[1]

I. Estienne Tallefer, escuier, tesmoing juré et requis desdites choses, dit par son serement que il ne vit onques ne n'oït que ledit Symon feist chose eu dit servise par quoi il le deust perdre. Requis se il s'i est porté bien et leaument, il dit par son serement que oïl, si comme il li est advis. Requis se il est bon et souffisant a estre eudit servise, dit par son serement que oïl et que il li est avis que il est mout curios de la forest garder. Requis de plus, plus n'en seit.

II. Joan de Lutehaire, escuier, ... dit... que il creit que ledit Symon se seit bien porter et loiaument eudit servise, et que il ne vit onques choses ne n'oït dire par quoi il le doie perdre, ne mes que il oït dire que un vallet que ledit Symon avoit, qui avoit non Colin, deveit aveir rendu du boes le rey a un homme que l'en apele Colin Coulombel et por cen que l'en dist que ledit vallet avoit vendu ledit boes, ledit Joan qui parle ala audit Coulombel et le trouva en amenant le bois et li demanda qui ceu boes li avoit vendu, et ledit Coulombel dist que nul ne li avoit vendu et que il avoit pris le bois de son auctoritey sanz nul autre.

Requis ou ledit Symon estoit, il dit que il ne seit, mes il creit que il fust en France.

Requis se il en fut onques en merci et se la justise le sout onques, il dit que la justise le sout bien et que il en fut a dis souz de tour. en amende.

Requis comment il le seit, il dit que il en vit metre icelui Coulombel en l'amende des diz dis souz et en vit ses cheveus prendren (sic) et li vit lesdiz diz souz paier.

Requis se il en seit plus, il dit que nenil, ne mes que il dit que ledit Symon est trop hastif de parole, mes le roy n'i pert rien, et plus n'en seit rien.

III. Guillaume Peil Mevé de Lutehare, ... dit... que il ne seit riens que ledit Symon ne seit bon et loial eu dit servise, et que il ne s'i seit porté bien et loiaument.

Requis se il seit point que ledit Symon vendist ne ne feist vendre point de la forest ne deu boes le rey, il dit par son serement que nenil.

Requis se il seit que ledit Symon prist onques raançon, loer ne pramesse de nuli pour esparner le de metre en amende, il dit par son serement que noy.

Requis se il fist onques corteisie audit Symon, il dit que oïl, mes par son serement il ne l'en lessa onques a metre en amende de nule chose dont il il li peust metre.

Requis se ledit Symon est souffisant a estre eudit servise, il dit par son serement que oïl, si comme il li est avis, et que il ne seit nul crime en li ne mes que il est trop hastif de parler, et plus n'en seit.

IV. Jordan le partor de Lutehare, ... dit... que il oït dire que Colin Le Paalier, de tens que il esteit vallet audit Symon, vendit du boes le rey. Requis se ce fut par ledit Symon, il dit que il creit que nenil, quar ledit Symon n'estoit pas adonques en pais. Requis se il prist onques ne ne feist prendre argent, loier ne pramesse ne autre chose de aucun por delessier les amendes le rey, il dit que aucunne foiz a il pris loier por lessier en des amendes si comme il creit, et aucune foiz prit loier et mis les en amende.

Requis se ledit Symon vendi onques ne ne donnast point du boes le rey, il dit que il n'en set riens.

Requis se il est souffisant ne curios eudit servise, il dit que oïl si comme il croit, fors que il est mout testu.

Requis de plus, plus n'en seit.

V. Estienne Pylart de Lutehaire, dit... que Ricart Seart a eu du bois le rey plusours foiz, que il n'achatout (sic) pas et en feseit roues. Requis se il l'avoit par ledit Symon, il dit que il creit que oïl. Requis comment il le creit, il dit por cen que plusours de ses voisins le disoient et le creit bien portant, que ce seit verité.

Requis se ledit Symon prist onques de aucun deniers por lessier le de metre en amende, il dit que de li qui parle out il une feiz un blanc denier por lessier, mes il ne le lessa pas, ainz le mist a dis souz de tour. de amende.

Requis se il est souffisant ne curios eudit servise, il dit que il en est plus curios que li qui parle ne vousist. Et plus n'en seit, souffisamment requis.

VI. Th. Tallefer de Lutehare, ... dit... que il n'en seit riens, nemes que il a oy dire que les vallez audit Symon ont vendu aucune foiz du boes le roy.

Requis si c'estoit par ledit Symon, il dit que il creit que oïl. Requis comme il le creit, il dit pour ce que il a oy dire a bones gens aucune foiz.

