IRHT

Enquêtes menées sous les derniers capétiens

> Enquête menée par Guillaume de Hangest à la demande du chapelain de la chapelle du roi à Saint-Germain sur les droits sur les draps funéraires utilisés lors des obsèques. 1292.

Archives nationales, J 1035, n°35

Enquête

[1]

Informacion fete par Guillaume de Hangest a ce tens prevost de Paris, sus ce que li chapelains de la chapelle le roy de la ville de Saint Germain en Laie dit et maintient que li bourgois et les bones genz de la dite ville de Saint Germain i sont et ont esté en saisine que, toutes fois que home ou fame muert en la ville, que ce qui est mis sur le cors et porté a l'eglise, soit poiles, drap d'or, coute pointe ou sarge, de raporter l'en delivrement et empes se li cors n'est enfouiz dedenz l'eglise ou el laiguier ou se il n'est lessié ou testament et de ce sont il ensaisiné et en ont usé de tant de tens qu'il doit souffire a bone saisine aquerre. Ce fu fet l'an de grace mil CC XXXXXX et XII, le mardi devant feste saint Martin d'esté.

Eve de Quarrieres, de 100 anz d'aage ou environ, demourant a Saint Germain en Laie, jurée, requise que elle set des choses desus dites, dit par son serement que puis 80 anz en ça elle qui parle a vu assiduelment que toutes foiz que aucun pretoit dras ou sarges ou autres choses a metre sus cors, quant il estoient enfouiz, cil ou celle qui portez ou prestez les avoit les raportoit sanz debat et sanz contredit que il veïst onques metre du prieur de Saint Germain ne de ses devanciers, et dit que elle meismes, environ 40 anz a, presta 2 dras linges et une bele sarge a metre sus .1. foulon qui morz estoit, dont elle ne set le non, Et quant son servise fut fet et il fu enfoui, elle en fist raporter sanz nul debat lesdites choses, et puis ce tens pluseurs fois en a presté et veu prester a autres qui ensi en usoient, mes ne li souvient des nons des persones.

Eude Michiel de Saint Germain en Laie, de 60 d'aage, juré, requis sus les choses desus dites, dit par son serement que puis 50 anz en ça il a veu assiduelment que toutes foiz que homme ou fame a esté mort, ce que l'en metoit sus le cors fust dras, linges, poiles ou sarges, ou coutes poites, sitost comme il estoit enfouiz, l'en les raportoit arrieres sanz dengier et sanz debat que il i veist onques metre del prieur de Saint Germain ne d'autre se cil qui morz estoit de sa volenté ne l'avoit lessié a l'eglise. Et se par aventure il estoit enfouiz dedenz l'eglise, les dras linges qui estoient sus le cors demouroient a l'eglise, et le par desus en portoient s'il n'estoit lessié du mort en son testament, et einsi en a il veu user de tout son tens.

Requis de quex persones il en a veu user, dit de son pere environ 25 anz a.

Requis quel chose l'en en raporta, dit qu'il ne li souvient quel chose, ou poile ou sarge.

Item de sa mere, environ 10 ans a, de quoi il vit que les dras linges demourerent a l'eglise et le pardesus en fu raporté, et ne li souvient quel chose. Et de pluseurs autres cors l'a il einsi vu user sanz debat, et dit que il vit Adam Bouar qui morz fu nagueres, qui ot 1 poile sus li qui demora a l'eglise pour ce que l'en disoit que il l'avoit lessié en son testament.

Requis se plus en set, dit que non.

Thomas Plate Mare, de Saint Germain, de 50 anz d'aage, se comme il dit, juré, requis qu'il set des choses desus dites, dit par son serement que de si loin comme il li puet souvenir il a veu que toutes foiz que aucuns mouroit a Saint Germain, ce qui estoit sur le cors quant il estoit porté au mostier, si tost comme le cors estoit enfoï, les dras linges, sarges ou poile ou quelque chose qui fust sus le cors en estoit raporté sanz debat de nului, se einsi ne fust que le cors fust enfouiz en l'eglise ou el laiguier.

Et dit que, environ 25 anz a, 1 foulon fu mort a Saint Germain qui avoit non Nicholas Le Foulon, et vit que Eve des Quarrieres presta une sarge a metre sus le cors, et le cors enfoui, il vite que ladite Eve en fist raporter la sarge et les dras linges qui desouz estoient sanz debat de nului.

