[1]

Maistres Jehan li Fevres d'Amiens et li maires de Mondidier, auditeur et inquisiteur de la court nostre segneur le roy, a toutes justiches seculeres du regne de Franche a ki ches presantes lettres seront offertes, salut. Nous vous faisons asavoir que nous avons rechut et veü le lettre le roy contenant le fourme ki s'en sieut :

Ph., Dei gratia Francorum rex, dilectis nostris magistro Johanni Fabro de Ambianis et majori Montis Desiderii salutem et dilectionem. Mandamus et committimus vobis quatinus apud Morolium personaliter accedentes, vocatis coram vobis domino de Morolio et Guillelmo Lombardo, inquiratis diligenter per bonas et sufficientes personas quanta, qualia et cujus valoris bona existebant in domo dicti Guillelmi, tempore quo dictus dominus ea ad manum suam dicitur posuisse, inquestam hujusmodi per vos factam nobis sub sigillis vestris transmittentes quam cicius poteritis interclusam. Actum Parisius, die jovis ante Ramos Palmarum, anno Domini M ^o CC ^o nonagesimo quarto .

Par la vertu duquel commandement nous vous mandons ke vous adjournés par devant nous a Moruel au lundi ki vient prochain en 8 jours, ch'est a savoir au lundi prochain apres les trois semaines de la Paske, les devant dis mon segneur de Moruel et Guillaume le Lumbart a aler avant en ladite enqueste selonc le fourme ki baillie nous est de la court et semonnés et adjournés par devant nous, au jour et au lieu devant dis, tous chiaus ke li porteres de ches lettres vous nommera, dont vous serés requis a porter tesmoingnage de verité pour l'une partie et pour l'autre seur la querele devant dite. Et che que vous en arés fait et des nons des tesmoins semons et adjournés nous rescristés souffisanment. Donné l'an de grace mil CC.IIII ^XX et XV, le merkersdi apres le Quasimodo1.

L'an de grace M.CC.IIII ^XX et XV, le lundi apres les trois semaines de la Paske, nous, maistres Jehans li Fevres d'Amiens et li maires de Mondidier, auditeur donné de la court nostre segneur le roy a enquerre seur che ki est contenu en la commission deseure dite, comparumes a Moruel pour aler avant en l'enqueste selonc la fourme ki baillie nous estoit de la court, appelés par devant nous au jour et au lieu devant dis le segneur de Moruel et Guillaume le Lombart, par la vertu de ladite commission, tesmoins semons et adjournés par devant nous a porter tesmoingnage de verite en ladite enqueste. Les devant dis segneur de Moruel et Guillaume comparans par devant nous en leurs propres persones, nous desimes audit segneur de Moruel, pour plus tost savoir la verité de la besoingne, que il jurast en la querele et ke il desist se verité seur che ki estoit contenu en ladite commission par son sairement. Liquels sires de Moruel refusa a jurer et dist que il n'estoit mie tenus a jurer seur che par pluseurs raisons que sa partie proposa devant nous, ne ne valt jurer.

Laquele cose oïe, par la vertu de ledite commission et de l'adjournement devant dit nous rechumes et examinames pluseurs tesmoins. Et quant nous eumes oï et examiné une partie desdis tesmoins, nous fusmes requis ke nous oïssiemes le dame de Moruel en tesmoingnage en la querele comme ele fust semonse et adjournee seur che audit jour par devant nous, si comme li devant dis Guillaumes nous donna a entendre, et nous alames a ladite dame pour sen tesmoingnage oïr en sa maison a Moruel. Et li dismes que ele jurast et tesmoignast comme tesmoins en ladite querele par sen sairement, laquele dame nous respondi ke ele ne jurroit ne ne tesmoigneroit en la querele, car a che faire ele n'estoit mie ne semonse ne adjournee souffisanment, ne ke ele n'estoit mie tenue a tesmoingnier en ladite querele, par pluseurs causes ke ele nous bailla en escrit, lesqueles nous avons chi desous mises et closes en cheste enqueste.