Requis se il out onques riens de nuls por lessier le a metre en amende, il dit que il creit que ledit Symon a eu plusors feiz corteisie, mes il ne les lessout pas a metre pour cen en amende, se comme il a oy dire.

Requis se il est curios dudit servise, il dit que oïl si comme il li est avis et que il le veoit souvent aler eu bois et plus n'en seit, souffisaument requis.

VII. Th. Legendre, ... dit... que il ne seit ne ne vit onques ne n'oït dire que ledit Symon ne seit boen et souffisant eudit servise. Requis se il set que ledit Symon vendist ne ne donnast ne ne feist vendre point du bois, il dit que nenil, que il sache. Requis se il est souffisant a estre eudit servise, il dit que oil, comme il li est advis, et plus n'en seit.

VIII. Raol le Begaut de Lutehaire, ... dit... que il a oï dire que les vallez audit Symon ont aucunne foiz vendu du bois le rei. Requis se c'estoit par ledit Symon, il dit que il ne seit, mes il le creit. Requis pour quoy il dit pour cen que il l'a oÿ dire dire a aucunes bones gens.

Requis se ledit Symon preneit riens de nuli por lessier le a metre en amende, il dit que il creit que aucune feiz en a il pris corteisie, mes se il les lessast a uns plez, il ne les lessast pas a autres. Requis se il est souffisant et curios eu servise ; il dit que il li est avis que il i est boen, et plus n'en seit.

IX. Robert Esmiart de Lutehaire, ... dit... que il ne vit onques en Symon Pytart par quoi il ne fust souffisant eudit servise, mes il a bien oï dire que aucune foiz le vallet audit Symon vendit du bois. Requis se c'estoit par ledit Symon, il dit que il ne seit, mes il a oï dire et le croit bien. Requis por quoi il le croit et comment il dit por cen que il l'a oÿ dire.

Requis se il a pris riens de nuli pour donner li les amendes le rey, il dit que aucune foiz a il pris corteisie des gens, et si ne les lessout il pas por cen a metre en amende.

Requis se il est curios dudit servise garder leaument, il dit que il en est si curios que il i va les bones genz cerquier a lour mesons et plus n'en seit.

X. Raol Dodeman de Lutehaire, ... dit... par son serement que il ne vit onques en Symon Pytart chose par quoi il doit perdre ledit servise, mes il a oÿ dire que le vallet audit Symon vendoit du boes le rey.

Requis se c'estoit par ledit Symon, il dit que il creit que nenil.

Requis se ledit Symon a pris loier ne pramesse de nuli por esparner le de metre en amende, il dit que il croit bien que il a eu de aucunnes genz corteisie por esperner les, et que il es esparnout. Requis comme il le croit par cen que ceuls qui li ont fet cortoisie li ont dit.

Requis se il est curios dudit servise garder, il dit que oïl.

Requis de plus, plus n'en seit.

XI. Th. deu Pin de Lutehaire, ... dit... que il a oï dire que Symon Pytart souffreit bien que l'em prist deu boes le rei por la cortoisie que l'en li en feseit. Requis se il seit que il le souffrist, il dit que il le croit bien. Requis comment il le croit, il dit que il le croit pour cen que Colin Coulombel qui en feseit cortoisie audit Symon li dist et que il en avoit eu plusors foiz deu bois por la cortoisie que il en feseit.

Requis se il prist onques corteisie por lessier nuli de metre en amende, il dit que de li qui parle en a il pris en l'en a lessié a metre en amende aucune feiz.

Requis se il est point curios de garder le boes, il dit que il l'en a veu souvent mout curios et aler eu bois, et nule autre chose il ne seit.

XII. Estace Le Cabole de Lutehaire, dit... que il fut present en une place ou Symon Pitart estoit eu bois et vit ledit Symon que Colin Coulombel chariout saccharete eu bois et que ledit Symon le souffreit.

Requis se c'estoit par ledit Symon, il dit que il creit que oïl. Requis comment il le creit, il dit por cen que il ne sout que ledit Coulombel en fust point en amende d'icel bois. Requis se ledit Symon li avoit vendu, il dit que il croit bien que il li avoit fet corteisie por quoi ledit Symon le souffreit. Requis se il seit point que ledit Symon eust riens d'aucuns por lessier le de metre en amende, il dit que oïl, de li meesmes aucunne feiz, que il ne li meteit point et que aucunne feiz, la ou il li avoit fet corteisie, le remeteit il en amende. Requis se il est curios de garder ledit bois, il dit que oïl mout bien, et plus n'en seit.

