus a l'oïe des grangiers et des mestiviers que li uns voldrent aver doné 10 l., li autre 13 que li grangier fussent dedanz la grange et que li fues i fust. Et quant Pierres oi ces paroles bien tres semmaines ainz que la grange fust arse, il ala au baillif a Checi et li dist ces paroles que il avet oies, et li dist que il i meïst conseil, que il ne gardoit lore que l'en i botast le fon, par les paroles qu'il disoient et par lor menaces et en laissierent a parler a lui li plusor sire.

Li baillis vint a Jenville et s'asemblerent toz li comuns de la ville davant lui. Li granger firent lor plainte de torz fez que l'an fesoit le roi et des menaces que il oïrent. Et com li bailis entendist lor felonie, il lor dist as prevoz et as borgès Bels seignors, ne cuidiez mie que li bles qui est en la grange soit as grangiers, il est le roi, et sachiez bien se domages i avenoit par defaute d'eschauguetes ne par autre chouse je m'en prendoie a vos cors et a vos avers.

Empres li borgés de la ville s'asemblerent et distrent davant le baillif que nos ne jorrions ja de plaidier o els.

Ampres sire Pierre Li Ros qui estoit tenuz a garder les dreitures le roi par le comandement au baillif, ala nonbrer les gerbes as chans outre nostre volenté et les mena la ou il volt que nous n'en volsimes nulle recever. Quant li baillis vint en la ville nous li monstrames ce tort fet que cil a fet contre le roi. Le baillis en fist feire l'esmende a celui Pierre Le Ros et com icil Pierres eust pressé as grangiers dos coistes et dos coissins a gesir leens, icil Pierres les enveia querre, 5 jors ou 6 ainz que la grange fust arse, et li grangier les li envoient, et sachiez que il avoient leens en la grange 10 estapes de blé a batre et une d'orge, don cil dou païs meismes disoient que chascune rendroit 7 muis charteins de blé et 4 estapees en i avet batues, et manoit en autant de blé par le dit de ces dou païs en une anné, moult a lonc tens.