Et dit que puis ce tens desus dit, il en a veu pluseurs prester et raporter et il meismes en a raporté pluseurs, que dras que sarges, mes ne li souvient des nons de ceus qui les pretoient ne quex choses, ne les nons des mors. Et dit que li cors dont debaz est ne fu pas enfoui en l'eglise ne el laiguier, et estoit seur Phelipe de Taverni. Par ce le set qu'il l'oï lors dire as genz, que li prieurs i avoit mis debat. Plus n'en set.

Huitace Amelarde, de Saint Germain en Laie, de 65 anz d'aage, jurée, requise des choses desus dites, dit par son serement que puis 50 anz en ça, elle vu veu assiduement que quant aucune mouroit en cele ville, ce qui estoit sus le cors quant le cors estoit mis en terre, fust dras linges, sarges, tapiz, poile ou autre chose, en estoit raporté sanz debat et sanz ce qu'il en demourast riens a l'eglise, se ensi n'estoit que li cors fust enfouiz en l'eglise ou el laiguier ou que aucuns ne li lessast de sa volenté, et einsi en a elle veu user de son tens, et en a veu meinz raporter.

Requise de quex persones et quex choses et de quel tens, dit que n'en est pas bien souvenant, ne n'i a pas mis son avis, car elle avoit a penser a autre chose. Et plus n'en set.

Jehan Le Masseeur, de Saint Germain en Laie, de 60 anz d'aage, juré et requis, dit par son serement que toutes foiz que aucuns muert a Saint Germain, ce qui est sus le cors quant l'en le veult enfouir, il en a veu raporter arrieres sanz nul contredit, soit dras, linges, sarges, poiles ou autre chose, et einsi en a il veu user de tout son tens en ladite ville, et de ce sont les bones genz de Saint Germain en saisine. Et se li cors est enfouiz en l'eglise, les dras linges desus le cors demeurent a l'eglise ou il sont rachetez de 5 s. a la volenté de celui que les dras sont, et ce qui est par desus les dras en est raporté franchement.

Requis de quex persones, dit que environ 25 anz a, Guillaume Guilaut morut a Saint Germain et fu enfouiz en cemetire, duquel il vit raporter les dras linges et une sarge sanz debat de nului et de pluseurs autres. A il veu ce meismes fere puis ce tens desus dit, et devant, mes des nons ne li souvient ne quel tens.

Ysabiau de Marivax, de 50 ans d'aage ou environ, juree, requise que elle set desdites choses, dit par son serement que, environ 35 anz a elle qui parle vit que la fame sire Jehan Chasteillon de Saint Germain morut et vit que l'en envoia querre 1 drap de soie chiés le prieur a metre sus le cors, et pour ce qu'il fu trop lez, lidit sire Jehan envoia emprunter 1 biau poile a Poissi dont le cors fu couvert, et vit que cele fame fu enfouie dedenz le mostier, et elle enfouie, elle vit que les dras linges qui estoient sus le cors demourerent a l'eglise, et ledit poile en fu raporté, si comme elle vit. Ce ne set elle se ce fu du congié au prieur ou non, mes onques ne vit debat, et de plusors autres a elle veu raporter les dras et les sarges qui sus les cors estoient quant il estoient enfouiz et sanz contredit, mes ne li souvient des nons ne du tens. Et dit que einsi en use l'en communement en ladite ville, et en sont les bones genz en saisine. Plus n'en set diligenment requise.

[2o peau] [couture disparue]

Symon de Hanemont de Saint Germain en Laie, juré, requis que il set des choses desus dites, dit par son serement que les bones genz de Saint Germain sont et ont esté en saisine de raporter les dras linges, les sarges ou poiles qui sus les cors estoient quant il estoient enfouiz, sanz contredit, fors de ceus qui gesoient en l'eglise ou el laiguier, des quex les dras linges de desus le cors demouroient a l'eglise et le pardesus en estoit porté.

Requis comment il le set, dit par ce que puis 20 anz en a, il vit 1 poile commun de la ville en garde chiés la fame Guillaume Bone Fille, une grant piece, et autre foiz chiés Adam de Bailli, lequel avoit alé querre en ces leus pour metre sus les cors quant il mouroient, et le vit sus pluseurs cors et par pluseurs foiz et veoit quant les cors estoient enfouiz que l'en le prenoit et raportoit l'en arrieres a ladite garde, sanz debat ne contredit d'aucun, mes des nons des cors ne li souvient, ne du tens qu'il l'a veu fere, mes pluseurs foiz et a pluseurs cors l'a veu, si com desus est dit. Plus n'en set.