Lesqueles coses oïïes, nous rechumes et oïsmes les tesmoins ki s'en siewent, en la maniere que il est deseure contenu, et d'abundant Thumas de le Sale, serjans sairementés le roi, demourans a Mondidier, qui fist les adjournemens desdis tesmoins, nous tesmoingna par son sairement que il avoit souffisaument adjourné ladite dame par devant nous au jour et au lieu devant dis a porter tesmoingnage de verité en la querele devant dite.

I Robers li lombars, d'Ailli, de l'aage de 45 ans ou la entour, tesmoins jurés et requis savoir mon comme bien il avoit de biens en le maison Willaume le Lombart el tans que li sires de Moruel les mist en se main, si comme on dist, il dit par son sairement que2 entour 5 ans ara entour le Saint Just que il vit que li sires de Moruel avoit mis se saisine en le maison ledit Guillaume et que el tans d'adonc il i avoit plenté de biens, si comme en dras, en reubes, en couvertours, en panes de vair, de gris et d'autre maniere, en hanas, en vaisselement d'argent, et croit que il i eut argent sek assés, mais certains est que le damoisele de Brach et mesires de Maisieres i avoient plenté de joiaus d'argent et de dras, mais il dit par sen sairement que il ne set mie le quantité des coses desus dites, ne le value, ne de quel pris eles estoient, mais bien croit par sen sairement que lesdites coses valoient bien deus mile livres de par.3 ou plus. Et dit chis tesmoins que il vit que quant le gent voloient racater leurs wages ki estoient en ladite maison ledit Guillaume, ke le gent ledit segneur de Moruel prendoient l'argent et rendoient les wages, ne plus ne set de che.

II. Mesires Bernars, chevaliers, sires du Plaissie, de l'aage de 40 ans, ... ne set, ne ques biens il avoit en le maison ledit Guillaume, ne de quele valure li dit bien estoient, si comme il dit4.

III. Jehans de le Ruele, prevos le veske d'Amiens, de l'aage de 36 ans, ... ne set ... ; mais tant dit il que apres che que li sires de Moruel avoit mis se main as biens ki estoient en la maison ledit Guillaume, si comme on dit, que il fu presens en le maison ledit segneur de Moruel ou il vit que lidis sires de Moruel monstra audit Guillaume pluseurs biens, hanas, joiaus, vestures, en disant : Willaume, je ai bien gardé vos biens. Et vit apres en le maison ledit Guillaume autres biens ki estoient saisi dudit segneur. Et croit que li bien devant dit valoient bien adonc 500 l. de par., et autre cose il ne set de che.

IIII. Mesires Raous, chevaliers, sires de Glismont, de l'aage de 63 ans ou la entour, ... il dit ... ne set ... ; mais il dit que il a entendu de me dame se fenme et d'autres que ele avoit mis en wage en ladite maison envers ledit Guillaume un tailloir d'argent dont on servoit de dragié et 3 hanas de madre a pié d'argent et une sarge, liquel valoient 100 s. ou la entour, et autment il ne le set.

V. Pierre de Sauviler, de l'aage de 60 ans et plus, ... en ne set, ...

VI. Nevles li prevos, de l'aage de 60 ans et plus, ... dit par son sairement ke il a entour 4 ans passés que il vit et seüt que li sires de Moruel saisi et mist saisine en le maison Guillaume le Lombart devant dit pour le souspechon d'un homechide, et dit que il i avoit pluseurs biens, si comme hanas d'argent, hanas de madre, cuelliers, reubes et dras, fourrures de vair et de gris et autre joiaus, mais il ne set com bien il valoient, ne de quel valure il estoient, fors tant que il croit que lidit bien ke i estoient valoient 500 l. de par., et dit chis tesmoins que a tant il les eust estimés par sen sairement, car il vit les dis biens. Requis se il i avoit nient d'argent monnee, il dit que il ne peut onkes veir ne aperchevoir que il i eust en argent monnee, outre 10 l. de tournois ou la entour. Et dit encore que il vit ke li sires de Moruel leva en detes de che que on devoit audit Guillaume en le vile de Moruel de diverses persones en la value de 100 s. ou la entour, ne autre cose il ne set de che, si comme il dit.