XIII. Sevestre Garnier de Lutehaire, dit... que il ne seit nule chose par quoi Symon Pytart ne seit bon et souffisant a estre eu servise, ne mes que il a oï dire que il avoit vendu deu boes, mes il ne le croit pas, et plus n'en seit.

XIV. Ricart de Longueville de Lutehaire, dit... que il ne vit onques ne n'oït dire a nuli que Symon Pytart eust fet chose par quoi il ne fust bon et loial endit servise.

XV. Roger Grosparmi de Lutehaire, dit que il ne vit onques chose en Symon Pitart por quoi il ne fust souffisant en son servise, ne n'oït onques dire que il eust point vendu de bois a homme a qui il en eust point vendu, ainz est mout curios du bois garder, mes il a bien oï de la gent plaindre de ses test ies et si a oï dire que il a pris de aucuns corteisie por deporter les aucunne foiz.

Requis se il est point curios de garder ledit bois, il dist oïl, comme il li est advis, et plus n'en seit.

XVI. Raol Letabole de Lutehaire, dit... que il ne vit onques chose eudit Symon par quoi il doit perdre ledit servise, mes il a bien oï dire que son vallet vendoit deu bois le rey, mes il ne l'oït onques dire a homme a qui il en eust point vendu, et plus n'en seit.

XVII. Th. Canabi, dit par son serement que il fut deu commandement Symon Pytart eu bois le roy et que il aida a charger a Colin Coulombel 2 charetees deu bois le rey a qui ledit Symon avoit vendues a Roger de Valougnes.

Requis comment il lesseit (sic), il dit que il fut present quant ledit Symon ala une foiz chiés ledit Roger por justisier le de l'argent et emprist 1 torel et ledit Roger dist que il en avoit paé la moitié a Coulombel, et ledit Symon li demanda la soue partie et ledit Roger li paia et ledit Symon li rendit son torel.

Requis de plus, plus n'en seit.

[au dos] Enqueste fete par le baillif de Costentin des forestiers de Lytehaire.

Enqueste fete du quemandement nostre sire le rey par le baillif de Costentin et par mon seigneur Nicholas Avenel, chevalier, a savoir mon comment Symon Pycart s'est porté en servise de la forest de Litehare, de tens que il i a esté serjant.

I. Mon seignor Michiel, persone de l'iglise de Lytehare, tesmoing juré et requis sur les choses dessus dites, dit par son serement que il a veu par plusours feiz que ledit Symon Pycart preneit gages en la forest, lesquiex il aloit boivre en la taverne et le blasmoit mout les tesmoing qui parole mout de cen que il aloit boivre lesdiz gages en la taverne, et li diseit souvent que ce ne deveit il pas fere, mes ce deust vivre sur les gages que il avoit de nostre sire le rey.

Requis se il sout onques que ledit Symon vendist dudit boes ne ne donnast ne que il esparnast nului que il trouvast a meffet, que il ne les meist en amende, dit que il ne le seit pas, mes il a oy dire a plusours que il en avoit vendu, mes il ne se recorde pas a qui ce fu, et plus il n'en set.

II. Raal Dodeman, Guillaume Robiquet, Gaufrei le Suour, Ricart Dodeman, Nicholas Guibart, Ricart Cousin, de la paroisse de Litehare, ... dient par leur seremens que il ne virent onques ne ne seurent ne ne croient que ledit Symon vendist onques point de bois, mes il dient que il a eu deus serjanz souz li qui fesoient assez de maus et de damages, mes euls ne sevent pas que ce fust par le seu audit Symon et creent que il ne savoit riens et autre chose euls ne sevent sus ledit Symon.

III. Robert de Greine, Guillaume Lasseleis, Gieffrei Talebot, Yon Milan, Robert Hardi, Micholas Hardy, Sevestre Fresnin, de la paroisse de Lascele, ... dient... que eus ne seurent ne ne virent onques point de boes dessus dit, ne ne croient que il onques point en vendist ne que il en accusast homme ne emcoupast a tort por aveir le lour, mes le haeent mout pour les grans merciz ou il les metoit et si disoient il que encore les metoit il a trop petites amendes solon le meffet que euls fesoient et plus il n'en seivent.

IV. Phelippe Legahen, Rad. de Glateignie, Rad. Broquart, Th. Peysson, de la paroisse de Guirville, ... dient... que ledit Symon se porta bien en servise, tant comme il i fu et que il ne seivent ne ne creent que il onques i feist chose par quoi il deust perdre le servise et que a bone cause il feseit cen que il feseit, mes il le haent pour cen que les meffez le requereent et autre chose il n'en seveent.