Ysabiau La Godine, de Saint Germain, de 60 anz d'aage, juree, requise sus les choses desus dites, dit par son serement que les bones genz de Saint Germain sont en saisine et ont esté longuement juques a ores de raporter pesiblement sanz contredit les dras linges, les sarges, les poiles et les autres choses qui sus les cors sont portez au mostier quant il sont enfouiz ou cemetire et quant aucuns est enfouiz en l'eglise ou el laiguier, les dras linges demeures (sic) a l'eglise et la sa[r]ge ou le poile par desus en est raporté quite sanz contredit.

Requise comment elle le set, dit que par ce que de tout le tens dont il li puet souvenir, elle en a einsi veu user en ladite ville, et meesmement en droit lui qui parle environ 24 anz que le mari de elle qui parle fu morz, et quant il fu enfouiz ou cemetire, elle en fut raporter les dras linges et une sarge de desus le cors, sanz contredit ne debat de nului. Et de pluseurs autres l'a elle einsi veu fere puis ledit tens sanz debat, mes ne li souvient des nons ne du tens. Plus n'en set.

Eudeline La Barroise de Saint Germain en Laie, de 50 anz d'aage ou environ, juree requise sus les choses desus dites, dit par son serement que les bones genz de la ville Saint Germain sont et ont esté en saisine de raporter les dras linges, les sarges, les poiles et les autres choses dont les cors ont été couverz toutes foiz que il estoient portez enfouir, sanz debat ne contredit, et en saisine de raporter les poiles1 et les sarges de ceus qui en l'eglise ou en l'aiguier ont esté enfouiz en lessant et retenant a l'eglise les dras linges tant seulement. Par ce le set que, puis 40 ans en ça, elle qui parle en a einsi veu user les bones genz de pluseurs cors et par pluseurs foiz. Des nons des cors ne des raporteeurs ne li souvient, ne environ quex tens. Plus n'en set, fors d'environ 40 anz a que elle vit que une sarge qui sus le cors du pere de lui qui parle fu mise, qui en fu raporté en sa meson, et ce meismes vit elle fere du cors de sa mere environ 28 anz a. De nul autre n'est remenbrant.

Jehan de Hanemont, de Saint Germain en Laie, de 40 anz d'aage, jurez, requis sus les choses desus dites, dit par son serement que, environ 30 anz a, le pere de lui qui parle fu morz et fu enfouiz ou laiguier de l'eglise Saint Germain, et vit que les dras linges qui sus le cors estoient demourerent a l'eglise, mes 1 poile qui estoit commun a la ville, dont le cors fu couvert, en fu raporté si comme il vit, pesiblement, sanz debat.

Item ce meismes vit il de feu Dabbe qui fu enfouiz oudit larguier, environ 25 anz a.

Item puis ce tens desus dit il a veu pluseurs cors a Saint Germain enfouir ou cemetire des quex il ne li souvient des nons, des quex il a veu dras linges2, sarges, tapyz, poiles, dont il estoient couvers, raporter a leur ostiex, ou as ostiex de ceus de qui l'en les enpruntoit, tout assiduelment, sanz contredit ne debat de nului, et par ce croit il et li est avis que les bones genz de Saint Germain en aient esté en saisine pesible, et einsi en ont usé et a bien veu que aucuns riches homes qui mouroient donnoient a l'eglise le dras dont les cors estoient couverz.

Guillaume La Piau, de Saint Germain en Laie, de 60 anz d'aage, juré sus les choses desus dites, dit par son serement que puis 40 anz en ça jusques a 20 anz a, il vit pluseurs foiz raporter les dras linges, les sarges et poiles qui sus les cors estoient quant il estoient enfouiz ou cemetire de Saint Germain, sans debat ne contredit de nului, et en vit einsi user les bones genz de la ville que quant aucun mouroit l'en prenoit une bele sarge s'il l'avoit ou l'en l'empruntoit chiés aucun voisin por couvrir le cors, et quant il estoit enfouiz l'en les raportoit arrieres as ostiex.

Requis des nons des cors sus qui l'en fesoit ce, et les nons des raporteeurs, dit que nuls n'en set nommer, car puis 20 anz en ça il n'en vit user pour ce que il a assez dras a l'eglise a rendre, et que l'en prant cors. Autre chose n'en set.