VII. Jehans li Bouchiers, de l'aage de 50 ans ou la entour, ... dit que il ne set comme bien il i avoit, ne de quel value li bien estoient, mais il dit que il a oï dire communement que el tans que li sires de Moruel fist saisir les biens qui estoient en le maison ledit Guillaume que il avoit de biens en ladite maison a le value de 1400 l. de par. Et dit que grant pieche apres ledite saisine faite, li prevos de Mondidier i vint pour le roy pour savoir ques biens il i avoit, et le value de ches biens, et fu appelés chis ki parole auvek les autres hommes de le ville pour prisier les biens, et prisierent les biens qui adonc estoient en ladite maison a 120 l. Et fu chele prisie faite un an apres que li sires de Moruel avoit faite ladite saisine. Item il dit que li prevos de Mondidier le roy emporta de ches biens quatre hanas d'argent sans pié et un grant hanap de madre a pié d'argent, et che vit il. Mais ne set plus, ne il ne set estimer le valure de ches hanas, si comme il dit.

VIII. Bertremieu de le Ruele, de l'aage de 74 ans, ou la entour, ... tesmoins jurés et requis savoir mon comme bien il avoit de biens en la maison Guillaume le Lombart, u tans que li sires de Moruel les mist en se main, si com on dit, il dit ke il ne set comme bien il i avoit ne de quel value il estoient, mais il dit que il a oï dire communement et est la renommee a Moruel que il i avoit de biens en ladite maison el tempore (sic) que li sires de Moruel saisi et fist saisir les dis biens, a le valure de 1000 l. et de plus, et autrement il ne le set. Ne plus ne set de che.

IX. Jehans Parens de l'aage de 50 ans ou la entour, ... jurés et requis savoir mon comme bien il avoit de biens en le maison Guillaume, u tans que li sires de Moruel les mist en se main, si comme on dit, il dit que il ne set comme bien il i avoit, ne de quel value il estoient, fors tant que il a oï dire pluseurs fois ke il i avoit de biens en ladite maison u tans devant dit a la value de 200 l. ou de trois, ne autrement il ne le set, ne plus ne set de che, si comme il dit.

X. Bertrans li Carons, de l'aage de 50 ans ou la entour, ... jurés et requis savoir mon comme bien il avoit de biens en le maison Guillaume le Lombart, el tans que li sires de Moruel les mist en se main, si comme on dit, il dit ke il ne set.

XI. Jehans de Dinant, de l'aage de 40 ans, ... quis, savoir mon comme bien il avoit de biens en le maison Guillaume le Lombart, el tans que li sires de Moruel les mist en se main, si comme on dit que il fu presens en le maison ledit Guillaume le Lombart auvekes les gens le segneur de Moruel el tans que li sires de Moruel mettoit se main et se saisine laens. Et fu chis qui parole appelés pour veoir les biens ki i estoient. Et dit que il i vit plenté de biens, en wages, en vaisselemente, dras, pos, paieles, hanas et autres coses pluseurs, liquel bien valoient si comme chis tesmoins estime, 200 l. de par. Et disoit on par les rues el tans devant dit ainsi : Sainte Marie, je ne quidoie mie ke il i eust tans de biens en le maison les lombars ne que il fuissent si rike. Et disoient li auquant que il i avoit adonc en ladite maison a le value de 500 l. et li autre disoient que a la value de 1000 l., ne plus ne set de che.

XII. Willaume Gamelin, de l'aage de 50 ans ou la entour, ... tesmoins jurés et requis savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, il dit ke il ne set comme bien il i avoit, ne que il valoient, mais il croit que li bien ki estoient adonc en ladite maison valoient 300 l. de par., ne plus n'en set.

XIII. Thumas de le Sale, serjans le roy a Mondidier, de l'aage de 60 ans ou la entour, ... que li sires de Moruel les mist en se main, si comme on dit dit ke quatre ans a passés que chis ki parole vint a le meson ledit Guillaume le Lombart a Moruel pour un occision dont on souspechonnoit ledit Guillaume, et dit que dedens les 2 jours apres che que chis ki parole fu la venus, il vit que li sires de Moruel saisi les biens qui estoient en ladite maison, des quels il i avoit grant plenté, si comme reubes de vair, de gris, fourrés et autres manieres de reubes, de dras, hanas d'argent a pié et sans pié, hanas de madre, cuelliers d'argent, autre vaissellemente et ousteix de maison et autres coses pluseurs.

Requis de le valure de ches biens, il dit par son sairement ke il les estime bien par droict estimacion a le value de 1000 l. et 500 de par. selonc sa creanche, ne autre cose il n'en set, si comme il dit.

XIIII. Symons de Biaufort, de l'aage de 54 ans ou la outour, ... tesmoins jurés et requis savoir mon comme bien il avoit de biens en le maison Guillaume le Lombart [3 ^e peau] u tans que li sires de Moruel les mist en se main, si comme on dit 4e peau cousue à la place de la il dit que quatre ans a passés ou la entour apres une occision faite de quoi on souspechonnoit Guillaume le Lombart devant dit, chis ki parole fu presens en le maison ledit Guillaume devant che que li sires de Moruel mesist se saisine en ledite maison et apres, la ou il vit aucuns wages de reubes fourrés, de vair, de gris, de dras, de couvertoirs, de hanas d'argent, de cuilliers d'argent, de dras, de vaissellemente et d'autres coses pluseurs. Et dit chis tesmoins que li bien, lesquels il vit adonc en ladite maison et lesquels il pensoit adonc estre en ladite maison, valoient bien mil libr. et plus si comme il croit5 par son sairement. Et estoit bien le renommee a Moruel que li dit bien qui adonc estoient en ladite maison, valoient tant et plus, si comme il dit. Ne plus ne set de che, si comme il dit.

XV. Raous li Parmentiers de Moruel, de l'aage de 36 ans ou la entour, ... requis savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, ne set riens ....

XVI. Jehans de Guillaucourt, escuiers, de l'aage de 30 ans ou la entour, ... tesmoins jurés et requis savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, il dit que entour le feste Saint Just prochain avenir ara 4 ans ou 5 lee chis qui parole fu pris en ladite maison auvekes autres gens de Moruel de par le segneur de Moruel pour warder les biens qui adonc estoient en ladite maison pour l'acoison d'une occision que on mettoit seure audit Guillaume. Et dit chis tesmoins que adont il vit en ladite maison pluseurs biens si comme dras, hanas, pos et oustieus de maisons et pluseurs autres wages et croit bien chis tesmoins que lidit bien, si comme on disoit, valoient 100 et 50 l. ou plus, mais autrement il ne set dire pour voir comme bien lidit bien valoient. Et dit chis tesmoins que apres ladite saisine faite il vit aucunes fois que li prevos le segneur de Moruel et lidis Guillaumes rendoient les wages6 et rechevoient l'argent, mais il ne set que il en firent de l'argent, ne plus n'en set de che.

XVII. Jehans Margerite, de l'aage de 32 ans ou la entour, ... jurés et requis savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, il dit ke, il a quatre ans et plus que chis ki parole fu envoiés a ladite maison ledit Guillaume de par mon segneur Thiebaut de Moruel et i fu en saisine en ladite maison pour le souspechon d'une occisition (sic) que on mettoit seure audit Guillaume. Et la vit il le prevost le segneur de Moruel, Jaque Cupin et Jehan de Guillaucourt qui i wardoient de par le segneur de Moruel et dit chis tesmoins que il vit tans de biens en ladite maison que il estoit tous esmaris et esbahis si comme en dras, hanas d'argent, cuelliers d'argent et autre vasselement, li quel bien valoient bien mil l. et plus, si comme chis tesmoins dit et croit par sen sairement. Ne plus ne set de che.