Jehan Barat de Saint Germain en Laie, de 60 ans d'aage, juré, requis sus les choses desus dites, dit par son serement que les bones genz de Saint Germain sont en saisine et ont esté de lonc tens que quant aucuns muert a Saint Germain, de raporter les dras linges et les poiles ou sarges dont les cors ont esté couvert, pesiblement sanz debat, quant il sont enfouiz au cemetire, et quant il sont enfoïz en l'eglise ou el [laiguier] de raporter les poiles ou sarges par delessant le drap linge. Et einsi en a il veu user puis 40 anz en ça. Par ce le set que il vit son pere, environ 19 anz a, qui fu enfoiz en cemetire, de qui l'en raporta le drap linge, et le poile estoit de l'eglise. Et ce meismes vit il de sa mere environ 9 anz a. De nul autre ne li souvient. Item de Guillaume l'Esvanté ausi environ 23 ans a.

Thomas Michiel de Saint Germain en Laie, de 50 anz d'aage ou environ, juré, requis sus les choses desus dites, dit par son serment que les bones genz de Saint Germain sont et ont esté en saisine par tant de tens qu'il doit souffire, de raporter pesiblement dras linges, poiles, sarges, dras de soie et autres choses qui sont sus les cors, quant leur servise est fet et l'en les enfouit ou cemetere. Et quant il sont enfouiz en l'eglise ou el laiguier, de raporter pesiblement le poile, la sarge ou autre chose dont le cors est couvert par desus, en retenant le drap linge tant seulement qui est desouz le poile ou la sarge.

Requis comment il le set, dit par ce qu'il en a einsi veu user.

Requis de quex persones, dit que environ 20 anz a, 1 filz qu'il qui parle avoit morut a Saint Germain et fu enfouiz en l'eglise au tens que l'oncle du prieur qui ores est vivoit, il vit que le prieur ot le drap linge qui estoit sus le cors et volt avoir une moult bele sarge dont le cors estoit couvert, qui bien valoit 30 s. et i mist debat, et toutes voies la fit raporter il qui parle, ne onques puis debat n'en fut.

Item il dit que environ 18 anz a, la premiere fame de lui qui parle morut et fut enfouie devant le mostier, hors du mostier et hors l'aiguier, et vit que les dras linges et une coute pointe de soie dont il qui parle avoit fet couvrir le cors en furent reportez arrieres chiés lui qui parle pesiblement sanz contredit de nului.

Item ce meismes vit il du pere de lui qui parle, environ 30 anz a, mes ne li souvient se ce fu poile ou sarge qui en fu raporté, mes le drap linge demeura a l'eglise pour ce qu'il fu enfouiz dedenz l'eglise.

Item ce meismes vit il de sa mere environ 12 anz a, et de pluseurs autres de la ville dont il ne li souvient des nons. Et einsi en a il veu user puis 40 anz en ça ne onques drap de soie, poile ne autre couverture n'en vit retenir, se ne fu de main riche homme qui de sa volenté donnast a l'eglise ou lessast le poile qui sus lui estoit.

Autre chose n'en set.

Aubert Roussel de Saint Germain en Laie, de 50 anz d'aage, juré, requis sus les choses desus dites, dit par son serment que puis 18 anz en ça que il qui parle a demouré a Saint Germain, il a veu pluseurs genz de la ville enfouir au cimetire de la ville et si tost que il estoient enfouiz, il a veu que l'en en raportoit pesiblement les dras linges et les poiles qui sus les cors estoient, sanz debat ne contredit de nului, et a veu que quant aucuns estoit enfouiz en l'eglise ou en l'aiguier, ce qui estoit sus le cors demouroit a l'eglise et einsi en a il veu user puis le tens desus dit, mes ne li membre ne n'est avisé de quex persones, car onques sarges ne poiles ne vit sus cors, se il ne fut de l'eglise, ou se ne fu aucun riche homme qui eust sus lui drap d'or qui de sa volenté le lessast a l'eglise.

Autre chose n'en set.

Notes

1 Corr. de : dras.

2 Corr. de : poiles.

Comment citer cette notice

Elisabeth Lalou, Xavier Hélary. "Enquête menée par Guillaume de Hangest à la demande du chapelain de la chapelle du roi à Saint-Germain sur les droits sur les draps funéraires utilisés lors des obsèques. 1292. (Archives nationales, J 1035, n°35)", dans Enquêtes menées sous les derniers capétiens, Elisabeth Lalou, Christophe Jacobs, éds, Paris : Centre de ressources numériques TELMA, 2007. (Ædilis, Publications scientifiques, 4). [En ligne] http://www.cn-telma.fr/enquetes/enquete75/ .

Mentions légales | Colophon | Contacts | Haut de page