XVIII. Mesires Robers de Maisieres, chevaliers, sires de Gironvile, de l'aage de 60 ans ou la entour, ... et requis savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit il dit que il a quatre ans passés ou la entour que il vit que mesires de Moruel avoit mis se saisine en le maison Guillaume le Lombart, mais il ne set ques biens il i avoit adonc en ladite maison, ne comme bien li bien qui i estoient adonc valoient, mais il dit que el tans de ladite saisine faite, de par ledit segneur de Moruel, si comme on disoit, il vit racater wages7 en ladite maison, qui estoient le segneur de Maisieres son neveu, de 40 l. de par. ou de plus. Et dit que il vit laens une reube d'escarlate sanguine fourree de menu vair, cote et seurcot et mantel qui estoient me dame le fenme mon segneur Guillaume de Masieres jadis, et un hanap d'argent sans pié et un henap de madre, et un affiké d'or. Requis de le valeur de ches coses, il dit que il ne set deposer. Requis de toutes les autres coses qui font a le cause, il dit que il n'en set plus.

XIX. Mesires Robers de Maisieres, chevaliers, de l'aage de 60 ans et plus, ... tesmoins jurés et requis savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, dit ke il ne set riens comme bien de biens estoient en ladite maison ne comme bien lidit bien qui estoient en ladite maison valoient, si comme il dit.

XX. Pierres de Castel, escuiers, de l'aage de 40 ans ou la entour, ... ne set riens, fors tant que il a oï dire que li sires de Moruel fist mettre se saisine en ladite maison 5 ans a ou la entour, ne plus n'en set.

XXI. Pierres d'Andechi, de l'aage de 70 ans, ..., dit ke de toute ki mestier a de prueve il ne set riens fors tant que il dit que apres le tans que li sires de Moruel fist saisir les biens ki estoient en ladite maison si c'on disoit, il oï dire de pluseurs que il i avoit moult de wages et moult de biens en ladite maison el tans que la saisine fu faite, ne il ne set comme bien il valoient si comme il dit.

XXII. Gerars de Hourges, de l'aage de 40 ans ou la entour, ..., dit ke il ne set comme bien il avoit de biens en ladite maison el tans devant dit, ne comme bien lidit bien valoient, ne pour quant il dit ke il oï dire et par commune renommee a Moruel que li bien ki estoient en ladite maison el tans que li sires de Moruel fist lesdis biens saisir en ladite maison valoient mil l. et plus, et autrement il ne le set, ne plus ne set de che, si comme il dit.

[4 ^e peau]

XXIII. Hues de Hourges, de l'aage de 50 ans ou la entour, jurés et requis savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, dit ke il ne set ..., mais il dit que commune renommee estoit a Moruel el tans que li sires de Moruel fist saisir les biens qui estoient en ladite maison que li bien qui adonc estoient en ladite maison valoient plus de 2000 l. de par., ne plus n'en set si comme il dit.

XXIV Colars de Boecourt, de l'aage de 40 ans ou la entour, ... savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, il dit ke el tans que les saisines le segneur de Moruel estoient en le maison ledit Guillaume, chis ki parole, qui en ledite maison ledit Guillaume avoit mis en gage un sien affike d'argent seur ore et 2 hanas8 de madre a pié d'argent ki estoient Pierron d'Achicourt, vint entre lui et ledit Pierron en ledite maison pour rachater lesdis wages et la trouverent il le prevost le segneur de Moruel et 1 lombart de ki il ne set le non, et Jehan de Gillaucourt, et Baudet, ki estoient serjant le segneur de Moruel, et leur distrent que il venoient la pour racater leurs wages devant dis, et il leur respondirent que lidit wage n'estoient mie laens, car il estoient apporté au castel le segneur de Moruel et que li sires n'estoit mie en le vile, par quoi il ne pooient adonc avoir leurs wages. Et dirent que il s'en alassent et que il revenissent dusques a le semaine apres et il leur renderoient leurs wages pour l'argent. Requis de le quantité et de le valure des biens devant dis qui estoient en ladite maison el tans que ladite saisine fu faite des biens devant dis qui estoient en ladite maison el tans que ladite saisine fu faite des biens devant dis, il dit que il ne set riens fors tant que il dit que commune renommee estoit adonc a Moruel que lidit bien qui adonc estoient en ladite maison valoient bien 1200 l. et plus et tant les estimeroit chis qui parole selonc se creanche se il les avoit a estimer par sen sairement et autrement il ne le set, ne plus ne set chis tesmoins de toutes les autres coses qui font a le cause ki mestier ont de prueve.

XXV. Manessiers de Bonviler, de l'aage de 62 ans ou la entour, ... tesmoins jurés et requis, savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, il dit ke el tans que li sires de Moruel mist se saisine en le maison ledit Guillaume le Lombart, chis ki parole estoit adonkes prevos le roy de Mondidier, quatre ans a passés et plus. Et dit que il vit et seut que en chelui tempore (sic) pluseur biens estoient adonc en ladite maison si comme chis tesmoins vit et seüt, ch'est a savoir dras, hanas d'argent, fourrures, vaisselement, et autres biens et ostiex d'ostel, liquel bien valoient selonc l'estimacion de chestui tesmoin et selonc che ke la renommee estoit commune a Moruel dusques a mil et 500 l. de par., ne plus ne set de che diligentement requis.

XXVI. Gerars d'Issie, escuiers, demourans el serviche le segneur de Moruel, de l'aage de 40 ans ou la entour, ... savoir mon comme bien il avoit de biens en le maison Guillaume le Lombart u tans que li sires de Moruel les mist en se main, si comme on dit, dit par son sairement que il ne set ques biens ne comme bien des biens estoient en ladite maison el tempore (sic) devant dit, ne comme bien lidit bien valoient, ne il ne set de che ke croire, si comme il dit.

XXVII. Colars d'Espaelles, serjans demourans a mon segneur de Moruel, de l'aage de 40 ans ou la entour, ... dit ke entour 4 ans eut entre le Tous Sains ki deesrainement passa, que me sires de Moruel mist se saisine en le maison ledit Guillaume, si comme chis tesmoins vit, pour le souspechon d'un homicide, ke on mist seure audit Guillaume. Et dit que il vit adonc en ledite maison pluseurs biens et wages, ch'est a savoir dras et robes fourrees de vair et de gris, et autre vestures et couvertoirs, hanas d'argent et de madre, pos et paieles et keutes et autres biens et oustiex d'ostel. Et dit par son sairement que lidit bien valoient si comme il set estimer de raison et si comme la renommee commune estoit adonc, quatre chens l. et 50.

Et croit chis tesmoins que il i eut adonc en ladite maison autres biens en ladite maison (sic) qui valoient grandement, lesquels il ne vit mie, si comme il dit, ne plus n'en set de che.

XXVIII. Willaumes de Castel, escuiers, de l'aage de 50 ans, dit ke il ne set de certain comme bien il i avoit de biens el dit tempore (sic) en ladite maison ne comme bien li bien qui i estoient valoient adonc, mais il dit que puis que me sires de Moruel mist se saisine en ladite maison, et devant che et apres, chis qui parole par pluseurs fois oï dire audit Guillaume que lidis Guillaumes avoit en chele maison biens a le value de 1600 l. de par. Et dit chis tesmoins que adonc chis ki parole vit biens en ladite maison apparaument, si comme dras, fourrures, hanas de madre, d'argent, vaisselemente et autres biens ki valoient, si comme il croit et si comme il set estimer par raison mil l. et plus, ne plus n'en set, si comme il dit.

XXIX. Raous de Raineval, de l'aage de 32 ans ou la entour, ... ne set ... mais il dit que il vit et seut el tans que le saisine estoit de par le segneur de Moruel en ladite maison que il i avoit en ladite maison dras et pos et paieles et autres coses, lesqueles il oseroit bien estimer a 100 l. de par. Et dit que on disoit adonc par commune renommee de pluseurs gens qui adonc estoient bien en ladite maison a le value de 400 ou de 500 l., ne autrement il ne le set, ne plus n'en set de che, diligentement requis.

[XXX]. Mahiex, serjans Thumas de le Sale, serjant le roy, ... dit par son sairement que il vit et sout el tans que li sires de Moruel avoit mis ses saisines en la maison ledit Guillaume, que pluseur bien estoient en ladite maison, si comme dras, hanas, pos, autres wages et autres coses, lesqueles furent prisiées par pluseurs persones un an apres che ke les saisines devant dites furent faites, a 120 l. de par.

Et dit chis tesmoins que commune renommee estoit adonc que li bien qui estoient en ladite maison el tans que li sires de Moruel mist se saisine en ladite maison valoient mil l. de par. et autrement il ne le set, ne plus ne set de ce diligentement requis.

[6 ^e peau]

Che sunt les raisons le seigneur de Moreul a cheste fin que li auditeur, ch'est a savoir maistre Jehans li Fevres, clers, et li maires de Mondidier, auditeur donné de le curt nostre seigneur le roi ne voisent avant en le commission qui ballié leur est a faire enqueste contre le seigneur de Moreul et que l'enqueste faite, se faite l'ont, ne doie mouvoir le court que li sires de Moreul ne soit oïs a proposer ses bones raisons.

Premierement car li sires de Moreul dist que autre fois en le maniere de maintenant commission en a esté faite et auditeur venu a Moreul pour enquerre ques biens Guillaumes de Ganers avoit quant li sires de Moreul i mist la main pour le souspechon de le mort Mikiel de Cachi, en lequele enqueste li dit auditeur vaurrent aler avant et li sires de Moreul le debati et dist que sans li oïr ne devoient il faire enqueste ne aler avant, car il estoit apparelliés de dire bones raisons et dans enfourmer par bons tesmoins que des biens ledit Lombart n'avoit riens eu et que il n'en estoit riens tenus a rendre car bien en tans de le saizine et que se main i estoit avoient esté wardé et l'avoit lidis Lombars reconnut souffizaument devant bones gens, si com es articles est contenu. Liquel auditeur ne vaurrent oïr le seigneur de Moreul et li sires de Moreul ala moustrer a le court nostre seigneur le roi le grief qu'il li faisoient et soupplia en le court qu'il fust oïs a proposer ses raisons et a amener ses tesmoins sur les articles qu'il voloit proposer, et li donna le cours auditeurs pour estre oïs et pour proposer ses raisons et pour aler avant ensi com drois le desirroit. Et furent auditeur mesires Guis de Le Charité et Jehans de Montegni. Li ques sires de Moreul proposa articles et raisons devant lesdis auditeurs a cheste fin que on ne le peüst sivir ne riens demander des biens que Guillaumes de Ganers avoit au tans que il i mist se main pour le souspechon de l'ochision Mikiel de Cachi. Desquele raisons ledite partie, ou chil qui partie se fasoit, ch'est a savoir Biche et Mouschés et li prevos de Paris, demanderent a avoir copie et leur fu donnee par le main desdis auditeurs pour respondre asdites raisons et leur fu journee assignee et riens n'i ont respondu encore et pent encore le cause en chel estat, ne il n'apert point par le commission qui ballié est que li rois ne le cours veulle rapeler che qui de par nostre seigneur le roi9 et de par le court estoit otrié a le supplication le seigneur de Moreul, par coi il dist que li auditeur de maintenant ne doivent aler avant sans li oïr ensi com le cours li avoit otrié.

Item dist li sires de Moreul que il ne doivent aler avant par le raison de l'ajournement fait par le vertu de le commission, car li sires de Moreul dist qu'il est gentix hom, ne ne le pouet on adjournes se n'est en cas de crieme, qu'il n'ait souffizant adjournement et coustume est d'adjourner gentil homme a droite quinzaine au mains, li ques adjournemens ne fu mie souffizans car en l'espace de l'ajournement n'eut que nouef jours ou dis si que par le vertu de l'ajournement il n'est point tenus d'aler avant.

Item dist li sires de Moreul que juges ne pouet aler avant ne connoistre de cause a le condempnation d'autrui se che n'est en une de ches trois manieres : ou en enquerant de sen office tant com juges ou en cas qui le desirre, ou a requeste de partie ou qu'il se fache partie en cas qui le desirre et ou il le pouet faire. Or dist li sires de Moreul que enquerant de vostre office tant com juge en chest cas vous ne poes aler avant, seigneur auditeur, car se il estoit ensi que li sires de Moreul eust eu ou pris des biens ledit Gullaume, che qu'il ne connoist point, si est che une action personele qui s'estent en pecune sans plus, sans nul cas de crieme, en lequele action vous ne poes enquerre de vostre office tant com juge, se n'est en apelant et en oant le partie. Et s'il estoit ensi que a requeste de partie vous vausissiés enquerre, se dist li sire de Moreul que vous ne prés aler avant sans che que partie se complaigne car, se partie se complaignoit et apparoit, li sires de Moreul en feroit che que drois desierroit, ne vous tant com partie ne poes aler avant car vous ne poés estre juge et partie ; et se li rois se voloit faire partie et vous juges, si ne poes vous aler avant sans apeler et sans oïr le seigneur de Moreul car li rois ne pouet avoir autre droit que li lombars aroit s'il en voloit sivir le seigneur de Moreul, et se il l'en voloit sivir il convenroit que li sires de Moreul fust apelés et oïs, et dont se li rois se faisoit partie et vous juges et autre droit n'en porroit avoir que li lombars, il convient que li sires de Moreul soit apelés et oïs avant que vous alés avant, si que par ches raisons dist li sires de Moreul que li auditeur ne poueent faire enqueste sans li oïr et se il faisoient ou avoient faite, si ne doit ele mouvoir le court contre li ne li nuire a che qu'il ne soit oïs a proposer ses bones raisons et fait protestation que il ne renonche a nule raison de fait ne de droit que li puissent valoir par raison qu'il ait chi proposee qu'il ne les puist proposer toutes les fois que il verra et cuidera qu'eles li vallent et que le cours le vaurra oïr.

[7 ^e peau]

Veschi les raisons par coi me dame de Moreul et me sires de Moreul dient que me dame de Moreul devant dite ne doit point estre contrainte a che qu'ele soit tesmongnages en l'enqueste de le cause entre Gullaume de Gavers et le seigneur de Moreul.

Premierement dist ma dame de Moreul qu'ele ne fu onques adjournee pour dire tesmougnage en le cause bien ne souffizaument, ne n'est riens a li contraire se aucuns vallés fu en se maison, ce qu'ele ne set ne ne connoist, qui pour che l'ajournast, car a le dame devant dite n'aparut onques ne a li n'en parla. Et se a aucun de l'ostel l'avoit dit, che que ele onques ne seut la dame par ame de sen ostel, si n'est ele pas tenue a porter tesmougnage car li adjournement ne fu onques seüs de la dame ne par le valleit ne par ame de sen ostel a cui li adjournemens peüst estre fais.

Item dist la dame que la cause li touche en partie quant ele touche le seigneur de Moreul sen mari et dist que li auditeur ne doivent point li contraindre a che tesmougnage, meismement quant nus n'apert qui se plagne ne fache partie et quant nus ne se plaint ne fache partie ne li auditeur ne l'aient demoustré il apert que a porter le tesmougnage ele ne soit ne ne doit estre de riens contrainte et s'aucuns aparoit que partie se vausist faire ledite dame tant com a li touche, en feroit bien canques ordres de droit diroit.

[pièce]

[A la suite est cousue la lettre originale d'ajournement, jadis scellée de deux sceaux sur simple querre, en date du 13 avril 1295, dont copie figure en tête du rouleau]